Sõadga 22 - SEBR SÕNGO

A Balak ne a Balaam

¹ Israyɛl kamba le rɩka sore, b waa n yalsa Moab pʋ-weesẽ, Zeriko yegende, Zʋrdẽ noor. Zʋrdẽ zoet n teesda yamsem mogrã n basd Zeriko a nug rɩtgo.

² A Sipor biig a Balak wʋma a Israyɛl sẽn maan Amoritsa bũmb ninga.

³ A Moab yãendame tɩ Israyɛl kamba sõor yaa wʋsg tɩ looge. B sõora yɛɛs-a lame.

⁴ Dẽ la a yeel Madiã nin-kẽemsã: «Zãma kãnga na n sɛɛsa rɩɩba fãa tõnd sɛɛgẽ, wala niis sẽn sɛɛsd yamd bãoogẽ.» Wakat kãng t'a Sipor biig a Balak n ya Moab dĩma.

⁵ A Balak tʋma neb a Balaam nengẽ. Yẽ yaa a Beor biiga la a ra bee Petor, Efrat kʋɩlga noore, Amavitsa tẽn-peelmẽ. A tʋmame tɩ b yeel-a woto: «Ad-y neb n yi Ezipt tẽnga la b sẽega mooga tõre la bãmb n wa n kẽed m tẽngẽ.

⁶ M kot-f lame tɩ f wa kãab-b beedo tɩ b pãng yɩɩda maam. Daare m na tõog-a, n dig-a n yiis. M paam n bãngame tɩ fo sẽn ningd a soab bark paamda barka la fo sẽn kãab a soab beedo, kãabga tũudame.»

⁷ Moab la Madiã nin-kẽemsa bobame la b talla bũmb n na n tɩ yao baga a Balaam. B sẽn ta a Balaam nengẽ, b togs-a-la a Balak goama.

⁸ A Balaam yeel-b lame: «Gãand-y ka yʋngã, tɩ Soaala-Wẽnd sẽn wilg-ma la m na n togs yã.» Nin-kẽemsa gãanda a Balaam yiri.

⁹ Wẽnd kolga a Balaam n yeel-a: «Yaa yɛ rãmb n wa f nengẽ wã?»

¹⁰ La a Balaam leokame: «Yaa a Sipor biig a Balak, Moab dĩma n tʋm a neb tɩ b wa yeel-ma:

¹¹ ‹Ad-y neb niyns sẽn yi b Ezipta wa n pida m tẽnga. Wa kãab-b beedo n kõ-ma tɩ daare m na zab n tõog-ba, n dig-ba.› »

¹² Soaala-Wẽnd yeela a Balaam: «Da tũ-b ye, da tɩ kãab beed ye, tɩ maam, Naaba-Wẽnd, zoe n ninga buud kãnga barka.»

¹³ Beoog sẽn vẽege, a Balaam yika yibeoogo n wilg a Balak nin-kẽemsã: «Leb-y y tẽnsẽ, tɩ Soaala-Wẽnd pa rat tɩ m tũ-y ye.»

¹⁴ Moab nin-kẽemsa lɛɛg n kul n tɩ yeela a Balak: «A Balaam pa tʋlg n tũ-d ye.»

¹⁵ Woto a Balak tʋma kãsem-dãmb a taaba. Yaa neb sẽn ya sʋk neba la b sõora yɩɩga pipi rãmbã.

¹⁶ B taa n yeela a Balaam: «A Sipor biig a Balak koɛɛg la woto: ‹Maam a Sipor biig a Balak, maam n kot-f tɩ f ra zãgs waoong ye!

¹⁷ Bãng tɩ m na n zam-f-la kũuni la m na n maana f sẽn yeel fãa. Wa tao n sõng-ma, n kãab buud kãnga beedo.› »

¹⁸ A Balaam leoka a Balak neba woto: «Ba yaa sãnema la wanzurfa gill sẽn be a Balak zakẽ wã la a rat n kõ-ma, m ka tõe n maan bõn-bedr bɩ bõn-bila sẽn ka Wẽnnaam m Soaala sẽn wilg-m ye.

¹⁹ Ne rẽ fãa m kot-y lame tɩ y gãand ka yʋngã tɩ m paam n bãng Soaala-Wẽnd sẽn na n wilg-m yɛsa.»

²⁰ Yʋngo Soaala-Wẽnd wala a Balaam nengẽ n yeel-a: «Nin-bãmba sã n waame bal n na n bool fo tɩ f wa yãag-ba, kẽnge. Fo yee n maan m sẽn na n yeel-fa bala.»

