Sõadga 14 - SEBR SÕNGO

Neba zãgsda kẽnde

¹ Zãma wã gill naaga taab n kelme; b talla yãbr tɩ beoog vẽege.

² Israyɛl kamba fãa yeelame tɩ b kõn deeg a Moyiiz la Aarõ noor ye. Ad-b sẽn yeele: «D sã da paamẽ n kiẽ Ezipt tẽnga! Ka rẽnd bɩ zĩ-peen-daagẽ wã!

³ Bõe tɩ Soaala kẽes-d sʋʋs sẽn koot tẽngẽ? D pagb la d kamb na n yõg n kẽesa yembdo, d kõn maan d meng neere n leb Ezipt tẽng sɩda?»

⁴ B walma taaba: «D bao naaba n kõ d menga n leb Ezipt tẽnga!»

⁵ A Moyiiz ne a Aarõ lʋɩ b yãvabga Israyɛl kamba fãa taoore.

⁶ A Nun biig, a Zozuwe, la a Yefune biig, a Kalɛb, kẽesa b futu.

⁷ B yeela buuda fãa: «D kaagame n ges tẽngã la a yaa tẽn-sõngo.

⁸ Soaala-Wẽnd sõngra sã n pʋgd tõndo, d na n kẽe tẽngã, b na n dɩk-a lame n kõ tõndo; ad-y yaa tẽng sẽn bund bĩisim la sɩɩdo.

⁹ Da zẽk-y y zug ne Naaba-Wẽnd ye; da maan-y rabeem ne tẽnga rãmb ye. B pa na n sek d velb ye! B wẽn-faada maasem meng ka buiid-b ye, tɩ tõnd Soaala-Wẽnda yaool n be d sʋka, da zoe-y nin-bãmba ye.»

¹⁰ Buuda zãng sẽn waa n yɛs n gomd tɩ b na n laba a Moyiiz la a Aarõ ne kugã, la Soaala-Wẽnd sẽn sig ne ziiri, b fãa nifẽ, sɛka roog zugu.

A Moyiiz yõkda Wẽnd sɛɛga

¹¹ Soaala-Wẽnd goma ne a Moyiiz n yeel-a: «Nin-bãmba na n kell n maana wa b toog ka be ne maam n ta da-bʋre? B na n zãgsa m tẽeb n ta da-bʋre tɩ yɛl-bãna m sẽn maan b sʋka yaool n ka be sõore?

¹² M na n waa ne tẽn-kũum, n menes-b zãnga. La m na n yiisa f pennẽ, buud sẽn tar sõor la pãnga n yɩɩd a Israyɛl.»

¹³ A Moyiiz leoka Soaala: «Ezipt rãmba bãngame tɩ yãmb n yiis bu-kãnga b tẽngẽ,

¹⁴ la b togsa kaalẽ dãmbã, la bãmb me miime tɩ yãmba, Naaba-Wẽnd, be-la b sʋka, tɩ yãmba, Wẽnnaam, sẽn zãr ne ba, yaa nif la yõore bala. Y sawadga yɛsa b zugẽ. Wĩntoogo y lʋɩta b taoor sawadgẽ la yʋngo yaa bug-witmẽ.

¹⁵ Bõe marsã tɩ y na n menes buuda gill wa nin-yende! Y yʋʋra sẽn zẽk neb niyns taoorã na n wa yeelame:

¹⁶ ‹Soaala-Wẽnd mikame tɩ b pa tõe n kẽes-b tẽng ning b sẽn da kãab-bã tɩ b na n kood-b zĩ-peen-daagẽ.›

¹⁷ Sẽn ya woto wã bɩ m Soaala wilg b pãnga.

¹⁸ Yãmb meng n yeele: ‹Maam la Soaala-Wẽnde, m ka yãgd ne sɩbgr ye, m ka kãabd tɩ vaal ye, n maand wa m sakame tɩ ned zẽk a zug ne ma, tɩ ned beeg-ma, mik m ka na n pa n ka sɩbg ye. M na n tol n sɩbga biig a ba rãmb beegr yĩnga, n sɩbg-a a yaaba la a yaab tʋbra-kẽeg beegr yĩnga.›

¹⁹ Kõ-y nin-bãmba b beegra sugri, ges-y y nonglma sẽn puk n ta zĩig ninga, la tẽeg-y tɩ y kʋmsa y sũur ne ba al Ezipt tẽng n ta zĩ-peen-daagẽ ka.»

²⁰ Ad Soaala-Wẽnd sẽn leok a Moyiiz: «M basa fãa taale wala f sẽn kot-ma.

²¹ La m togsda sɩda wala sẽn ya sɩd tɩ m vɩɩme, wala sẽn ya sɩd tɩ Soaala-Wẽnd ziira pida dũniya,

²² m togsda sɩda tɩ nin-bãmba sẽn yãend m ziirã, n yãend bõn-bãna m sẽn maan Ezipt tẽnga la zĩ-peen-daagẽ ka, la b zãgs m kelegrã, n bao m noora naoor piigã,

²³ m wẽendame tɩ bãmb ned ba a ye kõn kẽ tẽng ning m sẽn kãab b yaab rãmba ye; sẽn paoog-b maama ned ba a ye kõn yãend-a ye.

