Sõadga 33 - SEBR SÕNGO

Israyɛl sẽn yals tẽns niynsi

¹ Ad tẽns niyns a Israyɛl kamba sẽn tɩ kẽ b sẽn yi Ezipt tẽnga ne b tãb-biisi t'a Moyiiz ne a Aarõ be b taoore.

² A Moyiiz rɩka b sẽn yals tẽng ning fãa yʋʋre, a sã n wa yit be ne Soaala-Wẽnd noor n na n looge. Tẽn-bãmb la woto:

³ B yii Ramsɛs pipi kiuugã, kiuuga piig la a nu raare. Pak yɩ tɩ zaamẽ, la Israyɛl kamba paam sore n loog b loogre, Ezipt rãmba nifẽ,

⁴ Ezipt rãmba ra mumda b pagba pipi biig woo sẽn ki. Soaala-Wẽnd n da wa ne b kũum. B kʋ-b lame n dok b sũuri ne Ezipt wẽn-yaalsã.

⁵ Israyɛl kamba yii Ramsɛs n tɩ yals Sukot.

⁶ N yi be n tɩ yals Etam, we-raooga sɩngrẽ,

⁷ n lɛɛg n wa Pi-Ayirot sẽn tot ne Baal-Sefõ, n wẽ b sik Migdol.

⁸ B yii Ayirot n dʋʋg mogrã n ta zĩ-peen-daagẽ. B kẽna Etam zĩ-peen-daagẽ wã ra-yɩten-daare, n wa wẽ b sik Mara.

⁹ B sẽn yi Mara b taa Elim n yãend buls piig la a yi la koms tɩɩs pisopoe, tɩ b wẽ b sika be.

¹⁰ B yii Elim n wa yals Rudum Mogre.

¹¹ N yi be n wa yals Sin zĩ-peen-daagẽ.

¹² B yii be n wa yals Dofka.

¹³ B sẽn yi Dofka b waa n yalsa Alus.

¹⁴ N yi Alus n wa yals Refidim, la be b pa paam koom n yũ ye.

¹⁵ B yii Refidim n wa wẽ b sik Sinayi.

¹⁶ B yii be n wa yals Kibrot-Taava.

¹⁷ N yi be n wa yals Aserot.

¹⁸ N yi be n wa yals Ritma.

¹⁹ N yi Ritma n wa Rimon-Perɛk.

²⁰ B yii Rimon-Perɛk n wa Libna.

²¹ N yi be n wa Risa.

²² B yii Risa n wa Keelata.

²³ N yi Keelata n dʋ Sefɛr tãnga.

²⁴ B yii be n wa Arada.

²⁵ N yi be n wa Makelot.

²⁶ N yi be n wa Taat.

²⁷ N yi Taat n wa Tera.

²⁸ N yi Tera n wa Mitka.

²⁹ N yi be n wa Asmona.

³⁰ N yi be n wa Moserot.

³¹ N yi be n wa Bene-Yakã.

³² N yi be n wa Or-Gidgad.

³³ N yi be n wa Zotbata.

³⁴ N yi be n wa Abrona.

³⁵ N yi be n wa Esiõ-Gebɛr.

³⁶ N yi be n wa Sin zĩ-peen-daagẽ, n wa Kadɛs

³⁷ N yi be n wa Or Tãnga, Edom dãmb toaagẽ.

³⁸ Wẽnd kõo maan-kʋʋd a Aarõ noor t'a rʋ Or Tãnga la yaa be la a maan kaalem. Da yaa yʋʋm pis-naase la Israyɛl kamba ra yi Ezipt tẽnga. Yɩɩ kiuug a nu soaba pipi raare.

³⁹ A Aarõ sẽn waa n ki Or Tãnga t'a yʋʋm yaa koabg la pisi la a tã.

⁴⁰ Sasa kãnga la Arad dĩma sẽn da kẽed Negɛb, wʋm Israyɛl kamba waoongo.

⁴¹ Israyɛl kamba yii Or Tãnga n wa Salmona.

⁴² N yi be n wa Ypmo.

⁴³ N yi be n wa Obot.

⁴⁴ N yi be n wa Iye-Abarim, Moab rãmb toaagẽ.

⁴⁵ B yii be n wa Dibõ-Gad.

⁴⁶ B yii be n wa Almon-Diblatayim.

⁴⁷ N yi be n wa Abarim tãmsẽ, be tota Nebo tãnga.

⁴⁸ B siga Abarim tãmse n wa Moab pʋ-weesẽ, Zʋrdẽ kʋɩlg noore, Zeriko yegende.

⁴⁹ B wẽ b sik Zʋrdẽ noore, Bɛt-Yesimot la Abɛl-Sitim tẽnsʋka.

Kãabg tẽnga sẽn na n pʋɩ to-to

⁵⁰ Soaala-Wẽnd goma woto ne a Moyiiz Moab pʋ-weesẽ, Zʋrdẽ kʋɩlg noor, Zeriko yegende:

⁵¹ «Togs Israyɛl kamba: y sã n wa rʋʋg Zʋrdẽ n digd Kanaã tẽnga,

⁵² bɩ y menes y taoore tẽnga rãmb fãa, n menes b sẽn pees ne kuga, b sẽn dõog ne zũudu, n sãam zĩis niyns b sẽn dʋ n me b maan-kugã.

⁵³ Yãmb na n deega tẽngã n sooge tɩ m dɩk-a lame n kõ yãmb tɩ y sooge.

⁵⁴ Y na n poeesame n pʋɩ tẽngã, sak-saka. Saka neb sã n ya wʋsgo, a tẽn-peelma me na n yɩɩ wʋsgo; saka sã n ya bilfu a soolma me zemsdame bala. Ned kam fãa paada poeera sẽn kẽes-a; ned kam fãa paada a buuda pʋɩɩrẽ.

⁵⁵ Y sã n pa menes tẽnga rãmb fãa y taoore, bãng-y tɩ y sẽn na n kees b rãmbã na n lebga gõos n leo y nini, n lebg gõos n po y lʋga. Bãmb n na n tak zabr ne yãmb beoog sẽn vẽege y meng tẽngẽ.

⁵⁶ La yãmb n na n deeg sɩbgr ning m sẽn da rat n sɩbg bã.»