Sõadga 5 - SEBR SÕNGO

Kisgu tẽegre

¹ Naaba-Wẽnd yeela a Moyiiz:

² «Kõ Israyɛl kamba noore tɩ b yiis sikẽ wã ned ning fãa sẽn bẽed yĩng bãag sẽn dẽgemd-a, sẽn zĩ-a ne a yĩng rẽgdẽ bɩ sẽn sɩɩs-a kũum.

³ B yaa pagb bɩ rapa, yiis-b sikẽ wã; la woto b kõn dẽgem a Israyɛl kamba sika, tɩ m me naag n be-la a pʋgẽ.»

⁴ A Israyɛl kamb deega noore. B riga nin-bãmb n yiisi, wala Soaala-Wẽnd sẽn da togs a Moyiiz.

Yel-wẽnd sɩbgre

⁵ Soaala-Wẽnd yeela a Moyiiz:

⁶ «Yeel Israyɛl kamba woto: ‹Pag bɩ rao sã n tõdg Soaala noore n maan sẽn kisi, n bõn a to, a bãng tɩ yell n be a zugu.

⁷ B wat n togsa b kongrã. Sẽn bõna a to wã lebsda a sẽn dɩka gilli n le paas b sẽn saagd bũmba ligda pʋɩɩr a nu soaba.

⁸ B sẽn bõn a soaba kiime la a roagd ka sẽn na n deeg a sẽn tog n deega ye, yaa Soaala-Wẽnd la b lebsda, dat n yeelame tɩ yaa maan-kʋʋda la b lebsda. La b leb n paasda pe-raoogo sẽn na n kʋ yel-wẽnd dolb yĩnga, sẽn na n kʋ beegda sugr paoong yĩnga.

⁹ Israyɛl kambã n so pʋɩɩr ning b sẽn dɩk n kõ Soaala-Wẽnde.

¹⁰ Bõn-sõma wã fãa sẽn dɩk n kõ Soaala-Wẽnd yaa maan-kʋʋda n so.› »

Rõadg yelle

¹¹ Naaba-Wẽnd yeela a Moyiiz:

¹² «Gom ne Israyɛl kambã n wilg-b woto: Ned tõeeme n wa tags t'a pag ka vɩ neere, t'a maanda yoobo,

¹³ n wa tags t'a yoodame t'a sɩda ka miẽ ye, tɩ neda to me ka miẽ ye, tɩ ned zɩɩ n ling-a yoob pʋgẽ ye.

¹⁴ Baasgo sɩda tagsdame t'a yaa pʋg-yoaada. Yaool n tõeeme me tɩ paga ka pʋg-yoaad ye.

¹⁵ Sɩda na n talla a pagã n ta maan-kʋʋd taoore ne kũun ninga a sẽn tog n wa ne. Yaa alkam kɛgeng zom wamd pogbre. Zoma ka naagd ne kaam ye, la tɩdar me ka paasd ye, tɩ yaa bãong lukr kũuni.

¹⁶ Maan-kʋʋda kɩtdame tɩ b wa ne paga Soaala-Wẽnd taoore.

¹⁷ Maan-kʋʋda ningda ko-sõng tãnd laagẽ la a yõngda sɛka roog tom n yugl-a.

¹⁸ Maan-kʋʋda kɩtdame tɩ paga kolg t'a lodg a zug peende. Paga yaagda a nus t'a sagl zom wamdã, bãn-lukr kũuna. Dẽ tɩ maan-kʋʋda meng zãada a nugẽ kãab beed koom, ko-tɩɩsenga.

¹⁹ A na n kosa pagã t'a naag yẽ n wẽen n togs a sẽn togsdã la a yetame: ‹Sã n yaa sɩda tɩ f ka yo ne raoa, sã n yaa sɩda tɩ f talla f meng neere, tɩ f ka zãmb f sɩda n faool f menga, bɩ kãab beeda koom da maan f bũmb ye.

²⁰ La sã yaa sɩda tɩ f maana wẽng ne rao a to n faool f menga, sã n yaa sɩd tɩ f kẽ ne raoa to,

²¹ bɩ Soaala wa ne f sɩbgre. Bɩ Soaala sɛɛs f rogem la f kẽn ne pʋ-wuka. Bɩ b kɩt tɩ f buuda neb wa tẽegd fo yelle b sã n wa kãabd b mens beedo.

²² Bɩ ko-kãnga sẽn ya kãab beed kooma sig f yãadẽ n wuk f pʋga la a sɛɛs f rogem.› La paga na n leokame: ‹Ami, ami! Bɩ sɩd yɩ boto!›

²³ Maan-kʋʋda na n gʋlsa a kãab beeda sebr zugu la a na n losa sebra koomẽ tɩ kooma yẽes gʋlsma.

²⁴ A ka na n yãg n kɩt tɩ paga yũ kãab beed kooma ye.

²⁵ Maan-kʋʋda rengdame n deeg paga nugẽ bãn-lukr kũuna n tees Soaala-Wẽnd wala a sẽn tog n maane la a rɩgl-a maan-kugra zugu.

²⁶ Maan-kʋʋda na n yõnga zoma nug koore wala Soaala-Wẽnd pʋ-tẽer nekr bũmbu la a na n yõog-a-la maan-kugra zugu. Dẽ poore, a kõta paga koom t'a yũ.

²⁷ Paga yũuda kooma la sã n mik t'a dẽgmame, t'a sɩd yõka rao a to nugu, kãab beed kooma na n kẽ-la a pʋgẽ n lebg tɩɩsga t'a pʋg wuki, t'a rogem sɛ. Paga na n lebga a buuda sʋka wa Soaala-Wẽnd sẽn yãk a soab barka.

²⁸ Sã n mikame tɩ paga ka yaale, a ka sãam ye, taal yi-la a zugu la a na yɩ roagda.»

²⁹ Ya noor a woto la Soaala-Wẽnd yiis yã, pag bɩ a sɩd poorẽ. B sã n wa yet tɩ b tara kaset tɩ paga yoodame n paoogd a sɩda,

³⁰ bɩ sã n yaa a sɩdã n maand sãmbse t'a yoodame. Wakat kãnga sɩda tallda pagã n wa Soaala-Wẽnd taoore, tɩ maan-kʋʋda maan wa b sẽn wilgã.

³¹ Dẽ poore, bãonga sã n luki, yell ka le be sɩda zug ye. Pagã n deegd a sɩbgre a sã n sɩd kongame.