Sõadga 7 - SEBR SÕNGO

Sɛka roog bark ningri

¹ Sɛka roog sẽn ti n sɛ raare, a Moyiiz taag-a-la ne kaam sõngo la a rɩka sẽn be a pʋgẽ wã fãa n kõ Soaala-Wẽnde. A maana boto me ne maan-kugrã ne a teedo.

² A Israyɛl kãsem-dãmb waa ne b kũuni. Kãsem-dãmba yaa sẽn ges b sõadga yelle.

³ B talla b kũuna n wa Soaala-Wẽnd taoore. Yɩɩ bilim-bilm a yoob sẽn ning maasem tɩɩga, la niis piig la a yi n da tat-ba. Kãsem-dãmb a yi waa ne bilim-bilm a ye la kãsem fãa yɩɩ naafo. B kɩtame tɩ b kolg sɛka roogo.

⁴ Naaba-Wẽnd yeela a Moyiiz:

⁵ «Reeg kũuna b sẽn wat ne wã, reeg-ba sɛka roog tʋʋma yĩnga. Bilim-bilma la niisã, Levitsa na n deeg-b lame sɛka rooga tʋʋma yĩnga. Ned kam fãa paam a tʋʋmda sẽn dat t'a paam bũmb ninga.»

⁶ T'a Moyiiz na n deeg bilim-bilm la niisã n kɩs Levitsã.

⁷ Bilim-bilm a yi la niis a naase la a kõ a Gersõ kamba b tʋʋmda yĩnga.

⁸ A Aarõ biig a Merari kamba deega a Itamar nengẽ, b tʋʋmda yĩnga, bilim-bilm a naase la niis a nii.

⁹ A Keyat kamba ka reeg bũmb ye tɩ yaa b bãgdẽ la b ra tog n zɩ te-sõma wã.

Buuda kũuni

¹⁰ Kãsem-dãmba talla kũuna n wa maan-kugra bark ningr daare, a kaam taagr daare. Yɩɩ maan-kugra taoore la b wa ne-ba.

¹¹ La Soaala-Wẽnd yeela a Moyiiz: «Yaa ned kam fãa ne a daare la kãsem-dãmba na n tall b kũuna n wa tɩ b rɩk maan-kugrã n ning Soaala-Wẽnd soolmẽ.»

^12-83 Kãsem-dãmba deega noorã la b pʋga taab woto. Pipi raarã, a Zɩɩda roogẽ, yɩ-la a Aminadab biig a Nasõ. Daar a yiib soaba, a Isakar roogẽ, yɩ-la a Suwar biig a Netanɛl. Daar a tãab soaba, a Zabulõ roogẽ, yɩ-la a Elon biig a Eliyab. Daar a naas soaba, a Rubẽ roogẽ, yɩ-la a Sedewur biig a Elisur. Daar a nu soaba, a Simeõ roogẽ, yɩ-la a Surisadayi biig a Selumiyɛl. Daar a yoob soaba, a Gad roogẽ, yɩ-la a Deowɛl biig a Elyasaf. Daar a yopoe soaba, a Efrayim roogẽ, yɩ-la a Amiyud biig a Elisama. Daar a nii soaba, a Manase roogẽ, yɩ-la a Pedasur biig a Gameliyɛl. Daar a wɛ soaba, a Bẽnzame roogẽ, yɩ-la a Gideoni biig a Abidã. Piig daare, a Dã roogẽ, yɩ-la a Amisadayi biig a Ayiyezɛr. Piig la ye daare, a Asɛr roogẽ, yɩ-la a Okrã biig a Paziyɛl. Piig la a yiib daare, a Neftali roogẽ, yɩ-la a Eyinan biig a Ayira. Ad-b kũuna sẽn yɩ a soaba: Wanzurf yõg-laag zɩslem sẽn ta wakɩ koeems koabg la pis-tã zɩslem, wanzurf ko-laag zɩslem sẽn ta wakɩ koeems pisopoe zɩslem, zɩslema sã magd wala wẽnd doogẽ magbã. Yõg-laaga la ko-laaga ra pida ne zom sẽn nag ne kaam la sẽn na n wa rɩk n tees Soaala-Wẽnde wala b pʋɩɩre. Le paasa sãnem wũmbla zɩslem sẽn ta wakɩ koeems piig zɩslem la sẽn pid ne tɩdare. Le paasa loalga, pe-raoogo la yʋʋmd yɛng pe-bila, yũ-noog maoong yĩnga. Le paasa boɛɛg, yel-wẽnd sugr kosg yĩnga. Laafi kosg maoong yĩnga, b waa ne lols a yi, pe-raad a nu, boees a nu, yʋʋmd yɛng pe-bi a nu.

⁸⁴ Kũuna a Israyɛl kãsem-dãmba sẽn tall n wa b sẽn taag maan-kugra kaam sõnga daare yɩɩ woto: wanzurf yõg-laas piig la a yiibu, wanzurf ko-laase piig la a yiibu, sãnem wũmbli piig la a yiibu.

⁸⁵ Yõg-laag fãa zɩslem taa wakɩ koeems koabg la pis-tã zɩslem, la ko-laag fãa zɩslem taa wakɩ koeems pisopoe zɩslem Te-bãmb fãa zɩslem taa nin-tɩɩg sẽn tõe n tʋke, wakɩ koeems tus a yi la kobs-naase zɩslem, sã n magd wala Soaala-Wẽnd doogẽ magbã.

⁸⁶ Sãnem wũmbli wã sẽn da pid ne tɩdara yɩɩ piig la a yiibu. A ye fãa taa wakɩ koeems piig zɩslem, sã n magd wala wẽnd doogẽ magbã. Bãmb piig la a yiibã zɩslem yaa sãnem wakɩ koeems koabg la pisi zɩslem.

⁸⁷ Yũ-noog maanda rũmsi yɩɩ lols piig la a yiibu, pe-raad piig la a yiibu la yʋʋmd yɛng pe-bi piig la a yiibu. Kũuna taab me n tũnugi. Sugr kosg maanda boees yɩɩ piig la a yiibu.

⁸⁸ Laafi kosg maanda rũmsi yɩɩ lols pisi la a naase, pe-raad pisoobe, boees pisoobe, la yʋʋmd yɛng pe-bi pisoobe. Woto la b sõd neba sẽn kɩse b sẽn taag maan-kugrã kaam n ning-a bark raare.

⁸⁹ A Moyiiz sã n da kẽed sɛka roogẽ, a ra wʋmda Soaala-Wẽnd sẽn gomd ne-a. Koɛɛga ra yita Soaala-Wẽnd sẽn sigd zĩig ningã, kuga walsa koglga linga zugu, malɛgs a yiiba sẽn zaoẽ wã. Be la Soaala ne a Moyiiz ra sõsd ne taaba.