Sõadga 31 - SEBR SÕNGO

Zab-sõng ne Madiã rãmba

¹ Soaala-Wẽnd yeela a Moyiiz:

² «Rok Israyɛl kamba sũuri ne b bɛɛba, ne Madianitsã. Dẽ poore f na loog n tɩ sak f saam-dãmba,»

³ Dẽ me la a Moyiiz yeel zãma wã: «Bɩ yãmb neb kẽer bob zabre. B tak zabr ne a Madiã n dok Soaala-Wẽnd sũuri.

⁴ A Israyɛl sak fãa pʋgẽ, yaa neb tusr n na n bob zabre.»

⁵ Woto wã b yãka tãb-biis tusr sak fãa pʋgẽ. Yaa tus piig la a yiibu n bob zabre.

⁶ A Moyiiz yiisa tãb-biis tusr sak fãa pʋgẽ n tʋm-b zabre, bãmb ne maan-kʋʋd a Elazar biig, a Pinas. Yẽ n da zãad a nusẽ, sɛka roog teed kẽere la tõntõodã sẽn peebd kẽn la yalsg wakatã.

⁷ B boba zabr ne a Madiã wala Soaala-Wẽnd sẽn da wilg a Moyiiz la b kʋʋ Madiã tãb-biisa fãa.

⁸ B naaga Madianitsa dĩm dãmb n kʋ: a Evi, a Rekem, a Sur, a Ur la a Reva. Bãmb la Madiã dĩm dãmb a nu wã. B kʋʋ ne sʋʋga a Beor biig a Balaam.

⁹ Israyɛl kamba yõga Madiã pagba ne b kamba n sui roogo. B looga ne b rũmsa gilli, b looga ne b laogo.

¹⁰ B yõoga Madianitsa tẽns fãa la b pʋt-rot fãa bugum.

¹¹ B looga ne b laoga fãa, ne neba la rũmsã b sẽn yõgã.

¹² B waa ne pagba la kamba, ne rũmsã la b sẽn wʋka fãa. B waa ne-ba a Moyiiz taoore, maan-kʋʋd a Elazar la zãma wã fãa taoore. Yaa a Moab pʋ-weesẽ, Zʋrdẽ kʋɩlg noore, Zeriko yegende la b tall fãa n kuli.

¹³ A Moyiiz ne a Elazar la buuda kãsem dãmba yi sikã n seg-ba.

¹⁴ A Moyiiz sũur puuga ne tãb-biisa taoor dãmba, ne neb tusr tãnsoaben-dãmba, ne neb koabg tãnsoaben-dãmba, b sẽn yi zabrã n wa.

¹⁵ A yeel-b lame: «Yaa bõe tɩ y bas pagba vɩɩse n pa kʋ-ba?

¹⁶ Yaool n yaa bãmb n kelg a Balaam saglgo n yik n tus Israyɛl kamba tɩ b tõdg Soaala-Wẽnd, Peor wɩbda wakat, tɩ tẽn-kũum na n loog ne-bã.

¹⁷ Dẽ yĩngã, kʋ-y bi-ribl fãa, kʋ-y pag fãa sẽn mi raoa.

¹⁸ Y sẽn na n kees y yĩnga, y sẽn na n bas vɩɩse, yaa kom-pugli niyns sẽn ka mi b rapa.

¹⁹ Yãmb mens na n paa sika kudgẽ rasem a yopoe. Neb niyns fãa sẽn kʋ, neb niyns fãa sẽn sɩɩs kũum, y na yɩlg y mens ra-yɩta la a yopoe raare. Pagb nins y sẽn pag rooga me na n yɩlga boto.

²⁰ Y na n pegsa y futu, y gãndo, bũmb ning fãa sẽn maan ne bʋ-kõbdo, sẽn pees ne raoogo.»

²¹ Maan-kʋʋd a Elazar yeela tãb-biisa sẽn tɩ zab-bã: «Ad noy-niyns Soaala-Wẽnd sẽn kõ a Moyiiz:

²² Sãnem, wanzurfu, zũudu, kutu, waasdo la namdo yaa bũmb sẽn tõe n los bugmẽ.

²³ Dɩlla yaa bãmb la y tõe n los bugmẽ tɩ b yɩlge. Tõe n yɩlga ne ko-sõng me. Sẽn ka tõe n yɩlg ne bugum fãa pekda ne koom.

²⁴ Y pegsda y fut daar a yopoe soaba n lebg yɩlma. Dẽ poor marsã y tõe n kẽe y sikẽ.»

Laoga pʋɩɩre

²⁵ Soaala-Wẽnd yeela a Moyiiz:

²⁶ «Foo ne maan-kʋʋd a Elazar la kãsem-dãmba, sõd-y y sẽn paame, ninsaalba wala rũmsi.

²⁷ Pʋɩɩra na n pʋɩɩme tɩ sẽn kẽng-b zabrã la sẽn ka kẽng-b zabrã paam bũmbu.

