Sõadga 23 - SEBR SÕNGO

¹ A Balaam yeela a Balak: «Me maan-kug a yopoe kaalẽ la f wa ne lols a yopoe la pe-raad a yopoe.»

² A Balak maana wa b sẽn yeel-a. La bãmb b yiiba gilga maan-kugã, n kodg maan-kugr fãa zugu, loalg la pe-raoogo.

³ A Balaam le paasame: «Yals f maanda sɛɛgẽ tɩ m zãag bilfu. Daare Soaala na seg-m la m sẽn na n wʋm bũmb ning b nengẽ, m na wilg-fo, ba koɛɛga sẽn yaa a soaba.» A sẽn gome, a sɩd zãagame n ta sorã.

⁴ Soaala-Wẽnd seg-a lame la a Balaam yeelame: «M kɩtame tɩ b me maan-kug a yopoe, la a ye fãa zugu, b maana loalg la pe-raoog maoongo.»

⁵ Soaala-Wẽnd wilga a Balaam a sẽn na n togse, la a yeel-a lame: «Leb a Balak nengẽ la f gom ne-a wa m sẽn wilg-fã.»

⁶ A Balaam sẽn leb a Balak nengẽ, a mikame t'a ket n yɛsa maan-kuga sɛɛga, yẽ ne Moab nin-bɛdã.

⁷ A Balaam goma a bãngr goama: A Balak bool-m-la Aram tɩ m yi be n wa; Moab dĩma bool-m-la yaang tãmsẽ: Wudg n wa kãab a Zakoob wẽnga n kõ-ma! Wudg n wa pʋlem a Israyɛl beedo n kõ-ma!

⁸ M yɩta a wãn n kãab wẽnga, Soaala-Wẽnd sẽn pa yãk a soab barka? M yɩta a wãn n pʋlem beedo Soaala-Wẽnd sẽn ka yi a soab poorẽ?

⁹ M sẽn zao pĩisa zut n getẽ, m sẽn karg tãmsã n neẽ, yaa Soaala-Wẽnd sẽn bĩng b menga, b toorẽ pʋɩɩre, yaa pʋɩɩr sẽn bĩng kɛɛnga, pʋɩɩr sẽn welg ne buud a taaba.

¹⁰ Ãnda n tõe n sõd a Zakoob n kong bĩisra sõadga? Ãnda n tõe n sõd a Israyɛl tus lagem tusã? Soaala-Wẽnd sõng-m tɩ m yi dũniya wa nin-sõma wã sẽn yiti! Soaala-Wẽnd na sõnge tɩ m baasg yɩ bark baasg wa Israyɛl kamba!

Bark a yiib soaba

¹¹ A Balak yeela a Balaam: «Yaa bõe la f maan-m woto? M tall-f lame n wa tɩ f kãab m bɛɛb beedo tɩ f lɛɛg zam-b kãab noodo!»

¹² T'a Balaam yeele: «M sã n gomda, m noora tõe n yiisa gomd Soaala-Wẽnd sẽn ka kõ sor tɩ m yiis bɩ?»

¹³ A Balak bool-a lame: «Wa tũ ma, wa tɩ d yals zĩig a to tɩ f paam n yãend a Israyɛl zãma wã. Ya bogr bala la f sẽn da ne wã, f ra ka ne-b zãng ye. Wa yals zĩ-kãnga n kãab beed n kõ-ma!»

¹⁴ A Balak tall-a lame n dʋ Pisga tãnga zugu n le me maan-kug a yopoe n kʋ loalg la pe-raoog maan-kugr fãa zugu.

¹⁵ A Balaam yeel-a lame: «Yaas ka, maan-kugra sɛɛga tɩ m zãag bilfu n gũ Soaala leokre.»

¹⁶ Soaala-Wẽnd waa n sega a Balaam n wilg-a b koɛɛga la b yeel-a woto: «Leb a Balak nengẽ la tɩ gom ne-a wala m sẽn togs-fã.»

¹⁷ A Balaam leba a Balak nengẽ la a mikame t'a ket n yɛsa maan-kugra sɛɛga, yẽ ne Moab nin-bɛdã. A Balak sok-a lame: «Soaala-Wẽnd yeel-f lame tɩ bõe?»

¹⁸ T'a Balaam na n le gom a bãngr goama: Yiki Balak, yik n kelge! Kelg-m neere, Sipor biiga!

¹⁹ Soaala-Wẽnd ka ninsaala n mi zirẽ yagb ye, B ka ninsaal n bool n le yet tɩ b vẽ ye; Soaala-Wẽnd pa yiisd gomd tɩ gomda pa faoog ye. Goama pa gomd n ka pidsdẽ ye.

²⁰ M yeelame tɩ bark la m na n ningi, dɩlla m kõn lebs m zelemd ye.

²¹ Tẽn-kũum kõn lʋɩ a Zakoob buudẽ, namsg kõn nams a Israyɛl tẽngẽ ye, Wẽnnaam a Soaala bee ne-a, Wẽnnaam pẽgra sãta a tẽngẽ.

²² Bãmb n yiis-a Ezipt tẽnga. B kõ-a-la we-naaf pãnga.

²³ Bagb korg ka bobd a Zakoob tẽng ye bagr ka bʋgd Israyɛl ye. Wakat sã n ta bala a Zakoob paamda vẽnegre, Soaala-Wẽnd pukda a Israyɛl b tʋʋma.

²⁴ Ges-y buud sẽn yik wa we-rũnga, Ges-y rũng sẽn yɛs wa gɩgemde a ka bri n wãbe, a kõn leb a gãagẽ ye, a ka bri n yũ zɩɩm, a kõn vʋʋs ye.

²⁵ A Balak yeela a Balaam: «F sã n ka tõe n kãab nin-bãmba beed me, bɩ f ra ning-b bark wɛ.»

²⁶ T'a Balaam leok-a: «M da pĩnd n yeel-f lame: ‹Soaala-Wẽnd sẽn yet tɩ m togs bũmb ninga la m na n togse.› »

Bark a tãab soaba

²⁷ A Balak lɛɛg n yeela a Balaam: «Fo yee n wa tɩ m wilg-f zĩig a to; daare Soaala-Wẽnd na sak tɩ f zĩnd be n kãab neba beedo n kõ-ma.»

²⁸ A Balak rʋʋsa a Balaam Peor tãnga zug tẽnsʋka tɩ we-raooga yɛdg n dɩg a taoore.

²⁹ A Balaam yeelame: «Me maan-kug a yopoe, wa ne lols a yopoe la pe-raad a yopoe.»

³⁰ A Balak maana wala a Balaam sẽn yeel-a la a kʋʋ maan-kugr fãa zugu loalg la pe-raoogo.