Sõadga 3 - SEBR SÕNGO

A Levi kamba tʋʋmde

¹ Ad-a Aarõ ne a Moyiiz kamba la b yagense, Soaala-Wẽnd sẽn waa n gomd wakat ning Sinayi tãnga zugu.

² A Aarõ kamba yʋy la woto: bi-kẽenga la a Nadab, t'a Abiyu, a Elazar la Itamar pʋgda.

³ Bãmb n yɩ a Aarõ kamba; b taag-b-la kaam sõngo tɩ b reeg maan-kʋʋr naam, Soaala-Wẽnd taoore.

⁴ Sã n yaa a Nadab ne a Abiyu, bãmb kii Soaala-Wẽnd taoore la rẽ yaa b sẽn saag n yõog wisdu b sẽn da ka kõ-b sor tɩ b yõoge. B kii Sinayi zĩ-peen-daagẽ; b ka rog kamb ye. Yaa a Elazar la a Itamar n da tʋmd maan-kʋʋr tʋʋmd b ba a Aarõ sɛɛgẽ.

⁵ Naaba-Wẽnd yeela a Moyiiz:

⁶ «Bool a Levi rooga t'a wa reeg tʋʋmde maan-kʋʋd, a Aarõ, nengẽ. Bãmb n na n sõng-a.

⁷ B na n pẽnega sɛka roogo n tʋm a tʋʋma n sõng a Aarõ ne rooga gilli.

⁸ Bãmb n na n ges sɛka roog teeda yelle, bãmb n na n deeg Israyɛl kamba zĩig n tʋm tʋʋm niyns sẽn tʋmd a pʋgẽ.

⁹ Woto wã, f na n dɩka Levitsa n kõ a Aarõ ne a kamba, Wẽnd waoogr tʋʋma yĩnga.

¹⁰ Da tol n kees tʋʋmd sɛka roogẽ sak a to yĩng ye. A Aarõ ne a kambã n na n soog maan-kʋʋr naam. Nin-zaalg da saag n kolg n wa bao a yõor yãkr ye.»

¹¹ Soaala-Wẽnd yeela a Moyiiz yɛsa:

¹² «Mam meng m toore n tũus Levitsa Israyɛl kamba sʋka. B lebga m soolem tɩ bãmb la m deeg yã wala a Israyɛl bi-rẽenga.

¹³ Bi-rẽeng fãa yaa mam soolem. M sẽn kʋ Ezipt kom-dẽemsa raare, m dɩka Israyɛl kom-dẽemsã n kõ m menga. Ninsaal bi-rẽenga, rũng bi-rẽenga, maam n so. Maam la Naaba-Wẽnde.»

Levitsa sõadga

¹⁴ Soaala-Wẽnd yeela a Moyiiz Sinayi zĩ-peen-daagẽ:

¹⁵ «Sõd a Levi kamba, zak-zaka, roog-roogo. Sõd bi-ribl fãa sẽn ta kiuugu.»

¹⁶ A Moyiiz maana Levitsa sõadg wala Soaala-Wẽnd sẽn da kõ-a noore.

¹⁷ Ad-b sẽn sõd b rãmba wa Levitse: a Gersõ, a Keyat, a Merari.

¹⁸ Ad-a Gersõ roogo la a kamba: a Libni, a Simeyi.

¹⁹ A Keyat roogo: a Amram, a Yisear, a Ebrõ la a Uziyɛl.

²⁰ A Merari roogo: a Mali la a Musi. Woto n yɩ a Levi kamba b sẽn sõd roog-roogo.

²¹ B welga a Gersõ yagensa sags a yiibu: a Libni sak, la a Simeyi saka.

²² Sõadga wakato b sõda kom-dibli sẽn ta kiuugu la sẽn yɩɩd rẽnna; b paama tus a yopoe la kobs-nu.

²³ A Gersõ yagens da tida b zak sɛka roog kudga, n tees nin-taoore.

²⁴ A Layɛl biig a Elyasaf n da ya kãsma.

²⁵ Ad-b sẽn da get bũmb ning sɛka roogẽ: yaa rooga menga, a pɛɛla sẽn na n lud-a, rignoora peen-lillã.

²⁶ B le geta zaka pɛɛla la zaka rignoora peendã, zak ning sẽn gũbg rooga la maan-kugrã, n paas wĩ wã sẽn na n tall n ti roogã.

²⁷ A Keyat yagensã, b welga bãmb sags a naase: a Amram la a Yisear kamba, a Ebrõ la Uziyɛl kamba.

²⁸ B sõda kom-dibli sẽn ta kiuugu la sẽn yɩɩd rẽnna la b paama tus a nii la kobs-yoobe. Bãmb n na n ges sɛk roog lagdã, te-sõma wã.