²⁸ Y na reeg yaood Wẽnd yĩnga tãb-biisa pʋɩɩrẽ: ned a ye neb kobs-nu zugu, rũng a ye, rũms kobs-nu zugu, sã n ya niisi, bõeense la rũm-bõonese.

²⁹ Yaa tãb-biisa pʋɩɩrẽ la b na n yãke la b na n dɩk-b lame n kɩs maan-kʋʋd a Elazar wala Wẽnd pʋɩɩr.

³⁰ F na n kẽe neb a taaba pʋɩɩrẽ n yãk n kõ Levitsa sẽn tʋmd Soaala sɛka roogẽ: ned a ye, neb pis-nu zugu, rũng a ye rũms pis-nu zugu, rũmb bɛd wala rũm-bõonese.»

³¹ A Moyiiz ne maan-kʋʋd a Elazar maana wa Wẽnd sẽn wilg-ba.

³² Sẽn bob-b zabrã lɛɛg n wa ne rũmsi b sẽn paam n yõge, la rũmsa sẽn kell sõor la woto: rũm-bõonese wa piis la bʋʋse, tus kobs-yoob la pisopoe la a nu. (675 000)

³³ Rũm-bɛda, niisa yaa tus pisopoe la a yi (72 000)

³⁴ Bõeensa yaa tus pisoob la a ye. (61 000)

³⁵ Sã n ya ne kom-pugli sẽn ka mi b rapã, yaa bãmb tus pis-tã la a yi. (32 000)

³⁶ Tãb-biisa reega rũm-bõonese, piis la bʋʋse tus kobs-tã la pis-tã la a yopoe la kobs-nu. (337 500)

³⁷ La b kẽe be n yãk Soaala pʋɩɩre: kobs-yoob la pisopoe la a nu.

³⁸ Tãb-biisa le reega niis tus pis-tã la a yoobe; sẽn yãk Soaala-Wẽnd yĩnga yaa niis pisopoe la a yiibu.

³⁹ B reega bõeens tus pis-tã la kobs-nu. (30 500) Sẽn yãk Soaala-Wẽnd yĩnga yaa bõeens pisoob la a ye.

⁴⁰ B reega ninsaalb tus piig la a yoobe; sẽn yãk Soaala-Wẽnd yĩng yaa neb pis-tã la a yiibu.

⁴¹ Sẽn yãk Wẽnd yĩngã, a Moyiiz reega fãa n kɩs a Elazar wala Wẽnd sẽn da kõ a noore.

⁴² A Moyiiz sẽn kees Israyɛl kamb a taaba yĩnga ta-la a sẽn yãk n pʋɩ sẽn bob-b zabrã.

⁴³ Dẽnda bãmb me reega piis la bʋʋs tus kobs-tã la pis-tã la a yopoe la kobs-nu. (337 500)

⁴⁴ Niis yɩɩ tus pis-tã la a yoobe,

⁴⁵ bõeens tus pis-tã la kobs-nu,

⁴⁶ ninsaalb tus piig la a yoobe.

⁴⁷ A Moyiiz kẽe sẽn yãk n kõ Israyɛl kamba pʋga n le wãdg nin-yend neb pis-nu zugu, rũng a ye rũms pis-nu zugu n kõ Levitsa sẽn tʋmd sɛka roogẽ. Rẽ tũu wala b sẽn da wilg a Moyiiz.

⁴⁸ Sẽn lʋɩ-b tãb-biisa taoore n ya neb tusr bɩ neb koabg tãnsoaben-dãmba kolga a Moyiiz

⁴⁹ n yeel-a: «Y yemsa sõda b tãb-biisa fãa la ned ba a ye ka pa zabrẽ ye.

⁵⁰ Yaa rẽ yĩng la d wat Wẽnd taoore tɩ maan-kʋʋdba reeg d kũuna n tees Wẽnd la b kos-b tɩ b bas b kamba beegr fãa taale. Yaa rẽ la d wat ne d sẽn dees bɛɛba nengẽ sãnem teedo: zũya, kagse, nug-bĩnsi, tʋb-londo, te bobdi.»

⁵¹ A Moyiiz ne maan-kʋʋd a Elazar reega b sãnema kũuna. Da yaa teed sẽn maneg n dõoge.

⁵² Sãnema sẽn deeg Soaala-Wẽnd yĩnga taa neb a nii zɩɩbo; yaa sẽn lʋɩ-b tãb-biisa taoore n ya neb tusr bɩ koabg tãnsoaben-dãmba n wa ne kũun kãense.

⁵³ Tãb-biig fãa ra zɛ a sẽn paame la a ra zɛ a meng yĩnga.

⁵⁴ A Moyiiz ne maan-kʋʋd a Elazar n deeg b kũuna. B tall-b lame wa sɛka roogẽ la b paa be n na n yɩ Wẽnd pʋ-tẽer nekr bũmbu.