Sofoni 2 - SEBR SÕNGO

Sulg-m-meng yõodo

¹ Adem biisi, tags-y neere, zoe-y yãnde n teem y manesem.

² B sẽn na n sẽeg yãmb raar a ye wa mooda nan ka ta ye. Soaala-Wẽnd sũura sẽn na n fudg a bugum n waag-y daara nan ka ta ye.

³ Wẽnemd-y n tees Soaala, yãmb fãa, tẽng zug nin-bõonese, sẽn deegd-b noya; bao-y zemsgo, sak-y sulg-m-menga: tõe tɩ y põse, Soaala sũ-puura raare.

Zabr ne nin-taoor dãmba

⁴ N-yẽe! Gaza, na n lebga we-raoogo, Askalõ na n lebga raboogo. Wĩnto-sʋka la b na n dig Asdod dãmba; Ekrõ rãmb na n digame n yiis b tẽngẽ.

⁵ Yell na pak-y, yãmb fãa sẽn yi Kaftor n wa kẽed ka, n vɩ mogra noorẽ. Ad Soaala sẽn leokd-y poorẽ: Kanaã, Filisti rãmba tẽnga, m na n wã-f lame, m na yiisa f neba fãa.

⁶ Mogra noorã na n lebga rũms kɩʋng zĩiga. Rũm-kɩɩmba na n mee wuba, b piis yĩnga.

⁷ Mogrã noore na n yɩɩ a Zɩɩda bu-kellã soolem, b na n kɩɩma b rũmsa be, la zaabre, b na n tɩ gãanda Askalõ rota pʋga. Ade, Naaba-Wẽnde, b Wẽnnaama, na n lʋɩɩsa b toogo tɩ b yella manege.

Zabre ne yaang rãmba

⁸ Naaba-Wẽnd n yete: «Mam wʋmame tɩ Moab la Amon kamba laadame la b paoogd m buudã. B tʋʋs-a lame la b kẽ n wedga a soolma n paas b rẽnda.

⁹ Yaa rẽ yĩnga la m wẽend ne m menga, maam, dũni fãa Soaala, a Israyɛl Wẽnnaama, tɩ sɩd wa m sẽn vɩ wã, Moab ne Amon na n wãa zãnga wala Sodom la Gomor. B tẽn-peelma fãa na n lebga zĩ-peen-daaga, gõos zĩiga, tẽng yamsem sẽn sãame; mam bu-kellã n na n wa zɛ-ba, la b soog b tẽngã.

¹⁰ Dẽ n na n yɩɩ b wilg-m-menga sɩbgre tɩ bala b paooga dũni fãa Soaala buudu; b tʋ-a lame la b reega a tẽnga bogre n sooge.

¹¹ Soaala-Wẽnd na n yɩɩ toaag ne bãmba. B na n menesa wẽn-naandsa gilli. La bu-zẽmba gilli, ned kam fãa a tẽngẽ, na n waooga Naaba-Wẽnde.»

Koɛɛg ne goabg la rɩtg rãmba

¹² Soaala-Wẽnd n yete: «Yãmb me, Nubi rãmba, m zabra sʋʋga na n pogl-y lame tɩ y ki.»

¹³ Soaala-Wẽnd na n yika ne yãmb me, nug goabg rãmba la b na n wãa Asiri. B na n waa ne Niniv lʋɩɩse. A pʋs n na n lebga zĩ-peen-daaga.

¹⁴ Tẽnga vẽenema na n pida ne yir rũmsi la rũms a taaba. Lalsa sẽn me gils-gilsi n ka lʋɩ wã zutu, la viuug luiila la kos-ki na n soonde. F sã n kolg be yaa luiili bʋʋr bal la f wʋmda la f sẽn ne yaa raboogo. Sẽn ya raoog fãa kao n dɩgame.

¹⁵ Yaa woto la a na n baase, tẽng ninga sẽn da pẽgd a mengã t'a kẽedba ra tẽed tɩ bũmb kõn maan-bã, n tẽed tɩ Niniv taar ka be moogã. Ade, a ka lʋɩ? A ka lebg rũms na-tẽnga? N-ye! Sẽn looda be pĩida a noor la a fɩɩnẽ.