²⁹ A Keyat yagensa ra ti-la b rot sɛka rooga nug rɩtgo.

³⁰ Bãmb kãsem da yaa a Uziyɛl biig a Elisafã.

³¹ Bãmb tʋʋmd sɛka roogẽ: b ra geta kuga walsa koglgo, te-roagendgã, sãnem fitil kãsengã, yũ-noog maan-kugrã, tɩdara maan-kugri la b sẽn tar bũmb ning fãa tʋʋmd, Soaala-Wẽnd waoogra ro-sõngẽ. Sẽn le paas yɛsa yaa sɛka rooga peen-lillã. Bãmb n da get rẽ fãa yelle.

³² B fãa gill kãsem la a Elazar, a Aarõ biiga. Yẽ n da get neb niyns fãa sẽn tʋmd b Soaala-Wẽnd waoogra ro-sõngẽ.

³³ A Merari yagense: a Mali la a Musi kamba.

³⁴ B sõda kom-dibli sẽn ta kiuugu la sẽn yɩɩd rẽ la b paama tus a yoob la kobs-yi.

³⁵ Bãmb kãsem da yaa a Abiayil biig, a Suriyɛl. A Merari yagensa da ti b rot sɛka roog nug goabga.

³⁶ Bãmb tʋʋmda ra geta raad niyns sẽn tar n tiid sɛka roogo, a ra-lugsã, a ra paadsã, ra gilsã, b te-sendsã la bũmb niyns fãa sẽn tar n tiid roogã.

³⁷ Le paasa zaka ra-lug gilsã ne b te-sendsã la biili wã ne wĩ wã.

³⁸ Yaa a Moyiiz, a Aarõ ne a kambã n da ti sɛka roog noore, yaang sẽnẽ. Bãmb n da tʋmd Soaala-Wẽnd waoogr ro-sõngẽ, buuda zĩigẽ. Nin-zaalg sã n da saag n ges te-bãmb yelle n yaool n ka maan-kʋʋda, b kʋʋd-a lame.

³⁹ Levitsa kamb sẽn ta kiuug bɩ yɩɩd rẽnna n ya rapa, ad-y b sõora yɩɩ tus pisi la a yiibu. A Moyiiz ne a Aarõ n da maan sõadgã, sak-saka, roog-roogo, wala Soaala-Wẽnd sẽn da kõ-a noore.

Wẽnd pʋɩɩre

⁴⁰ Naaba-Wẽnd yeela a Moyiiz: «Sõd la f gʋls Israyɛl bi-rẽeng fãa sẽn ya raoa la sẽn ta kiuugu.

⁴¹ Levitsa na n yɩɩ mam soolem, maam, Naaba-Wẽnde. A Levi kamba n na n deeg a Israyɛl kom-dẽemsa zĩigẽ, wala b rũmsa kom-dẽems sẽn na n deeg Israyɛl rũmsa kom-dẽemsa zĩigẽ.»

⁴² Wala Soaala-Wẽnd sẽn kose, a Moyiiz sõda Israyɛl kom-dẽemsa fãa.

⁴³ B sẽn sõd kom-dibli sẽn ta kiuugu la sẽn ya b ma pipi kamba, b paama tus pisi la a yi la kobs-yi la pisopoe la a tã. (22 273)

⁴⁴ Soaala-Wẽnd yeela a Moyiiz:

⁴⁵ «Deeg Levitsã a Israyɛl kom-dẽemsa zĩigẽ; reeg Levitsa rũm-dẽemsã a Israyɛl rũm-dẽemsa zĩigẽ. Levitsa yaa m soolem tɩ maam la Naaba-Wẽnde.

⁴⁶ Israyɛl kom-dẽemsã kobs-yi la pisopoe la a tã sẽn zʋʋg Levitsa kamba sõorã,

⁴⁷ fo na n deega wakɩ koeems a nu bãmb ned kam fãa yĩnga, la yaa wakɩr ning sẽn dɩt wẽnd doogẽ wã. Wakɩr kãng tekda bõones pisi.

⁴⁸ Ligd kãng kɩta a Aarõ ne a kamba, kamb niyns sõor sẽn zʋʋga yĩnga.»

⁴⁹ A Moyiiz reega kamb niyns sõor sẽn da zʋʋga yĩnga,

⁵⁰ wakɩ koeems sẽn tõe n dɩ wẽnd doogẽ, bãmb tusr la kobs-tã la pisoob la a nu.

⁵¹ A Moyiiz kɩsa ligd kãng a Aarõ ne a kamba wala Soaala-Wẽnd sẽn da kõ a noore.