Tʋʋma 12 - SEBR SÕNGO

A Piyɛr yõkre

¹ Yaa rẽ sasa la a Erod yõg Tigenga neb kẽere n namse.

² A kɩtame tɩ b kʋ ne sʋʋga a Zã kẽema, a Zak.

³ Rẽ taa Zʋɩf rãmba yam t'a na n kɩt tɩ b yõk a Piyɛr me. Sega bur sẽn pa lobd bɩlle wakato,

⁴ t'a na n kong n sui-a roogo n gũud Paka poore n na kẽes-a bʋʋdo, buuda gill taoore.

⁵ A Piyɛr sẽn kẽ roogo la Tigenga me sẽn yõk pʋʋsg a yĩnga n ka vʋʋsdẽ ye.

⁶ Ra zoe n lebga yʋngo, ra keta beooga vẽeg tɩ b kẽes a Piyɛr bʋʋdo. A ra paam n gõee tãb-biis a yiib sʋka la bãng n da sog-a ne tãb-biig fãa. B ra ninga gũudb me rooga noore.

⁷ Soaala malɛk siga vugr bala tɩ bi-beesa roog na n yãng ne vẽenem. Malɛka tika a Piyɛr lʋgre t'a yiki. A yeel-a lame: «Yik yĩngr tao!» Bãeensa foosa a nusẽ n dʋʋg tẽnga.

⁸ Malɛka yeelame: «Sẽbg f sẽbdga la ning f gãndalsa.» T'a Piyɛr maan boto. Malɛka le paasame: «Rɩk f fu taokã n palg f bãoko la f pʋg maam.»

⁹ A Piyɛr yiime n pʋgd-a. A ka mi tɩ yella yaa sɩd ye. A bas n tẽedame t'a zãmsdame.

¹⁰ B yõsga pipi gũudba zĩiga, n le yõsg a yiib soaba, n wa ta tẽnga noor kut kʋɩlenga sẽn paka toore tɩ bãmb looge. B kẽname n tɩ yek sor a to la malɛka wẽneg n bas-a lame.

¹¹ Dẽ marsã la a yama leb a zĩigẽ t'a yeele: «Marsã la m ne vẽenega tɩ Soaala tʋma b malɛk t'a wa fãag-ma a Erod nusẽ la a fãag-m ne Zʋɩf rãmba sẽn da gũud bũmb ningã.»

¹² A Piyɛr bãnga a sẽn be zĩig ninga t'a na n tees a Mari zaka. Pʋg kãng ya a Zã ma la a Zã me le boondame tɩ Mark. Neb wʋsgo n da tigim zakã, n da pʋʋsdẽ.

¹³ A Piyɛr sẽn vẽ kʋɩlengã la zak bi-pugl a ye, sẽn boond tɩ Rodɛ, waa n na n ges sẽn yaa soaba,

¹⁴ n wʋm a Piyɛr koɛɛg, n kɩdem sũ-noogo n yĩm kʋɩlenga pakre, n wudg n leb pʋgẽ n na n wilg tɩ ya a Piyɛr n be dignoorẽ.

¹⁵ Pʋgẽ dãmba yeel-a lame: «Ad-f zuga lebgame.» La yẽ ra wẽendame tɩ yaa sɩda. Tɩ b le paase: «Ad yaa Malɛka!»

¹⁶ A Piyɛr ra ket n tara kʋɩlenga kogsgo. B sẽn waa n pake b sɩd mikame tɩ yaa yẽnna tɩ rabeem na n kẽ-ba.

¹⁷ A Piyɛr kams-b la ne nug tɩ b bas bʋʋre; a wilg-b la Soaala sẽn yiis-a rooga toto la a paasame: «Tɩ wilg yã a Zak la saam-biisã.» A sẽn yi, a kẽnga zĩig a to.

¹⁸ Zĩig sẽn yẽege, tãb-biisa nengẽ wulumdame: a Piyɛr kẽe yɛ? A kẽe yɛ?

¹⁹ A Erod sẽn tʋm tɩ b wa ne-a, b pa yãend-a ye. A kɩtame tɩ b sogs gũudbã, a kɩtame tɩ b kʋ ba. A Erod yii Zɩɩde n leb Sezare la a paa be.

A Erod kũum

²⁰ A Erod ne Tir la Sidõ rãmba ra ka zemsd taab ba bilfu. B waa n tɩ yõka sõgen kãseng, a Blastus, sɛɛga t'a tall-ba n taas dĩma taoore tɩ b yẽs laafi yẽsgo. B tẽnsa sõngr da yita dĩma nẽngẽ.

²¹ Daara sẽn ta, a Erod yeelga a naam futu. A rʋʋ bũmb sẽn zẽke n yɛs n gomda.

²² Zãma wã sɩnga kaasgo: «Ad-y ka ninsaal n gomd ye, yaa wẽnde!»

²³ Zĩig pʋgẽ bala, Soaala malɛk wẽe-a lame t'a ka gom n pẽg Wẽnd ye. Zãnzũy n wẽneg m kẽe a nemsã t'a ki.

Antiyos lebre

²⁴ Wẽnd gomda ra paamda moonego tɩ tẽedba me sõor tar paasgo.

²⁵ A Barnabe ne a Sol pidsa b tʋʋmna Zerizalɛɛm. B lɛɛg n waa Antiyos ne a Zã, b sẽn boonda soab me tɩ Mark.