²⁴ M sẽn na n bas ned ninga t'a kẽ, yaa m bi-sõng a Kalɛb. Yẽ tara yam sõngo la yẽ pʋga maam ne yẽesem, yẽ la m na n kẽes tẽng ning a sẽn zoe n tabã. A yagensa n na n soog-a.

²⁵ Amalesitsã la Kanaã rãmba na n paa tẽn-nabrẽ wã. Beoog bala bɩ y wẽnemd y neng n tees zĩ-peen-daagẽ, n tees Rudum mogre.»

Kãab beedo

²⁶ Soaala-Wẽnd goma ne a Moyiiz la a Aarõ:

²⁷ «Nin-bãmba sẽn ka vʋʋsd ne mam kɩɩsgã na n kell n pa-la m taoore n ta da-bʋre? Sɩda m wʋma a Israyɛl kamba sẽn tar zabre ne maam.

²⁸ Yeel-b woto: ‹M wẽenda, maam, Naaba-Wẽnde, tɩ m na n zã-y-la wala y sẽn gom tɩ m wʋma.

²⁹ Yaa zĩ-peen-daagẽ ka la y fãa na n pa, yãmb fãa yʋʋm sẽn ta pisi tɩ b sõd-y zĩ-peen-daagẽ ka; zĩ-peen-daagã n na n dɩ yãmb fãa gill sẽn kɩɩs b maama.

³⁰ M wẽend tɩ y kõn kẽ tẽng ning m sẽn da kãab yãmba ye. Sẽn na n kẽ-ba, yaa a Yefune biig, a Kalɛb, la a Nun biig, a Zozuwe.

³¹ Y sẽn zoet tɩ b na n wa yõg y kamb niynsi n kẽes yembdã, ad-y bãmb la m na n kẽes be, bãmb n na dɩ yõod ning y sẽn zãgsã.

³² Sã n ya yãmba y kõaba na n weela zĩ-peen-daagẽ ka.

³³ Y kamba na n paa zĩ-peen-daagẽ wã yʋʋm pis-naase wa rũm-kɩɩmba, b na n dɩ-la y zãgsga taale n tãag y kõaba sẽn wat n sẽeg zãnga.

³⁴ Wala y sẽn kaag tẽnga rasem pis-naasã, na n yɩɩ yʋʋm pis-naas marsã la y na n le karg-a. Daar donda yʋʋmde, la yʋʋm pis-naas la y na n dɩ y beegra taale la woto y na bãng ned yell sẽn lebgd to-to, a sã n yik n zẽkd a zug ne maam, Naaba-Wẽnde.

³⁵ Maam n gomde, maam, Naaba-Wẽnde, maam n wẽende, yaa woto la m na n maan ne nin-bãmba sẽn sũ taab n na n tak zabr ne maama; b fãa gill paada zĩ-peen-daagẽ ka, b fãa gilli.› »

³⁶ A Moyiiz sẽn tʋm b rãmba tɩ b gilg n ges tẽngã, tɩ b sɩd gilg n lɛɛg n wa yeel tɩ ka tẽn-sõngã, tɩ neba na n yik zabr ne-a wã,

³⁷ sẽn yeel-b tɩ tẽnga ka tẽngã, ad-y bãmb fãa sɩd kii kũ-miiga Soaala-Wẽnd taoore.

³⁸ Sẽn tɩ karg-b tẽngã n lɛɛg n wa n yaool n pa ki kũ-miiga, yɩ-la a Nun biig a Zozuwe la a Yefune biig a Kalɛb, bala.

Neb kẽer wʋglem

³⁹ A Moyiiz taasa Soaala-Wẽnd koɛɛgã a Israyɛl kamba, tɩ b na n kelem kʋʋre.

⁴⁰ La vẽkẽmbeoog yibeoog pĩnda b rʋ tãmsa zutu la b maanẽ: «D na n kẽnga Soaala-Wẽnd sẽn yet tɩ d kẽng zĩig ningã tɩ d sɩda, tõnd kongame.»

⁴¹ Dẽ la a Moyiiz yeel-b: «Yaa bõe la y maanda? Y tõdgda Soaala-Wẽnd noore la y raaba ka na n pids ye.

⁴² Da rʋ-y tãmsa zaalem tɩ Soaala-Wẽnd ka be y poorẽ ye, da tɩ rɩk-y y meng n kõ y bɛɛb ye.

⁴³ Amalesitsa la Kanaã rãmb yɛs n gũud-y lame n na n kood ne b sʋʋse; yãmb sẽn bas n ka le tũud Soaala-Wẽndã, Soaala me yi-la y poorẽ.»

⁴⁴ Ne rẽ fãa b zãgsame n dʋ tãmsã tɩ kuga wals sẽn be koglg ning pʋga la a Moyiiz meng nan ket sikẽ.

⁴⁵ Amalesitsa la Kanaã rãmba sẽn da zao tãmsã sig n seg-b lame la b kʋ-b lame n tãag Orma.