Sofoni 1 - SEBR SÕNGO

Sebra tʋɩɩsgo

¹ Woto yaa koees niyns a Sofoni sẽn paam Soaala nengẽ a Amon biiga a Zoziyas sẽn waa n ya Zɩɩda dĩma. A Sofoni, yaa a Kusi biiga, t'a Kusi yaa a Gedaliya biiga, a Amariya yagenga, a Ezekiyas yagen-tʋbra-kẽega.

Soaala na n zẽka b nugu

² Soaala-Wẽnd gomda woto: «N-yẽe! M na n menesa fãa tẽnga zugu.

³ M na n menesa neba la rũmsi, m na n menesa yĩngr luiila la mogr zĩifu, m na n luba nin-wẽnse, la m na n yiisa ninsaalba tẽnga zugu.» Soaala n yeele.

⁴ M na n zẽka m nugu n zab ne Zerizalɛɛm kẽedba fãa, ne Zɩɩda neba fãa. M na n yiisa Zɩɩda tẽn-peelmẽ bũmb ning fãa sẽn ket n wẽnd a Baal waoogre. M kõn le sak tɩ b tẽeg a maan-kʋʋdba meng yell ye.

⁵ M na n zaba ne sẽn dʋʋd-b rot zutu n waoogd yĩngr ãdsã, n zab ne sẽn ka yɛs-b zĩ-yɛnga. Bãmb dãmb n wẽende tɩ yaa maam, Naaba-Wẽnd, la b pʋgda la b naag n pʋgd wẽn-naand a Milkom.

⁶ M na n menesa sẽn zãagd-b ne maam, Naaba-Wẽnde, n pa kot m sõngre, n pa kot m vẽnegre.

⁷ Bas-y bʋʋre Soaala-Wẽnd taoore, tɩ b sũ-puura raar kolgdame! N-yẽe! Soaala segla maoongo, la b zoe n yɩlga b sẽn bool b rãmba.

⁸ Daara sẽn watã, maam, Naaba-Wẽnd, maoonga raarã, m na n sɩbga taoor dãmbã la rĩm-biisã ne neb niyns fãa sẽn yer bu-zẽn-futu, n tũud rog-n-mik paala.

⁹ Maoonga raare, m na sɩbga neb niyns fãa sẽn kẽed-b wẽnd dooga yaare. M na sɩbga sẽn pidsd-b zu-soab zaka ne arzɛk b sẽn paam ne zãmbo la pãn-tõogo.

¹⁰ Maam n le yete, maam, Naaba-Wẽnde, tɩ m maoonga raare, Zerizalɛɛm dãmb na wʋm kɛleng, Zĩma rignoorẽ. Kũmkũm na sãd Kẽedpaalgo la tãmsa na wulumd ne bʋ-raase.

¹¹ Kaas-y yã, Teoogẽ dãmba tɩ bala Kanaã neba fãa na n kiime, sẽn maand-b leobg fãa na n loogame.

¹² Baraare m na n widga fitila, m na n vɛɛsa Zerizalɛɛm m na n zaba ne neb niyns sẽn gãe ne bãane, wala rãam sẽn dɩgle t'a rabɩlla tisgi, la b yet b sũurẽ: Soaala pa tõe fɩ, b pa tõe wẽng bɩ neer ye!

¹³ Bɩ b bãng tɩ b arzɛk na n lʋɩɩ fãadb nusẽ, tɩ b rot sẽege; b mee roto la b kõn kẽ ye, b sela bugsuntungu la b kõn yũ b rãam ye.

Soaala raare

¹⁴ Naaba-Wẽnd sũ-puura raar kolgame, a wata ne yãgbo. Daara na n yɩɩ kelem bag-bag raare, kelem n pa tẽed fãagr daare, kelem ba f ya gãndao-maasre.

¹⁵ Na n yɩɩ sũ-puur daare, namsgo la rigb daare, lika la sawat sabla daare, wulgu, zĩ-boog daare.

¹⁶ Badaare tãb-biisa na n peeba tõntõogo la b na n tãsa b zabr tãsga la b na n taka zabre ne tãnsoben-dotã la b gasda sẽn lug n kul yĩngrã.

¹⁷ M na n kɩtame tɩ yel-beed paam nebã la b na n kẽna wala zoeense tɩ b beega, Soaala-Wẽnnaam. B zɩɩma na n daaga zĩig zãnga wala toma sẽn yɛdg tẽngã, tɩ sẽn ki-ba lob wala sagdo, tɩ b be be n põogdẽ.

¹⁸ Soaala sũ-puura raare ka wanzurf bɩ sãnem n tõe n le fãag ned ye. Tẽnga fãa na n dɩɩ bugum, b sũ-fõora bugum, tɩ bala b na n waa ne yel-beedo, b na n menesa tẽnga kẽedba fãa gilli.