Yaoolem 1 - SEBR SÕNGO

Sika zĩiga

¹ Seb kãnga togsda sagls niyns a Moyiiz sẽn sagl Israyɛl kamba fãa b sẽn waa n nan ka rʋʋg Zʋrdẽ kʋɩlgã, n be Suf pʋ-weesẽ, Parã we-raoogẽ. B ra bee tẽn-bãmba sʋka: Tofɛl, Labã, Aserot la Di-Zaab.

² F sã n be Oreb n dat Kadɛs-Barnea la yaa Seyir tãnga sor la f dɩk yã, f na n kẽna rasem piig la a ye.

³ Ade, yʋʋm sẽn pid pis-naase Ezipt yiiba poore, kiuug piig la a ye wã, kiuuga pipi raare, a Moyiiz le tẽega Israyɛl kambã Soaala-Wẽnd sẽn da yeel-a t'a taas-b bũmb ningã.

⁴ Yɩ-la a sẽn waa n zab n tõog Amoritsa dĩma a Siyõ sẽn da kẽed Esbõ tẽnga, la a zab n tõog, Edreyi tẽnga, Bazã dĩm a Og, sẽn da kẽed Astarot.

⁵ A Moyiiz talla Wẽnnaam noora zãmsgo Moab tẽn-peelmẽ. Wakat kãng t'a Israyɛl nan pa rʋʋg Zʋrdẽ kʋɩlga ye. A Moyiiz saglsa la woto:

A Israyɛl kẽna sɩngre

⁶ «Wẽnnaam d Soaala goma ne tõnd woto Oreb tãng zugu: ‹Y sẽn be tãn-kãnga sɛɛga yaa n kaoosame.

⁷ Le sɩng-y kẽn marsã; dʋ-y tãmsã, Amoritsa sẽn zao zĩig ningã, saag-y tẽns niyns sẽn yeg-b bãmbã. Tũ-y Zʋrdẽ foollã n digd Yamsem mogrã, n dʋʋd tãmsã, n sigd kunkubã, n yegd Negɛb la Tẽnsʋk Mogrã, n tees Kanaã la Libã, n tees Efrat kʋɩl-kãsengã.

⁸ Ade, m kõt-y-la tẽngã. Tɩ reeg-y tẽn-kãng n kẽ tɩ yaa tẽn- kãng la m sẽn wẽen tɩ m na kõ-la y ba-rãmbã, a Abraam, a Izaak, a Zakoob, la bãmb loogr poore, b yagensã.›

Bʋ-kaoodba tũusgu

⁹ Dẽ me la m yeel yã: ‹M ka tõe n zɩ yãmb m ye ye.

¹⁰ Wẽnnaam, y Soaala, kɩtame tɩ y fɩɩge, la rũnna wã y sõora taa yĩngr ãdse.

¹¹ M datẽ lame tɩ Soaala, y yaab rãmba Wẽnda, le paas y sõora naoor tusri la b ning-y bark wala b sẽn kãabe.

¹² La yãmb meng neeme tɩ maam m ye ka tõe n welg y yɛla ye, m ka tõe n tʋk y mo-beedã, y zabã, y no-koɛɛma ye.

¹³ Bɩ sak fãa wa ne a neba, neb yam sẽn weke, sẽn vẽene, sẽn tar bãngr zulunga, tɩ m dɩk-ba n lʋɩɩs y taoore.›

¹⁴ M sẽn gom-y woto wã, y leok-m lame: ‹Y sẽn yet tɩ d maan bũmb ninga yaa sõmbo.›

¹⁵ Dẽ me la m tũus y sagsẽ wã neb sẽn da zoe n ya kãsem-dãmba, neb sẽn ka mi pirpir ye, neb bãngr sẽn pidi, la m kõ-b-la naam: bãmb kẽer n lebg neb tusr nanamse, kẽer pis-nu nanamse, kẽer piig nanamse, n le paas-b sõangdb buud toor-toore.

¹⁶ Dẽ sẽn maane, ad-m sẽn yeel y bʋ-kaoodbã: ‹Yãmb n na n kelg y saam-biisa koeese la y welg ned kam fãa yell ne zemsgo, ned ne a saam-biiga, ned ne sãan sẽn vɩ ne-a.

¹⁷ Da bʋ-y m mi-a-zagl bʋʋd ye. Kelg-y nin-bõonesa wa nin-bɛda. Da zoe-y ned nif ye, tɩ Wẽnd la yãmb bʋ-kaooda. Yell sã n beẽ t'a welgr ya toogo bɩ y bas-a ne maam.›

¹⁸ Wakat kãnga m wilg-y-la y sẽn tog maan fãa.

A Israyɛl tõdgre

¹⁹ Dẽ poore d paama Soaala noore la d yii Oreb n pãrg zĩ-peen-daag sẽn yalem la sẽn dɩt neba wala y sẽn tẽrã. D teesa Amoritsa tãnga. D sẽn ta Kadɛs-Barnea,

²⁰ m yeel-y-la be: ‹Y taa tãnga, Amoritsa tãnga, Soaala-Wẽnd sẽn kõt tõndã.

