Tʋʋma 10 - SEBR SÕNGO

A Piyɛr ne tãnsoaba

¹ Ned n da be Sezare n boond tɩ Kornɛy. A ra yaa tãb-biis koabg taoor soaba, la Kornɛy tãnsoben-dooga neb da yita Itali.

² Yaa ned sẽn da mi Wẽnd waoogre: ne a sẽn ya bu-zẽna, yẽ ne a zak rãmb fãa da gãda Zʋɩf rãmba tẽebo. A ra kõta Zʋɩf rãmba kũun bɛda. A ra ka vʋsd ne pʋʋsg ye.

³ A waa n paama likri. Daar a ye, zafare, a yãenda ne a nif menga, Wẽnd malɛk sẽn kẽ a zakẽ n bool-a: «Kornɛy!»

⁴ A sẽn ges-a, a yɛɛsame. A sokame: «Yaa bõe, Soaala?» Malɛka leokame: «Ad-f pʋʋsgã la f wẽn-kosgã yel-sõmda yɛsa Wẽnd taoore, tɩ Wẽnd tẽr f yelle.

⁵ Dɩlla marsã bala tʋm neb Zope tɩ b tɩ wa ne a Simo, b sẽn boonda soab t'a Piyɛr.

⁶ A yõga zap a ye gãag-sobendo. Zapa me yʋʋr yaa Simo la a yira bee mogra noore.»

⁷ Malɛk ning sẽn da gomda wã sẽn looge, la a Kornɛy sẽn bool a rakõap a yiibu n paas tãb-biig a ye sẽn kẽ Wẽnde la a sẽn da yãk n gũnug a menga.

⁸ A sẽn wilg-ba b sẽn da tog n bãnge, a tʋm-b la Zope.

⁹ Vẽkembeoogo b taame. Zemsa wĩnto-suka, zemsa a Piyɛr sẽn dʋ rooga zug n na n pʋʋse.

¹⁰ Kom waa n yõk-a lame t'a rat bũmb n ning a noorẽ. B sẽn waa n segend dɩɩbã, a yama fʋsga a yĩngã.

¹¹ A yãenda saaga sẽn pake tɩ peen kãseng sẽn loe a noy a naas sigd tẽng wa zãnega.

¹² Zãnega ra pida ne rũms sẽn tar nao a naase la bõn-vuudi la yĩngr luiili.

¹³ La koɛɛg n wẽneg n yeel-a: «Aya! Piyɛr, kʋ n wãbe.»

¹⁴ T'a Piyɛr yeele: «Ayo! Soaala, bũmb sẽn ya rẽgdo, t'a sɩɩsg meng kisa, zɩɩ n kẽ m noorẽ ye.»

¹⁵ Koɛɛga le yeel-a lame, naoor a yiib soaba: «Wẽnd sẽn yɩlg bũmb ningã bɩ f ra saag n bool tɩ rẽgd ye.»

¹⁶ Yella maana woto naoor a tãabo. Dẽ poore, fãa leba a zĩigẽ, yĩngri.

¹⁷ A Piyɛr ra ket n yɛsa ne yɩɩre la a sokd a menga a sẽn yãenda võore. Wakat kãng la a Kornɛy sẽn tʋm b rãmba poog dignoorẽ.

¹⁸ B reng n sokame n bãng a Simo zaka, n bãng rao ning sẽn boond t'a Piyɛr sã n sɩd siga be.

¹⁹ Dẽ t'a Piyɛr ra ket n baooda likra võore la a Vʋʋsem Sõng yeel-a lame: «Ad neb n baood-fo.

²⁰ Yiki, sig n tũ-ba n looge tao-tao tɩ yaa maam n tʋm-ba.»

²¹ A Piyɛr sigame n sok nebã: «Bõe n wa ne y ka?»

²² Tɩ b na n leok: «Yaa Tãnsoab a Kornɛy, yaa nin-sõng sẽn sak Wẽnd tẽebo tɩ Zʋɩf rãmba pẽgd-a, yaa yẽ n paam tɩ malɛk sõng wilg-a t'a bool-f tɩ f waa a nengẽ la a kelg koees niyns f sẽn na n kõ-a.»

²³ T'a Piyɛr na n bas-b tɩ b kẽ la a maan-b gãag-sobendo. Beoog sẽn vẽege, b naaga taab n dɩk sore; Zope saam-biis kẽer yãag-b lame.

²⁴ Da-yɩten-daar la a ta Sezare. A Kornɛy ra tigsa a buudu la a zo-rãmba n gũud-a.

²⁵ A Piyɛr sẽn kolg zaka noor la a Kornɛy sẽn yi n seg-a n wõgemd a taoore.

