Sɩngrẽ 7 - SEBR SÕNGO

¹ Soaala-Wẽnd yeela a Nowe: «Kẽ koglga pʋga, foo ne f zaka fãa tɩ m yãeeme tɩ foo bal la nin-tɩrga zamaana pʋga.

² Yãk rũms sõma buud fãa a yopoepoe, raad la yãanse. Sã n ya rũms niyns sẽn pa sõmb m nifẽ, yãk bãmb b yiib bal, buud fãa pʋgẽ, raoog la yãanga.

³ Yĩngr luiili wã na n yɩɩ a yopoepoe, buud fãa pʋgẽ, raad la yãanse, tɩ b buud da wa menem moog ye.

⁴ Keta rasem a yopoe tɩ m tak saag sẽn na n ni rasem pis-naase, wĩntoog la yʋngo, la woto m na menes moogo m sẽn naana fãa.»

⁵ Soaala-Wẽnd sẽn yeel a Nowe t'a maan bũmb ninga fãa, a maan-a lame.

⁶ Sa kẽengã la ko-kẽengã sẽn na n wa moog raare, dẽ t'a Nowe tara yʋʋm kobs-yoobe.

⁷ A Nowe kẽe koglga pʋga ne a kamba, a paga ne a bi-pagba n paam n põs ko-kẽengã.

⁸ Rũmsa fãa, sẽn ya-b sõmbo wala sẽn ka-b sõmbo, bõn-yɩgdi la bõn-vuudi,

⁹ kẽe koglga pʋga, a yiib yiibu, raoog la yãang, wala b sẽn wilg a Nowe.

¹⁰ Dasem a yopoe sẽn pidi, ko-kẽenga reega tẽngã.

¹¹ A Nowe dogem yʋʋm kobs-yoobe, kiuug a yiib soaba, kiuuga piig la a yopoe daare, yĩngr mogra ko-nina yoosa zãnga,

¹² tɩ sa-koom na n kiig tẽng dasem pis-naase, wĩntoog la yʋngo.

¹³ Badaare, a Nowe kẽe koglga pʋga ne a Sɛm la a Kam la a Zafɛt; a kẽe ne a paga la a kamba pagb a tã,

¹⁴ ne rũmsa buud fãa, bɛd la bõonego sẽn vɩ tẽng zugu, ne luiili wã fãa, bɛd la bõonego, sẽn tar b pɩgs buud fãa.

¹⁵ Sẽn naag-ba a Nowe n kẽ koglgã yɩɩ bũmb fãa sẽn ya neongo, n vʋʋsd ne yõore la b kẽ-la b yiibu yiibu,

¹⁶ raoog la yãang, wala Wẽnd sẽn da wilg b toore. A Nowe sẽn kẽ koglgã, Soaala-Wẽnd lɛɛg n pag-a-la pʋgẽ.

Dũni sãoongo

¹⁷ Dasem pis-naas pʋgẽ, ko-kẽenga sɩnga tẽnga saagre; kooma wa n lebga wʋsgo la a zẽka koglgã n dʋʋs yĩngri.

¹⁸ Kooma paasa wʋsgo, n wa reeg tẽnga zãnga tɩ koglga na n sɩng n kẽnd a zugu.

¹⁹ Kooma tara rʋʋbo al n wa lim mooga tãms fãa.

²⁰ Kooma sẽn lim tãmsã n zʋʋg-ba, taa kãntɩɩs piig la a nu.

²¹ Wakat kãnga bũmb ning fãa sẽn da vɩ tẽng zug kiime: luiili, yir-dũmsi, we-rũmsi, bõn-nagse la ninsaalb fãa.

²² Sẽn vɩ-a ne yõor fãa, saaga tẽngr, tẽng zug, fãa kiime.

²³ Soaala-Wẽnd sãama sẽn da be tẽng zug zãng fãa, sẽn yɩ ninsaala n tat rũnga, bõn-vuudri, luiila, fãa kiime; sẽn põs bala yɩ-la a Nowe la sẽn da naag-b yẽnda koglga pʋga.

²⁴ Kooma paa tẽnga zugu dasem koabg la pis-nu.