²¹ Ade, Wẽnnaam, y Soaala, rɩka tẽngã n kõ yã. Dʋ-y, soog-y tẽngã tɩ Wẽnnaam, y yaab rãmba Wẽnda, da kãab-a-la yãmba. Da maan-y dabeem ye! Da bas-y tɩ bũmb woog y raood ye!›

²² Wakat kãnga y kolg n yeel-m lame: ‹D tʋm neb tɩ b reng taoore n kaag weooga zãng n kõ-do la b lɛɛg n wa wilg-d sor ning d sẽn tog n dɩke, la tẽns niyns d sẽn na n tãage.›

²³ M gesame tɩ rẽ segdame la yãmb sʋka m yãka neb piig la a yiibu, sak fãa ne a neda.

²⁴ B sẽn wẽnemd n dʋ tãngã b taa Eskol gõnegõtã, n gilg n sege.

²⁵ B bao tẽnga tɩɩs biisi n zã n wa la b togsa b sẽn yãende. B yeelame: ‹Wẽnnaam, d Wẽnda, sẽn kõt tõnd tẽng ninga yaa tẽn-sõngo!›

²⁶ Ne rẽ fãa yãmb zãgsa Soaala-Wẽnd noor n yeel tɩ y kõn kẽng ye.

²⁷ La y kẽ-la y gãagẽ n yõk b wɩdga n yetẽ: ‹Yaa b sẽn dɩt beem ne tõnda yĩnga la Soaala-Wẽnd yiis tõnd Ezipt tẽnga! B rat n dɩka tõnd n kõ Amoritsã tɩ b kʋ-d zãngã.

²⁸ Pʋs n yaa bõe yĩng la d na n kẽng be? D saam-biisa wooga d raoodo tɩ yaa woto la b gomyã: Tẽnga neb pãng la b sõor yɩɩda tõndo. B kẽeda tẽn-bɛda, tẽns sẽn me n gũbg ne lalse la sẽn zao yĩngri. B tol n yãenda Anakitsa be!›

²⁹ Dẽ la m yeel yã: ‹Da rig-y rabeem ye, da rig-y b taoor ye!

³⁰ Wẽnnaam y Soaala lʋɩ-la y taoor n kẽnda, bãmb n na n zab y zĩigẽ wala b sẽn maan Ezipt tẽnga, y fãa nifẽ.

³¹ B na n maana wala zĩ-peen-daagẽ, n buk-y wala ned sẽn buk a biiga, n wa tãag y sora baasgo, kaalẽ.›

³² Ne rẽ fãa y kell n pa tẽ Soaala, y Wẽnnaama ye.

³³ Yaool n ya bãmb n da kẽnd y taoore, sora zugu, n na n bao y sik zĩiga, bãmb vẽenem n da kẽnd y taoor yʋngo n wilgd-y sore, bãmb sawadga maasmẽ la y ra kẽnd wĩntoogo.

³⁴ Soaala-Wẽnd wʋma y sẽn da gomdã, b sũur puugame tɩ b wẽen woto:

³⁵ ‹Tẽn-noog ning m sẽn kãab y ba-rãmbã, yãmb ned ba a ye, zamaan yoog kãnga ned ba a ye kõn yãend-a ye.

³⁶ Nin-yend bal n na n yãend-a, yaa a Yefune biig a Kalɛb. Yẽ na n yãend-a lame, yẽnda ne a kamba la m na n dɩk-a n kõ, tɩ yẽ tũ Wẽnd n pa tol n bʋdg ye.›

³⁷ Yãmb yĩnga Soaala-Wẽnd sũur tol n puuga ne maam menga, tɩ b yeel-ma: ‹Fo menga kõn kẽ tẽnga ye!

³⁸ Sã n yaa a Nun biig a Zozuwe, sẽn sõngda fooma, yẽ na kẽ. Bɩ f keng a raoodo tɩ yẽ n na n kẽes budã a tẽngẽ.›

³⁹ Dẽ poore Soaala goma ne yãmb gill woto: ‹Y sẽn da gomd tɩ b na n yõga y kambã n kẽes yembdã, kamb niyns sẽn nan ka mi b nensã, yaa bãmb n na n kẽ tẽngã ne a Zozuwe. Yaa bãmb la m na n dɩk tẽngã n kõ tɩ b soog-a.

⁴⁰ Sã n ya yãmba, wẽnemd-y n tees zĩ-peen-daagã, dɩk-y Rudum Mogr sore.›

⁴¹ Yaa woto la y leok maam: ‹Tõnd beega Soaala! D na n bobame n tak zabre, wala d Soaala sẽn kõ-d noorã.› La sɩda, y fãa bobame n tẽed tɩ y na n dʋʋ tãnga naana-naana.

⁴² La Wẽnd yeel-m lame: ‹Wilg-b tɩ b pa na n dʋ ye! Tɩ zabr pa na n zab ye, tɩ m yi-la y poorẽ! Da bao-y tɩ y bɛɛba wa tõog-y ye.›

⁴³ M gomame la y pa kelg-m ye, y pa kelgd Wẽnnaam gomd ye, y rʋʋ tãnga ne wʋglem.

⁴⁴ Amoritsa yii n seg-y-la b tãnga zugu la b pʋga yãmb wala sĩ-lolle, b varga yãmb Seyir n ta Orma.

⁴⁵ Y lɛɛg n waa Soaala-Wẽnd taoor ne nintãm, la b pa kelg-y koɛɛg ye, b tʋbr pa wʋm y gomd ye.

⁴⁶ Yaa rẽ la y kaoos Kadɛs wala y sẽn kaoosã.