²⁶ A Piyɛr doog-a lame n yetẽ: «Yik tɩ mam me yaa ned wa foom.»

²⁷ B sɩnga sõasg la b kẽedẽ. Yaa zãma n da tigim zaka pʋga.

²⁸ A Piyɛr yeel-b lame: «Wala y sẽn mi wã, maan zood ne bu-zẽn la f kẽe a zakẽ, yaa kisgu ne Zʋɩf. La ade, Wẽnd Wilg-m-la sẽn ka yɩɩd rasem a wãn bala tɩ m ka tog n bool ninsaal ba a ye tɩ rẽgdo, bɩ n yeel t'a sɩɩsg kisame ye.

²⁹ Yaa rẽnd me yĩnga la y sẽn bool-ma m pa yaas n tadg ye. M kot-y lame tɩ y togs-ma: yaa bõe yĩng la y bool-ma?»

³⁰ A Kornɛy leokame: «Yaa rasem a tãab rũnna la m da be m zakẽ n pʋʋsd zafar pʋʋsgo la ned n waa n yals m taoore ne fut peelem sẽn tʋʋsd nini.

³¹ Raoã yeel-m lame: ‹Kornɛy, f pʋʋsga reegame, Wẽnd tẽega f wẽn-kosga yel-sõmde.

³² Tʋm neb Zope tɩ b wa ne a Simo sẽn boond tɩ Piyɛr. A bee zap a Simo zakẽ, zak sẽn be mogra noore.›

³³ M wẽneg n kɩtame tɩ b babs-fo, la f sẽn wa wã f maana neere. Ad-d fãa sẽn yɛs f taoore n dat n wʋm Wẽnd sẽn kõ-f noor ningã.»

A Piyɛr leokre

³⁴ A Piyɛr yeelame: «M neeme tɩ Wẽnd ka welg ninsaal ne a to ye.

³⁵ Fo buuda sẽn yaa soaba, f sã n zoet Wẽnde la f maand sẽn zemse, b pʋgda f poore.

³⁶ Yaa Israyɛl kamba la b gom ne, n gom laafi ning Dũni zãng Soaala, a Zezi Krista, sẽn wa ne a soabã.

³⁷ Y tẽra bũmb ning sẽn maan Zɩɩde ween-vɩʋʋgẽ. Y tẽra Nazarɛt Zezi wã yelle. Y tẽra b sɩngr Galile, a Zã sooba poore.

³⁸ Y tẽra Wẽnd sẽn pids-b ne a Vʋʋsem Sõngo la b pãnga. Y tẽra me tɩ Wẽnd sẽn da be ne-bã, b sẽn pɩʋʋg zĩig ning fãa b maana neere la b sãooga Sʋtãan sẽn da kẽ b rãmb fãa.

³⁹ Sã n ya tõndo, d yɩɩ b vɩɩma kaset dãmba, Zʋɩf rãmb tẽngẽ la Zerizalɛɛm. Yaa bãmb la b saag n ka pika zugu n kʋ.

⁴⁰ La Wẽnd vʋʋg-b la rasem a tãab daare tɩ b na lik b menga.

⁴¹ Ka neba fãa la b lik b meng ye, yɩɩ Wẽnd sẽn beool n yãk b rãmba. Yɩɩ tõnd sẽn dɩ la d yũ ne bãmba, b vʋʋgra poore.

⁴² Bãmb n kõ tõnd noor tɩ d moon la d wilg tɩ bãmb la Wẽnd yals yã tɩ b na n kao sẽn vɩ-ba la sẽn ki-ba bʋʋdo.

⁴³ Yaa bãmb yelle la bãngdba fãa gomda n yet tɩ sẽn tẽed-a bãmb fãa na paam a yel-wẽna yẽesgo bãmb yʋʋr yĩnga.»

Bu-zẽmba soobo

⁴⁴ A Piyɛr ra ket n gomdame la a Vʋʋsem Sõng siga sẽn da kelgd-ba fãa.

⁴⁵ Zʋɩf rãmba sẽn da tũ a Piyɛr n wa wã yɛɛsame tɩ b yãendame t'a Vʋʋsem Sõng me siga bu-zẽmbã.

⁴⁶ B ra wʋmdame tɩ b wɩlemd bu-zẽn goama n pẽgd Wẽnnaam. Dẽ la a Piyɛr yeel yã:

⁴⁷ «D tõeeme n mong soobo, neb sẽn paam a Vʋʋsem Sõng wala tõnd bɩ?»

⁴⁸ La a kõo noor tɩ b so-ba, a Zezi Krista yʋʋr yĩnga. B kosa a Piyɛr t'a pa ne-ba dasem a wãn yɛsa.