Sõadga 24 - SEBR SÕNGO

¹ A Balaam yãeeme tɩ sẽn noom Soaala-Wẽnde yaa a ning a Israyɛl barka. A ka le nams a meng n maan wa rasem kam n gũ Soaala-Wẽnd leokr ye. A wẽnemda a neng bal n tees we-raoogã.

² A sẽn zẽk a nenga, a Balaam yãenda a Israyɛl sẽn wẽ a sik roog-roogo. Soaala-Wẽnd vẽnega a Balaam

³ t'a na n gom a bãngr goama: Woto la a Beor biig, a Balaam, koɛɛga, bãngd ninga sẽn ne yɩɩg-yɩɩga koɛɛga,

⁴ bãngd ninga sẽn wʋmda Soaala-Wẽndã n gomda, Pãng Soaba sẽn kõt a soab t'a nee wã n gomda, Sẽn waoogd-a Soaala t'a nin pukdẽ wã n gomda.

⁵ Ad-f rota be neere, Zakoob, F zagsa tar yamleoogo, Israyɛl!

⁶ B yɛdg n dɩga wa kʋɩls koom, b tõnda wa tɩɩs sẽn sel kʋɩlg noore, wa pu-neeb Soaala-Wẽnd sẽn sele, wala kʋgs sẽn tãood koom noore.

⁷ A buls koom ka fẽbgd ye a kood tɩgda koom. A rĩma n tõog a Agag, a naama pãng paasdame n dabda.

⁸ Soaala-Wẽnd n yiis-a Ezipt tẽnga, a pãng yaa we-naaf pãnga. Yẽ n sɛt a bɛɛba. Yẽ n fõosd b kõaba sɩɩlem, a pɛɛma n lubd-b zãnga.

⁹ A gãe wa gɩgemde. Ãnda n na n yik-a a gãagẽ? Sẽn kãabda foo noog paam barka! Soaala-Wẽnd na sãam sẽn kãabda foom beedo!

¹⁰ A Balak sũur puuga ne a Balaam; a kabsame n yeel-a: «M boola foom tɩ f wa kãab m bɛɛb beedo, la yaa naoor a tãab marsã la f pids-b ne kãab noodo!

¹¹ Sẽn ya woto wã, leb f tẽngẽ. M da yeelame tɩ ma waoog-f sõmb-sõmbo, ad ya Soaala-Wẽnd meng n mongd-f rẽ.»

¹² A Balaam leok-a lame: «Fo sẽn tʋm b rãmba, m da togs-b la vẽenega:

¹³ ‹Ba a Balak kõt maam wanzurf la sãnema fãa sẽn be a zakẽ, m kõn tõog n kɩɩs Soaala-Wẽnd n sik noog bɩ beed wala m sẽn dat ye. Soaala-Wẽnd sẽn yet tɩ m togs la m na n togse.›

¹⁴ Ade, marsã m lebda m tẽngẽ la bas tɩ m wilg-f buud kãnga sẽn na n maan f buudã, sã n wa be n beẽ.»

¹⁵ A yiisa a bãngr gomde, a wilga woto: A Beor biig a Balaam koɛɛga, bãngd ninga sẽn ne yɩɩg-yɩɩga koɛɛga,

¹⁶ bãngd ninga sẽn wʋmda Soaala-Wẽndã n gomda, Yĩngr Naaba sẽn kõt a soab bãngra n gomda, Pãng Soaba sẽn kõt a soab bãngrã n gomda. Sẽn waoogd-a Soaala t'a nin pukdẽ wã n gomda.

¹⁷ M neeme la yaa beoog bũmbu. M neeme la yaa bũmb sẽn ket n zãre. M nee a Zakoob ãdg sẽn puk yĩngri. M nee naam dasaar a Israyɛl nugẽ, dasaar sẽn wurd a Moab zugu, la a vargd a Sɛt kamba.

¹⁸ A Edom na n lebga ned a to soolem A Seyir na n lebga a bɛɛb soolem. Yaa Israyɛl n tʋmd a pãng tʋʋma.

¹⁹ A Zakoob yagens n wõrd a bɛɛba, a karga b tẽngã n sɛɛs-a zãnga.

²⁰ A Balaam yãenda a Amalɛk me la a goma woto a poorẽ: A Amalɛk la fãa taoor soaba la a wãab beoog vẽegdame.

²¹ A Balaam yãenda Kenitsa la ad-a bãngr gomd bãmb me poorẽ: F roog yɛsa ne pãnga, f tʋɩla f tʋk pĩig zugu.

²² Ne rẽ fãa bugum n na n dɩ a Kaẽ t'a Asʋr na n kẽes-a roogo.

²³ A baasa a bãngr goama woto: Bʋk woo, bʋko! Ãnd n na põs Soaala-Wẽnd sɩbgre?

²⁴ Ad Kitim koom kogendo. B na namsa Asʋr, b na n yeega Ebɛr nenga: yẽ me rigda a wãab zĩigẽ.

²⁵ A Balaam loogame n dig a tẽngẽ t'a Balak me rɩk a sor.