Sõadga 15 - SEBR SÕNGO

Kũuna sẽn kõt Soaala to-to

¹ Soaala-Wẽnd yeela a Moyiiz:

² «Gom ne Israyɛl kamba n wilg-b woto: ‹Y sã n wa ta tẽng ning m sẽn na n kõ-y tɩ y soogã, y sã n wa ta y zagsẽ,

³ n dat n kõ Soaala-Wẽnd y yũ-noog maoongo, n dat n kõ-b rũnga, bedr bɩ bilfu, pʋleng pidsgu yĩnga, y kibs rãmba wakat bɩ y yamleoog raare, n dat n kõ-b maoong sẽn na sigs b sũuri,

⁴ bɩ y naag n wa ne zom wamde sẽn nag ne kaam wũmbla.

⁵ Wa-y ne rãam me n naag ne yũ-noog maoongã la sugr kosg maoongo, sã n ya pe-bil la b kʋʋda.

⁶ Maoonga sã n ya pe-raoogo la b kʋ yã, b wata ne zom wam a yi sẽn nag ne kaam wũmbl la pʋɩ-sʋka.

⁷ Tũnugda ne rãam wamde la yaa kũun a woto buud n sigsd Soaala-Wẽnd sũuri.

⁸ F sã n kõt Soaala-Wẽnd loalga la maoonga yaa yũ-noog maoong bɩ pʋleng pidsgu maoong bɩ laafi kosg maoongo,

⁹ maoonga tũnugda ne zom wam a tã sẽn nag ne kaam wũmbli a yi,

¹⁰ n paas rãam wamde, la kũun a woto n tar yũ-noog n sigsd Soaala-Wẽnd sũuri.

¹¹ Maanda woto daar fãa sã n kʋ loalga, pe-raoogo, pe-bila bɩ bʋʋga.

¹² Ba rũmsa sõor sẽn yaa a soaba, maanda woto ne rũng fãa.

¹³ Woto la tẽnga biig fãa na n maane, a sã n wat ne kũun n na n sigs Wẽnnaam sũuri.

¹⁴ Sãan sã n wa yãmb sʋka bɩ a sã n bee yãmb sʋk daar zãra, la a me rat n waa ne kũuni n sigs Soaala-Wẽnd sũuri, bɩ yẽ me maan boto.

¹⁵ Buuda zãng fãa sã n na n waoog Soaala-Wẽnde, bɩ a manesma yɩ manes yɛnga, tẽnga dãmba wala sãamba yĩnga, zamaan woo zamaana.

¹⁶ Noor a ye bal n be, noor a ye tãa, yãmb ne sãamba yĩnga.› »

Bur lɛnga

¹⁷ Soaala-Wẽnd yeela a Moyiiz:

¹⁸ «Gom ne Israyɛl kamba n wilg b woto: ‹Y sã n wa kẽ m sẽn tar-y n dabd tẽng ningã,

¹⁹ y sã n wa rɩt tẽnga buri, y na yãk lɛnga n kõ Soaala-Wẽnde.

²⁰ Y sẽn na n wẽ bur daar fãa, y na yãk a ye n kõ Soaala-Wẽnd wala b pʋɩɩr dẽenga. Kũun kãng wẽnda kood rẽemsa kũuni.

²¹ Bura sẽn yãkd wa Soaala-Wẽnd pʋɩɩr dẽenga, y na n kɩs-a-la zamaan woo zamaana.› »

Bũmb sẽn maan ne yĩdgu

^22-23 Ad-y noy la Soaala-Wẽnd kõ a Moyiiz la noy kãens yiisg raare n tar n digd zamaan ne zamaana, yaa noy d sẽn tog n tũ zãnga.

²⁴ Buuda zãng yaool n tõe n yĩdame n tõdg noorã n ka bãng tiir ye. La buuda sã n wa bãng a kongre, yaa buuda zãng n na n wa ne loalga tɩ b kʋ n yõog bugum tɩ yũ-nooga sigs Soaala-Wẽnd sũuri. Maoonga tũnugda ne a rasem kam bõn-tũnugdi; lebd n paasa boɛɛg sẽn na n kʋ yel-wẽnd sugr kosg yĩnga.

²⁵ Maan-kʋʋda na n kosa sugri buuda fãa beegr yĩnga la a na n paama sugri. Yella maana ne yĩdgu la buuda waa ne a kũuni la a maoong, a sẽn yĩdi n beeg yĩnga. Taal sɛɛme.

²⁶ Yaa Israyɛl kamba fãa n na n paam sugrã n paas sãamba me, tɩ taala yaa kʋʋnga fãa taale.

²⁷ Sã n ya ned a ye n yĩd n tõdg noore, nin-kãng wata ne yʋʋmd yɛng bʋʋga.

²⁸ Soaala-Wẽnd taoore maan-kʋʋda maanda a sẽn tog n maan tɩ neda paam a yĩdga sugri; a kota sugr a yĩnga la a na n paamame.

²⁹ A yaa sãan bɩ tẽnga biiga, sugra kosga tũuda so yɛnga.

³⁰ Noora tõdgr sã n ka yĩdgu, n ya pʋ-toogo, f yaa sãana bɩ tẽnga biiga, yaa Soaala-Wẽnd la f paoog yã. B yiisda beegda buudẽ.

³¹ Yẽ soab sãbsa Soaala-Wẽnd gomde, n tõdg b noore, yaa tɩlɛ tɩ b yiis a soab buudẽ t'a yella ket n doga a zugu.

Vʋʋsg raar noor tõdgre

³² Israyɛl kamba sẽn waa n ket zĩ-peen-daagẽ, b linga ned sẽn wɩɩsd daad vʋʋsga daare.

³³ Neb niyns sẽn ling-a t'a wɩɩsd daada tall-a lame n wa a Moyiiz, a Aarõ la buuda taoore.

³⁴ B gũnug-a-la ne neba, tɩ b ra nan ka yiis noor yell a woto poorẽ ye, n mi a sẽn tog ne sɩbgr ning ye.

³⁵ Soaala-Wẽnd n yeel a Moyiiz: «Bɩ b kʋ nin-kãnga, la yaa buuda zãng n na n laba ne kuga, sika kudgẽ.»

³⁶ B tall-a lame n yi sika kudgẽ n lab-a n kʋ, wala Soaala-Wẽnd sẽn da wilg a Moyiiz.

Fut zerdo

³⁷ Soaala-Wẽnd yeela a Moyiiz

³⁸ t'a gom ne Israyɛl kamba la f wilg-ba tɩ b ning b futa zerdo, bãmb la b yagense. B ning gĩs mismiigu n gilgi.

³⁹ Gĩs kãng tẽngr la zerda na n luuli. Gĩs kãng n na tẽeg-y Soaala noya, woto y na reeg-ba la y kõn bas tɩ y sũur la y nin kẽes-y moog ye.

⁴⁰ Woto y na tẽeg n deeg m noya gilli n yɩ sõma y Wẽnnaam taoore.

⁴¹ Maam la yãmb Wẽndã, maam n yiis-y Ezipt tẽnga n na n yɩ y Wẽnnaam. Maam la y Wẽnd dũnna la beoogo.