Sɩngrẽ 8 - SEBR SÕNGO

Kooma fẽbgre

¹ Wẽnd wa n tẽega a Nowe yelle, yẽ ne rũmsa sẽn da naag koglga pʋga, bɛd la bõonego. B kɩtame tɩ sob-raoog kaoog n fẽbg kooma tẽnga zugu.

² Yĩngr ko-nina pagame la sa-koom ka le rʋʋg ye.

³ Woto, bilf-bilfu, kooma sɩnga fẽbgre; Dasem sẽn waa n ta koabg la pis-nu t'a yõbgame,

⁴ la kiuug a yopoe soaba, kiuuga piig la a yopoe raare, koglga yalsa Ararat tãnga zugu.

⁵ Kooma kell n talla sigbu n ta kiuug piig soaba la kiuug piiga sẽn ta, tãmsa zut sɩnga pukri.

⁶ A Nowe basame tɩ dasem pis-naas le looge t'a lak koglga võore,

⁷ n basd gãoobg t'a yit la a watẽ n tãag tẽnga sẽn waa n kʋɩ zãnga.

⁸ Dẽ poore yaa wall la a Nowe yiis yã n na n bãng kooma sã n wooga tẽng zugu.

⁹ Walla sẽn mik tɩ tẽnga ket n dɩga ne koom tɩ zĩ-koɛɛng ka n zaoondedẽ, a lɛɛg n waame. A Nowe tuda a nug n yõk-a n kẽes pʋgẽ.

¹⁰ A Nowe basame tɩ rasem a yopoe loog t'a le yiis wallã.

¹¹ Zĩig sẽn maage, walla lɛɛg n waame la oliviye tɩɩg vã-maasr la a ra zãad a noorẽ la woto a Nowe bãngame tɩ kooma fẽbgame.

¹² A le gũu rasem a yopoe n yaool n le yiis wallã t'a yi n ka lɛɛg n wa lɛ-lɛ.

¹³ Dɩlla a Nowe, yʋʋma sẽn pid kobs-yoobe la a ye raare la kooma fõog zãng tẽng zugu. A sẽn lak sugrã, a Nowe yãeeme tɩ tẽnga fãa kʋɩɩme.

¹⁴ Yɩɩ kiuug a yiib soaba pisi la a yopoe raare la tẽnga kʋɩ zãnga.

¹⁵ Wẽnd goma ne a Nowe woto:

¹⁶ «Yi koglga pʋga, foo ne f paga, f kamb ne b pagba.

¹⁷ Yiis rũmsa fãa sẽn be ne foo, sẽn ya neong buud fãa, luiili, we-rũmsi, bõn-vuudi. B reeg tẽng n yãmb, b piuugi, b wek n pid moogo.»

¹⁸ A Nowe yii ne a kamba, a paga la a bi-pagba.

¹⁹ Bãmb poore yɩɩ we-rũmsi, yir-dũmsi, luiili, bõn-vuudi, tẽnga bõn-vɩɩli wã fãa. B yii bal-balle.

²⁰ A Nowe maana maan-kugri la maan-kugra zugu a yõka rũng buud fãa sẽn ya sõngo, luiil buud fãa sẽn ya sõngo, n kʋ maoongo. Yɩɩ rũng a ye, buud fãa pʋgẽ.

²¹ Soaala-Wẽnd koka maanda yũ-noogo n sigs b sũuri la b yeela b sũurẽ: «M kõn le saag n yãk tẽnga bark ninsaal yĩng ye tɩ ninsaal yam la a sũur togla wẽng t'a nan paooda. M kõn le saag n sɩbg bõn-vɩɩli wã wa m sẽn sɩbg-ba ye.

²² Tẽnga sã n ket a zĩigẽ, bũmb ba a ye wakat kõn ta tɩ b pa yãend-a ye: bʋdbo bɩ tigsgu, waood bɩ tʋʋlgo, sẽoog bɩ sɩpalgo, wĩndg bɩ yʋngo.»