Sõadga 16 - SEBR SÕNGO

A Kore zãgsgo

¹ A Kore yaa a Yisear biiga, t'a Yisear yaa a Keyat biiga, t'a Keyat yaa a Levi biiga. Yẽ n tõg-tõg a Datã ne a Abiram, a Eliyab kamba, n paas a On, a Pelɛt biiga, a Rubẽ yagenga.

² B naaga ne Israyɛl kamb kobs-yi la pis-nu n yik zabr ne a Moyiiz. Nin-bãmba da yaa buud kãsem-dãmba la b yʋʋr da yii b taaba sʋka.

³ B sɩnga gugleng ne a Moyiiz la a Aarõ n yetẽ: «Ya n sekame! Zãma wã ka tʋk yell bilfr meng a zug ye la Soaala-Wẽnd be-la d sʋka. Bõe tɩ yãmb dat n maan wala y yɩɩda y taaba?»

⁴ B goama sẽn lʋɩ a Moyiiz tʋbrẽ la a sẽn lʋɩ a yãvabga.

⁵ A yeela a Kore ne a nebã: «Beoog yibeoogo Soaala-Wẽnd meng n na n welg b welgre n wilg sẽn ya-a sõngo la a tõe n kolg bãmba. B sẽn welg a soab toorã n na n tõog n kolg-ba.

⁶ Ad-y sẽn na n maan bũmb ninga: bao-y wisd laase, yãmba la a Kore ne a nebã.

⁷ Beoog yibeoogo y na ning wisdu, Soaala-Wẽnd taoore, la nin-sõnga na n yɩɩ Soaala-Wẽnd sẽn na n wilg a soaba. Ad-y yaa n seka woto, Levi kamba!»

⁸ A Moyiiz le yeela a Kore: «Kelg-y yã, Levi kamba!

⁹ Ad-y y sẽn paam a Israyɛl Wẽnnaama nengẽ ka paood ye. Bãmb welga yãmb toor Israyɛl kamba sʋka tɩ y tõe n kolg Soaala n tʋm b sɛka roog tʋʋma la y reeg zãma wã zĩiga n waoog-ba.

¹⁰ B sakame tɩ yãmb ne y saam-biisã, a Levi kamba, tõe n kolg-ba tɩ y yet tɩ rẽ ka sek-y n baood maan-kʋʋr naam.

¹¹ Yaa raab kãnga n be y yamẽ la y yik n na n kɩɩs Soaala-Wẽnde. A Aarõ lebga bõe tɩ y yik n maand beem ne-a?»

¹² A Moyiiz kɩtame tɩ b bool a Datã ne a Abiram, a Eliyab kambã la b yeelame: «D ka na n wa ye!

¹³ Pa sek foo tɩ f zãag-d ne tẽng sẽn da lengd ne bĩisim la sɩɩdo n na n tɩ kʋ-d we-raoogẽ? Bõe tɩ f rat n yɩ d taoor soaba?

¹⁴ Sɩda ka tẽng sẽn bund bĩisim la sɩɩd pʋgẽ la f waa n kẽes-d ye, d pa reeg f nengẽ pʋt la bugsuntund ye. Fo tẽedame tɩ d nin ka puk laa? D ka na n dɩk sor ye!»

¹⁵ A Moyiiz sũur puuga wʋsgo t'a yeel Wẽnnaam: «Da reeg-y b kũuna ye. M ka reeg ned ba a ye bõanga, m ka wẽg bãmb ned ba a ye.»

Wẽnd bʋʋdo

¹⁶ A Moyiiz yeela a Kore: «Foo ne f nebã, wa-y ka beoogo, Soaala-Wẽnd taoore. A Aarõ me na n waame.

¹⁷ Fo nebã, bãmb kobs-yi la pis-nu wã na n dɩka b wisd laase n ning wisdu n tall n wa Soaala-Wẽnd taoore. Foo ne a Aarõ me na n maana wa bãmba.»

¹⁸ A Kore ne a poorẽ dãmba reega a noore: ned kam fãa dɩka a wisd laaga, n ning wisdu, n ning tɩdar sẽn tar yũ-noogo, n wa yals sɛka roog noore. A Moyiiz ne a Aarõ me waame.

¹⁹ A Kore tigma a neba sɛka roog noore. Wakat kãng la Soaala-Wẽnd puk b ziir zãma wã nifẽ.

²⁰ Soaala yeela a Moyiiz la a Aarõ:

²¹ «Welg-y y mens ne neb a woto buudu tɩ m bugma na n dɩ-b-la marsã bala.»

²² B kɩ b neng tẽng n yeele: «Soaala-Wẽnde sẽn zãad naand fãa vɩɩm, bõe tɩ nin-yend beeg tɩ y sũura puugd ne zãma wã fãa?»

²³ Soaala-Wẽnd leoka a Moyiiz:

²⁴ «Wilg neba tɩ b zãag ne a Kore, a Datã la a Abiram dooga, sikẽ wã.»

²⁵ A Moyiiz yik n bʋʋga a Datã la a Abiram la buuda kãsem-dãmba pʋg-b lame.

²⁶ A Moyiiz goma woto ne zãma wã: «Zãag-y y mens ne nin-wẽnsa roto, da sɩɩs-y bũmb ba a ye b sẽn so ye tɩ b yel-wẽna wa kɩt tɩ y naag-ba n ki ye.»

²⁷ Neba fãa sɩd zãaga ne a Kore, a Datã la a Abiram roto. A Datã, ne a Abiram da yiime n yɛs b roog noore ne b pagb la b kamba la sẽn be-b ne bãmba.

²⁸ A Moyiiz yeelame: «Ad bũmb ning sẽn na n wilg yã tɩ yaa Soaala-Wẽnd n tʋm maam la m ka maand m sẽn dat ye.

²⁹ Ad-y nin-bãmba sã n ki wa neba fãa sẽn kiidã, b loogra sã n wẽneg neb a taaba fãa rẽnna, dẽnd ka Soaala-Wẽnd n tʋm-m ye.

³⁰ La Soaala sã n maan bõn-bãnde, tẽnga sã n yaag a noor n vel bãmba ne b sẽn so fãa tɩ b sig vɩɩs bʋg-tẽngẽ, y na bãng tɩ b ra paooga Soaala-Wẽnde.»

³¹ A Moyiiz pa yãe n gom n baase la tẽnga sẽn wurg b taoore.

³² Tẽnga noor yaagame n vel-ba, bãmb ne b zak rãmba. Yɩɩ boto me ne neb nins sẽn da kẽed a Kore wã.

³³ Bãmb ne b sẽn so fãa siga vɩɩse bʋg-tẽnga tɩ tẽnga lɛɛg n bus-ba. La woto b yẽesa buuda sʋka.

³⁴ Israyɛl gill sɩnga zoeese la b maanẽ: «D zoe tɩ tẽnga ra wa vel-d ye!»

³⁵ Soaala-Wẽnd bugum n sigi n dɩ neb kobs-yi la pis-nu wã sẽn da yõog wisdã b laasẽ.