Sõadga 27 - SEBR SÕNGO

Pagba pʋɩɩre b ba raboogẽ

¹ A Selofead kom-pugli n kolg ne b sokre. A Selofead yaa a Efɛr biiga, a Galaad biiga, a Makir biiga, a Manase biiga; b ra sõta a Zozɛf biig a Manase sakẽ. B yʋy wã: a Mala, a Noa, a Ogla, a Milka la a Tirsa.

² B wa-la a Moyiiz la maan-kʋʋd a Elazar la buuda kãsem-dãmb taoore, sɛka roog noore.

³ B yeela woto: «Tõnd ba maana kaalem zĩ-peen-daagẽ. A ra ka naag ne a Kore neba sẽn yik zabr ne Soaala zĩ-peen-daagẽ wã ye. A ka rɩ ned a to yel-wẽnd taal n ki ye. A yaool n ka rog bi-ribl ye.

⁴ D ba wã yʋʋr tõe n wa kell n menema woto a buudẽ, a sẽn ka rog bi-ribla yĩng bɩ? Kõ tõnd me soolem wala d ba wã saam-biisã.»

⁵ A Moyiiz taasa Naaba-Wẽnd b koɛɛgã.

⁶ La b yeela a Moyiiz:

⁷ «A Selofead kom-pugli wã tara bʋʋm. Dɩlla kõ-b soolem wala b ba wã saam-biisã, kõ-ba b raboog pʋɩɩre.

⁸ La yeel Israyɛl kamba: ‹Rao sã n wa ki n ka bas bi-ribla, a bi-pugl n deegd a raboog pʋɩɩre.

⁹ A sã n pa tar bi-pugla bɩ a ba-biig reeg a pʋɩɩre.

¹⁰ A sã n ka tar ba-biiga, bɩ y kõ a ba wã kẽem dãmb bɩ a yaopa.

¹¹ A ba wã sã n ka tar kẽem, n ka tar yao, ya rogma sẽn wat n pẽ ne ned ning n yɩɩd, a buudẽ wã, n deegd a pʋɩɩre.› La rẽ na n yɩɩ noor y sẽn na n deeg tɩ woto la noor m sẽn kõt a Moyiiz.»

A Zozuwe n na n wa reeg a Moyiiz zĩiga

¹² Wẽnnaam yeela a Moyiiz: «Dʋ Abarim tãnga n ges tẽng ning m sẽn kõt Israyɛl kamba.

¹³ Dẽ poore fo me na loog n tɩ sak f saam-dãmba wala f kẽema, a Aarõ.

¹⁴ Na n yɩɩ boto tɩ Sin zĩ-peen-daagẽ, neba sẽn waa n yik n baood m noorã, fo zãgsame tɩ f kõn wẽ pĩigã n pusg koom tɩ m sõmblema me puk b nifẽ ye.» Gomda zabr ning y sẽn zab ne m koom poorẽ Meriba, Kadɛs pĩisẽ, Sin zĩ-peen-daagẽ.

¹⁵ Dẽ la a Moyiiz yeel Soaala-Wẽnde:

¹⁶ «Bɩ m Soaalã, bɩ m Wẽnd ninga sẽn zãad b yemsa fãa yõorã bao ned n lʋɩɩs buuda taoore,

¹⁷ ned sẽn na n kẽedẽ la a yit bãmb taoore, ned sẽn na n yiisd-b la a kẽesd-b, la woto Wẽnd kamba kõn pa wa piis sẽn ka tar pe-kɩɩm ye.»

¹⁸ Ad Wẽnd sẽn leok a Moyiiz: «Yãk a Nun biig a Zozuwe, yaa ned yam sẽn bɩ. Yẽ zug la f na n tẽeg f nugu, n kõ-a tõogo,

¹⁹ yẽ la f na n tall n kẽng a Elazar la buuda fãa taoore t'a reeg a tʋʋmna b nifẽ.

²⁰ Yãk f pãngã n kõ-a tɩ Israyɛl kamba reeg a noor.

²¹ A na n bʋʋga a Elazar Wẽnd taoore t'a kos-b tɩ b wilg b raabo. La yaa wala Wẽnd sẽn datã la b na tũ, n yit la b kẽedẽ, yẽ ne Israyɛl buuda zãnga.»

²² A Moyiiz maana wala Wẽnd sẽn wilg-a. A yãka a Zozuwe la a tall-a lame n wa a Elazar la buuda fãa taoore.

²³ A tẽega a nus a zugu n kẽes-a a tʋʋmnẽ, wala Wẽnd sẽn da wilg a Moyiiz.