Sɩngrẽ 6 - SEBR SÕNGO

KOOM DƖTA DŨNIYA

¹ Ninsaalb buud waa n sɩnga paasg tẽng zugu; b waa n doga wʋsgo: kom-dibli wʋsgo, kom-pugli me wʋsgo.

² Na-komsã, pãn-dãmba, waa n yãeeme tɩ nin-zaalsa kom-pugli yaa neeba tɩ b na n bao b sẽn nong b rãmbã n maan b pagba.

³ Soaala-Wẽnd waa n yeelame: «M pa tẽed tɩ yaa daar fãa la m na n bas ninsaal t'a kell n vɩɩnd moog ye. Ninsaal sẽn ya neong yĩnga, a yaa bõn-kiidga. Dũnna tɛka a pʋlemd kõn yɩɩg yʋʋm koabg la pisi ye.»

⁴ Bãng-y tɩ sasa kãng tɩ nin-wobd n da be tẽngã. Bãmb n da pid tẽngã; pãn-dãmba sẽn waa n kẽed ne nin-zaalsa kom-pugli wã la b rog bãmba. Bãmb la tẽn-kʋdem-wẽnnẽ gãndaado; b yʋʋr da yii wʋsgo.

⁵ Soaala-Wẽnd yãeeme tɩ tẽng zugu, ninsaalb wẽnema tara paasg tɩ b sũura pʋgd wẽng bala, wakat buud fãa.

⁶ Dẽ me la Soaala-Wẽnd zab ne b menga, b sẽn naan ninsaal n ning-a tẽng zug yĩnga; b sũur sãama wʋsgo,

⁷ tɩ b yeele: M na n menesa ninsaal m sẽn naana tẽng zugu ka, la m na n naaga yẽ ne rũm-bɛda, rũm-bõonesã la yĩngr luiili n menese; m sũur ka le noom m sẽn naan-ba ye.

⁸ Sã n ya a Nowe, yẽ paamame tɩ b yals ne b nimbãan-zoeerã tɩ b ka na n maan-a bũmb ye.

⁹ A Nowe buuda kibar la woto: A Nowe yɩɩ nin-sõngo la nin-tɩrga, a taaba fãa sʋka, a zamaana rãmb fãa sʋka, la a ra pʋgda Wẽnd, wala b sẽn date.

¹⁰ A kamb yɩ-la a tãabo: a Sɛm, a Kam la a Zafɛt.

¹¹ A Nowe wakatẽ, Wẽnd mikame tɩ tẽnga sãamame, tɩ zamaana lebg pãn-tõog zamaana.

¹² Wẽnd gesame la b yãeeme tɩ tẽnga sãamame, ned ba a ye ra ka le tũud so-sõng tẽng zug ye.

¹³ Woto la Wẽnd yeel a Nowe: «M yalsa dũni wãab m yamẽ tɩ ninsaal pids-a-la ne wẽnem la pãn-tõogo; m na n naaga ninsaal ne tẽngã n wã zãnga.»

Koom koglga kaabo

¹⁴ Naaba-Wẽnd yeela a Nowe: «Bao ra-pegd sẽn tõe n gõd n maan koglg. Kẽ a pʋgẽ n maan do-bõonego, n gãneg sũud b pʋgẽ la yɩnga.

¹⁵ Ad koglga sẽn na n maan to-to: woglma na n yɩɩ kãntɩɩs kobs-tã, yalma kãntɩɩs pis-nu, zãndlma kãntɩɩs pis-tã.

¹⁶ B le yeela a Nowe: Ka yĩngrã n mumdgi, la f ning kʋɩleng kɩreng a ye; rota rogenda taab naoor a tã.

¹⁷ Ko-kẽeng la m na n sik tẽnga zugu, n sãam bõn-vɩɩl fãa; tẽng zug bõn-yooda fãa tog n kiime.

¹⁸ M na n yõga zood ne foom. Kẽ koglga pʋga, foo ne f paga la f kamb ne b pagba.

¹⁹ Bõn-vɩɩl la bũmb fãa sẽn ya neongo, rũmsa fãa sʋka tũus-ba, a yiib-yiibu, raoog la yãanga, n kẽes-b koglga pʋga, tɩ b naag foom n põse.

²⁰ Luiil buud fãa, rũng buud fãa, tẽnga rũm-kɩdsa buud fãa, raoog la yãang la f na n yãke tɩ b naag foom n paam n põse.

²¹ Ning pãng n paam dɩɩb n bĩng foom ne bãmb yĩnga.»

²² A Nowe sɩd maana Wẽnd sẽn yeel-a wã fãa.