Sõadga 6 - SEBR SÕNGO

Ned sẽn pʋlem a meng Wẽnde

¹ Soaala-Wẽnd yeela a Moyiiz:

² Gom ne Israyɛl kambã n togs-ba: «Pag bɩ rao sã n pʋlem a meng Soaala-Wẽnde,

³ bɩ a bas rãam la toose. Rãam sẽn wẽnemd menga, toos sẽn wẽnemd menga, bɩ a ra sɩɩs ye. A ra wẽk bugsuntung biis koom n yũ ye, a ra wãb a biisa meng sẽn ket n ya maas bɩ sẽn kʋɩ ye.

⁴ Tãag a pʋlenga pidsgu, a kõn dɩ bũmb sẽn maan ne bugsuntung biisi, bɩ a biisa pagd ye.

⁵ Tãag a pʋlenga pidsgu, barg ka sɩɩsd a zug ye. A na n welga toore, Soaala-Wẽnd yĩnga, n tãag a pʋlenga pidsg raare. A zuga zobd basdame tɩ yi.

⁶ Sã n ka a pʋlengã n pids zãnga, a ka tõe n pẽneg kũum ye.

⁷ Ya-la a ba, a ma, a kẽem bɩ a tão n ki, a kõn pẽneg b kũum n rẽgem a meng ye. A welga toor Soaala-Wẽnd yĩnga.

⁸ A sẽn pʋlem a meng Soaala-Wẽnd tɛka, a welga sõmblem welegre, Soaala-Wẽnd yĩnga.

⁹ Kũum sã n ling ned t'a lʋɩ a sɛɛgẽ n wẽneg n be kaalem, a rẽgmame; a wõrsda a zoobdo, a pekr yĩnga, n gũ tɩ dasem a yopoe wa pidi.

¹⁰ Daar a nii soaba a na n waa sɛka roogẽ ne wal a yi bɩ manwal bõones a yi n wa kɩs maan-kʋʋdã,

¹¹ t'a kʋ a ye, yel-wẽnd sugr kosg yĩnga, n kʋ a to wã, yũ-noog maoongo, la a bõsda sẽn pʋlma wã yel-wẽnd yẽesgo, kũuma sẽn ki a sɛɛgẽ n dẽgem-a wã yĩnga. Badaare, a lebd n pʋlmame tɩ barg kõn sɩɩs a zoobd ye.

¹² A lebd n pʋlma a meng Soaala-Wẽnd wala a sẽn da yals pipi raarã, la a wata ne yʋʋmd yɛng pe-bila, yel-wẽnd dolb maoong yĩnga. Pʋlenga sẽn sãama, dɩll a le maneg n sɩng zãnga.»

¹³ Sẽn pʋlma a meng Wẽndã na n waa sɛka roog noore, a pʋlenga rasma sõor sã n pidi.

¹⁴ A wata ne kũuni n wa kõ Soaala-Wẽnde: yʋʋmd yɛng pe-bil sẽn ka tar bãnde. Dẽ yaa yũ-noog maoong yĩnga. N paas yʋʋm yɛng pe-sɛdg sẽn ka tar bãnde, dẽ yaa yel-wẽnd dolbo maoong yĩnga. A le wata ne pe-raoog sẽn ka tar bãnde, laafi kosg yĩnga.

¹⁵ A wata ne peoog sẽn pid ne bur sẽn ka lob bɩlle, bur sẽn wẽ ne alkam zom pɛɛlga, ne miisdu sẽn ya tagdo, la miisd sẽn ya faase, n ka ning bɩlle, n paas kaama la rãama b sẽn tog n tũnugã.

¹⁶ Maan-kʋʋda taasd-b-la Soaala-Wẽnd taoore n maan sugr kosg la yũ-noog maando.

¹⁷ Maan-kʋʋda kodgda pe-raooga laafi kosg yĩnga; a paasda bur peoogo, bur sẽn ka ning bɩlle. A kõta Soaala-Wẽnd kaama la rãama a sẽn tog n tũnugã.

¹⁸ Sẽn pʋlma a meng Wẽndã põngda a zuga sɛka roog noore, n wʋk zoobdã n lob laafi kosga maoonga bugmẽ.

¹⁹ Pesga bãok sã n bɩ, maan-kʋʋda yãkd-a lame n paas peooga pʋg bur a ye sẽn ka lob bɩlle la miisg faasg a ye sẽn ka lob bɩlle la a sagend-b-la pʋlemda nugẽ, a zuga sã n põnge.

²⁰ Maan-kʋʋda maanda a sẽn tog n maane tɩ b lebg Wẽnd rũuni. Bũmb me sẽn lebgd kũun sõng maan-kʋʋda yĩnga, yaa rũnga yãoogo a sẽn dɩk tees Wẽndã la gerã a sẽn yãkã. Ya rẽ poore marsã la sẽn pʋlma meng Wẽndã tõogd n le yũ rãam.

²¹ Woto la Soaala-Wẽnd noor b sẽn kõ ned sẽn pʋlem a meng poorẽ. Woto me la kũun niyns a sẽn tog n wa ne la ka yet t'a ka tõe n paas bũmb a to ye. Sẽn maana pʋlenga modg n tũ a meng sẽn yalse.

Bark ningri

²² Soaala-Wẽnd yeela a Moyiiz:

²³ «Wilg a Aarõ ne a kamba b sẽn tog n ning a Israyɛl bark to-to. B yeel woto:

²⁴ Bɩ Wẽnd ning-f bark la a gũ fu!

²⁵ Bɩ Wẽnd kõ-f laafi la b sudg foom b kũuna!

²⁶ Bɩ Wẽnd seg-f ne zoodo la b kõ-f f laafi!

²⁷ Yaa woto la b na n ning m yʋʋra sʋka tɩ m ning-b barka.»