Sõadga 30 - SEBR SÕNGO

¹ A Moyiiz taasa Israyɛl kambã, Soaala-Wẽnd sẽn yeel-a t'a wilg-b bũmb ning fãa.

Pag pʋlengo

² A Moyiiz yeela Israyɛl kãsem-dãmba:

³ «Rao sã n pʋlem Soaala-Wẽnde, bɩ a sã n wẽene t'a na maan woto la woto, a modg n tũ a noor sẽn yiis bũmb ninga.

⁴ Bi-pugl yʋʋm sẽn nan ka sɩlge la a ket a ba zakẽ, sã n pʋlem Soaala-Wẽnde bɩ a sã n wẽen t'a na maan woto la woto,

⁵ t'a ba wã yaool n wa wʋm marsã t'a pʋlmame bɩ a wẽename t'a na maan woto la woto, la a ka yeel-a tɩ bũmb ye, bi-pugla pʋleng yɛsame, a tog n pidsa a pʋlengo.

⁶ La a ba wã sã n yeel, a sẽn bãng pʋlenga raare, t'a ka sake, bi-pugla sẽn pʋlem bũmb ninga, a sẽn wẽen t'a na man bũmb ninga lebga bõn-faoogo. Soaala-Wẽnd kõn ning-a taal ye t'a ba wã ka sak ye.

⁷ Sã n mikame tɩ pag sẽn waa n kẽ kãadem wakato, a ra zoe n loe-la a meng ne pʋlengo bɩ ne wẽenego sẽn yi a noorẽ,

⁸ la a sɩda sẽn waa n bãng raare, a ka yeel tɩ bũmb ye, paga tog n kell n pidsa a noora gomde; a pʋlenga yɛsame.

⁹ La a sɩda sẽn waa n bãng raare n yeel tɩ rẽ pa tõe ye, paga me bãng t'a sẽn pʋlem bũmb ningã, a sẽn wẽen t'a na n maana woto la woto wã lebga bõn-faoogo la Soaala-Wẽnd taoore taal yi-la a zugu.

¹⁰ Paga sã n ya pʋg-kõore, bɩ a sɩd n yiis-a, a sẽn pʋlem bũmb ning fãa yɛsame.

¹¹ Sã n yaa a sɩd zakẽ la paga pʋlem Soaala-Wẽnde, la a sɩd zakẽ la a wẽen t'a na n maana woto la woto,

¹² t'a sɩda wa bãng n yaool n ka yeel-a tɩ bũmb ye, n ka yeel-a tɩ rẽ pa tõe ye, a pʋlenga yɛsame, a tog n kell n pidsa a noor gomde.

¹³ La sɩda sẽn bãng raare n yeel t'a pa sake, paga pʋlenga lebga bõn-faoogo, a sɩda sẽn pa saka yĩnga, Wẽnd taoore taal yi-la a zugu.

¹⁴ Sẽn ya wẽeneg ninga, sẽn ya pʋleng ning la pag pʋlem yã n yet t'a na n loe-la a noore, a sɩda sẽn yeel n yɛse.

¹⁵ A sɩda sã n ka yeel-a tɩ bũmb tɩ beoog vẽege, a tog n pidsa a sẽn yiis a noorẽ. Sɩda rata pʋlenga pidsgu la a ka yeel tɩ bũmbu, a sẽn bãng raara tɛka.

¹⁶ A sã n kaoos n yaool n wa wilg paga t'a ka sake, taala fãa bee sɩda zugu.»

¹⁷ Woto la noy niyns Soaala-Wẽnd sẽn taas a Moyiiz, pag ne a sɩd poorẽ, ba ne a bi-pugl poorẽ, a bi-pugl sẽn ket n be a zakẽ.