A Balaam bõan-yãanga

²¹ Vẽkẽmbeoog yibeoogo a Balaam yikame n ning a bõan-yãang gaare la yẽ ne Moab nin-bɛdã dɩka sore.

²² A Balaam loogra puuga Soaala-Wẽnd sũuri tɩ Soaala malɛk na n tɩ yaas sorẽ n gɩdg-a. A ra zomba bõan-yãanga t'a sõgen-kamb a yiib yãagd-a.

²³ Bõanga yãee malɛk sẽn yɛs sora noor ne sʋ-bɛɛga t'a bas sorã n kẽed pʋto. T'a Balaam tãag bõangã n tar a pãbr t'a na le rɩk sore.

²⁴ Soaala-Wẽnd malɛka tɩ yalsa sor sẽn ya longo la sẽn bʋdg n kẽed bugsuntungu tɩ lalg be goabg la rɩtgo.

²⁵ Bõanga nif teega Soaala malɛkã t'a na n dɩdg lalgã. A tol dɩdga a Balaam karga t'a le sɩng a pãbre.

²⁶ Soaala malɛk le loog-b lame n tɩ yals zĩ sẽkẽ, ka tõe n kɩll goabga, ka tõe n kɩll rɩtg ye.

²⁷ Bõanga yãenda Soaala malɛka yɛsa la a bur n lʋɩɩme t'a Balaam sũur puug t'a tar a pãbr ne rasaare.

²⁸ Soaala-Wẽnd kɩtame tɩ bõanga gome la a yeela a Balaam: «M maan-f-la bõe tɩ f pãbd-m al naoor a tã?»

²⁹ T'a Balaam na n leok-a: «Yaa f sẽn yik rũnna n maand f yama. M sã n da tarẽ sʋʋga m naan n kodgẽ foo zĩig pʋgẽ!»

³⁰ Bõanga me paasame: «Fo ka m zu-soab laa? Ka maam la f zao daar fãa laa? M sɩng n maanda wa m sẽn maan rũnna wã bɩ?» T'a leok tɩ ayoo!

³¹ Wẽnnaam puka a Balaam nini la a yãee malɛka sẽn yɛs ne sʋʋg sora noore. A rõbendame n kɩ a neng tẽnga.

³² Tɩ Soaala malɛk na n yeel-a: «Bõe yĩng la bõanga paam pãbr al naoor a tãabo? Wala f sẽn ne, maam n waa n gɩdg a kẽnde. M pa tẽed tɩ f tagsame tɩ sek n yaool n dɩk f sora ye.

³³ Sã n ya bõangã, a yãenda maam naoor a tãab n keke. La a sã n da pa kekẽ m da na kodgẽ foo zĩig pʋgẽ bala n yaool n basẽ bõangã.»

³⁴ A Balaam yeela Soaala malɛka: «M kongame, m sẽn pa bãng tɩ yãmb n da yɛs m taoor sora zugu. La ade, m so-toaka sã n pa noom-y, m na n lebame.»

³⁵ Malɛka yeelame: «Tũ nin-bãmba n looge, la m sẽn yet tɩ f togs bũmb ninga la f na n togse.» A Balaam tũume n loog a Balak nengẽ.

A Balaam ne a Balak

³⁶ A Balak wʋma a Balaam waoongo. A tɩ seg-a-la Ir-Moab, zĩig ning Arno kʋɩlga sẽn bẽeg a soolma toaaga.

³⁷ A Balak yeela a Balaam: «M deng n bool-f-la pipi tɩ f pa wa ye. M sok n gese: sẽn tʋm b rãmb tɩ b wa bool-fã sõor n ka sek bɩ bõe? Yaa m ka tõe n waoog-f lame tɩ ta f raab bɩ bõe?»

³⁸ T'a Balaam na n leoke: «M sẽn ta f nengẽ wã, f tẽedame tɩ koɛ bʋg la m tar n na n kõ-fo? Ad yaa Soaala-Wẽnd sẽn yet tɩ m togs bal la m na n togse.»

³⁹ A Balaam tũ-la a Balak n looge la yaa Kiriyat-Usot la b ta yã.

⁴⁰ A Balak kʋʋ maando, rũm-bɛd la rũm-bõonego; a yãka a Balaam pʋɩɩre, n yãk a tũud-n-taasa pʋɩɩre.

A Balaam ningda a Israyɛl barka

⁴¹ Vẽkẽmbeoog yibeoogo, a Balak ne a Balaam dʋʋ Bamot-Baal. B sẽn be tãnga zugã, b ra nee Israyɛl bogr bala.