Sõadga 1 - SEBR SÕNGO

Israyɛl kamba sõadga

¹ Soaala-Wẽnd goma ne a Moyiiz Sinayi zĩ-peen-daagẽ, sɛka roog pʋga, kiuug a yiib soaba pipi raare, b yi Ezipt tẽng tɩ yʋʋm-bɩtẽ la b yeel-a lame:

² «Sõd-y yã a Israyɛl kamba fãa sak-saka, roog-roogo; sõd-y rapa fãa a yembr-yembre.

³ Foo ne a Aarõ, sõd-y Israyɛl kamb yʋʋm sẽn ta pisi la sẽn loog pisi, neb niyns fãa sẽn ya a Israyɛl tãb-biisi, sõd-y-ba, ned kam fãa ne a tãnsoaben-doogo.

⁴ Buud fãa na n yãka kãsem a ye n kõ-y tɩ b sõng yã.

Rota kãsem-dãmba

⁵ Ad neb niyns sẽn na n sõng yãmba: A Rubẽ roogẽ, a Sedewur biig a Elisur.

⁶ A Simeõ roogẽ, a Surisadayi biig a Selumiyɛl

⁷ A Zɩɩda roogẽ, a Aminadab biig a Nasõ.

⁸ A Isakar doogẽ, a Suwar biig a Nataneyɛl.

⁹ A Zabulõ roogẽ, a Elon biig a Eliyab.

¹⁰ A Zozɛf biig a Efrayim roogẽ, a Amiyud biig a Elisama; a Manase roogẽ, a Pedasur biig a Gameliyɛl.

¹¹ A Bẽnzame roogẽ, a Gideoni biig a Abidã.

¹² A Dã roogẽ, a Amisadayi biig a Ayiyezɛr.

¹³ A Asɛr roogẽ, a Okrã biig a Paziyɛl.

¹⁴ A Gad roogẽ, a Deowɛl biig a Eliyasaf.

¹⁵ A Neftali roogẽ, a Eyinã biig a Ayira.»

¹⁶ Bãmb la b tũus yã tɩ b lʋɩ b ba rooga kamb taoore, bãmb ned kam fãa da soo neb tus wɛɛla.

¹⁷ Nin-bãmb me la a Moyiiz ne a Aarõ bool tɩ b wa sõngd-ba.

¹⁸ B kɩtame tɩ Israyɛl kamba fãa tigim taab kiuug a yiib soaba pipi raare. Ned kam fãa bao-la a ba-biisi, zak-zaka, roog-roogo, la b ra gʋlsda rao fãa sẽn ta yʋʋm pisi bɩ yɩɩd rẽnna.

¹⁹ A Moyiiz sõd-b-la Sinayi zĩ-peen-daagẽ, wala Soaala-Wẽnd sẽn da togs-a.

Neba sõore

²⁰ A Israyɛl pipi biig a Rubẽ doogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna n ya tãb-biisi. B saaga zak-zaka, roog-roogo,

²¹ B paama tus pis-naase la a yoobe la kobs-nu. (46 500)

²² A Simeõ roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo,

²³ b paama tus pis-nu la a wɛ la kobs-tã. (59 300)

²⁴ A Gad roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

²⁵ B Paama tus pis-naas la a nu la kobs-yoob la pis-nu. (45 650)

²⁶ A Zɩɩda roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

²⁷ B paama tus pisopoe la a naase la kobs-yoobe. (74 600)

²⁸ A Isakar roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

²⁹ B paama tus pis-nu la a naase la kobs-naase. (54 400)

³⁰ A Zabulõ roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

³¹ B paama tus pis-nu la a yopoe la kobs-naase. (57 400)

³² Sã n yaa a Zozɛf kamba, a Efrayim doogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

³³ B paama tus pis-naase la kobs-nu. (40 500)

³⁴ A Manase roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

³⁵ B paama tus pis-tã la a yi la kobs-yi. (32 200)

³⁶ A Bẽnzame roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

³⁷ B paama tus pis-tã la a nu la kobs-naase. (35 400)

³⁸ A Dã roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

³⁹ B paama tus pisoob la a yiibu la kobs-yopoe. (62 700)

⁴⁰ A Asɛr roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

⁴¹ B paama tus pis-naas la a ye la kobs-nu. (41 500)

⁴² A Neftali roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo.

⁴³ B paama tus pis-nu la a tãabo la kobs-naase. (53 400)

⁴⁴ Woto n yɩ neba sõore sõadga rãmb sẽn paame. Sõadga rãmb la a Moyiiz ne a Aarõ la bãmb sẽn kos b rãmb sõngre. Roog fãa yɩɩ nin-yende.

⁴⁵ B sõda rao fãa yʋʋm sẽn ta pisi bɩ yɩɩd rẽnna, n ya tãb-biiga.

⁴⁶ B paama tus kobs-yoob la a tã la kobs-nu la pis-nu. (603 550)

⁴⁷ A Levi buuda kamb bala la b pa sõde.

⁴⁸ Soaala-Wẽnd yeela a Moyiiz:

⁴⁹ «A Israyɛl kamba sʋka, yaa a Levi rooga bal la f ka na n saag n sõde.

⁵⁰ Bãmb la f na n kos tɩ b ges sɛka roog yelle. B ges rooga la teed niyns fãa sẽn be a pʋgẽ. Bãmb n na n tʋk a teedã, n ges tɩ bũmb fãa wa a zĩigẽ. B na n ti b rotã n gũbg-a.

⁵¹ Yikr sã n ta, Levitsa n baasd teedã n tʋk n looge. Sã n le ta sikã, bãmb n lebd n ti-a. Nin-zaalg sã n saag n kolge, b kʋʋd-a lame.

A Israyɛl sika

⁵² Israyɛl kamb a taaba tiida roog-roogo, b tiidame n yegl b tãb-kaoore.

⁵³ Sã n yaa a Levi kambã, bãmb tiidame n gũbg sɛka roogo la woto buuda gill na tɩlg ne Soaala-Wẽnd sũ-puuri. Levitsa bal n na n ges sɛka roog yelle.»

⁵⁴ Israyɛl kamba maana wala Soaala-Wẽnd sẽn tʋlge, wala b sẽn da wilg a Moyiiz.