Sofoni 3 - SEBR SÕNGO

B pa kelg Soaala ye

¹ Yell na n paka Zerizalɛɛm, tẽn-tõata, n pak tẽng sẽn pid ne wẽnga la pãn-tõogo!

² A pa kelg Soaala boolla ye, a pa reeg saglga ye: a pa pelg a pʋg ne a Soaala, a pa teeg b sõngr ye.

³ Tẽnga pʋgẽ, kug-zĩidba yaa gɩgma sẽn ningd b rãamde; bʋ-kaoodba yaa zaabr digd-n-yĩidsi sẽn pa rɩt n kell yibeoog no-soak ye.

⁴ A bãngdba yaa yʋ-baoodba, zirẽ dãmba. A maan-kʋʋdba ka zãad te-sõma wã wa sẽn segd ye, b kɩɩsda Soaala noore.

⁵ Soaala yaool n keta tẽnga pʋga. B raab la zemsga zĩndi tɩ wẽnga meneme. Beoog-beoog fãa b wilgda bõe n zemse, la bõe n ka zemse. Ne rẽ fãa nin-wẽnsa tara b tʋʋma sẽn wat ne b yãndã.

⁶ Le yaa Naaba-Wẽnd n gomde: «M wãa bu-zẽmb wʋsgo; b ro lug-luga rʋʋgame, ned ka le kẽnd b soya zut ye, b tẽnsã sarmame, ned ka le be be ye.

⁷ Mam da yetame: Zerizalɛɛm dãmba na yaa n zoe m nifu, b na yaa n deeg m saglgo; woto wã kõn yɩ pakr tɩ m wãa-a ye, kõn yɩ pakr tɩ m pids m sẽn yalsa ye. Kato! B ka zɛɛg ne bũmb a to sã n ka b tʋʋm wẽna.

⁸ Rẽ yĩnga, gũ-y-ma, Soaala n gomde, gũ-y daar ninga m sẽn na n yik bʋʋd ne yã, tɩ bala m da yeelame tɩ m na n tigma bu-zẽmbã, n tigim rĩundu, n kiig m sũ-puurã b zutu, m bas tɩ m sũura widg a bugum n dɩ tẽnga zãnga.»

Kãab noogo

⁹ Soaala-Wẽnd le paasdame: «N yẽe! M na tedga bu-zẽmbã. M na peka b noorã tɩ b pẽg-ma, maam, Naaba-Wẽnde. B na n naaga taaba n waoog-ma.

¹⁰ Ba sẽn be-b Nubi kʋɩlsa rʋʋnde na n waa ne kũuni n pʋʋs ma.»

A Israyɛl bu-kelle

¹¹ Maam, Naaba-Wẽnd n gomde: «M waoonga raare, yãnd kõn le yõk-fo, m buudu, f yel-kɛga yĩnga la f sẽn beeg maama yĩng ye. M na n zãaga ne-fo f kamb niyns sẽn pid ne wilg-m-mengã. M na sɛɛsa wilg-m-men-tʋʋma m tãn-sõnga zugu.

¹² M na n keesa m menga fo kamb niyns sẽn ka mi zẽk-m-menga la sẽn ya naong rãmba, neb sẽn na n kos-m tɩ m sõng-ba.

¹³ A Israyɛl bu-kellã kõn le maan sẽn ya kegr ye, b kõn le yag-m zirẽ ye, b zelemd kõn le tudg b taab ye. B na tõog n dɩ la b gũsi tɩ ned ba a ye ka yɛɛs-b ye.»

Tẽn-paalle

¹⁴ Kelem sũ-noogo, Siõ, kaas sũ-noogo, Israyɛl! Noog f sũuri zãnga, Zerizalɛɛm!

¹⁵ Soaala basa taale n lebs b kãab beedã. B kɩtame tɩ f bɛɛba kʋɩ tĩiga. Soaala, a Israyɛl Dĩma bee ne foo. B pãnga labsa, Zerizalɛɛm dãmb kõn le zoe yel-beed dabeem ye.

¹⁶ Ad daar n wate, Zerizalɛɛm, la b na n yeelame: «Da zoe rabeem ye, Siõ tẽnga! Da bas raood ye!

¹⁷ F Soaala-Wẽnnaam bee ne foo, b tara pãnga la b na sõng-f tɩ f maan raoodo. B sũura nooma ne foo, b nonglma waa n kõ-f-la vɩɩm paalga. F neba me kaasda sũ-noog f yĩnga,

¹⁸ wa kibs daare.» Soaala-Wẽnd n paasde: «M na n menesa yel-beedo, m na n zãag-f-la ne f yãndã.

¹⁹ Daar n wate tɩ m na n sɩbg neb niyns fãa sẽn maan-b yãmb pãngã. M na n tɩpa sẽn paam-b sãmpoagã, m na n le waa ne pa-wetã. Ãndũni rãmba ra sẽoosdame la b ra pursd yãmba, m na n teka rẽ fãa n kõ-y yʋ-sõngo la ziir.

²⁰ Wakat kãnga, yaa maam, Naaba-Wẽnd, n gomde, m na n tigs-y-la kaanẽ. M na n teka y pɛtã. M na kõ-y yʋ-noogo la ziir dũni rãmba sʋka.»