Sɩngrẽ 5 - SEBR SÕNGO

A Adem buud yalgre

¹ A Adem dooga neb la woto: Wẽnd sẽn naan ninsaal daare, b kõ-a-la bãmb meng wẽnego.

² B naana raoa, n naan paga; b ning-b-la barka, n bool-ba, b naanega raare, tɩ ninsaalba.

³ A Adem yʋʋm sẽn waa n pid koabg la pis-tã, a roga biig sẽn wẽnd a menga, sẽn tar a wẽnego la a pʋda a yʋʋr t'a Sɛt.

⁴ A Sɛt dogem poore, a Adem le vɩɩnda yʋʋm kobs-nii la a roga kom-dibli la kom-pugli.

⁵ A Adem pʋlemd zãng yɩɩ yʋʋm kobs-wɛ la pis-tã, t'a yaool n ki.

⁶ A Sɛt yʋʋm sẽn waa n ta koabg la a nu, a roga a Enos.

⁷ A Enos dogem poore, a Sɛt paama yʋʋm kobs-nii la a yopoe, n dog kom-dibli la kom-pugli.

⁸ A Sɛt sẽn waa n na n ki t'a yʋʋm yaa kobs-wɛ la piig la a yiibu.

⁹ A Enos yʋʋm sẽn waa n ta pis-wɛ, a doga a Kena.

¹⁰ A Kena dogem poore, a Enos paama yʋʋm kobs-nii la piig la a nu la a roga kom-dibli la kom-pugli.

¹¹ A sẽn waa n na n ki t'a yʋʋm yaa kobs-wɛ la a nu.

¹² A Kena yʋʋm sẽn waa n ta pisopoe, a doga a Maalaleyɛl.

¹³ A Maalaleyɛl dogem poore, a paama yʋʋm kobs-nii la pis-naase, t'a na n dog kom-dibli la kom-pugli.

¹⁴ A sẽn waa n na n ki t'a yʋʋm yaa kobs-wɛ la piiga.

¹⁵ A Maalaleyɛl yʋʋm sẽn waa n ta pisoob la a nu, a doga a Yerɛd.

¹⁶ A Yerɛd dogem poore, a Maalaleyɛl paama yʋʋm kobs-nii la pis-tã la a doga kom-dibli la kom-pugli.

¹⁷ A yʋʋma fãa zãng yɩɩ kobs-nii la pis-wɛ la a nu t'a yaool n ki.

¹⁸ A Yerɛd yʋʋm sẽn waa n ta koabg la pisoob la a yiibu, a roga a Enok.

¹⁹ A Enok dogem poore, a Yerɛd paama yʋʋm kobs-nii la a doga kom-dibli la kom-pugli.

²⁰ A yʋʋma zãng fãa yɩɩ kobs-wɛ la pisoob la a yiibu t'a yaool n ki.

²¹ A Enok yʋʋm sẽn waa n ta pisoob la a nu, a doga a Metusela.

²² A Enok yɩɩ wẽn-tũuda. A Metusela dogem poore, a paama yʋʋm kobs-tã la a doga kom-dibli la kom-pugli.

²³ A Enok yʋʋm fãa yɩɩ kobs-tã la pisoob la a nu.

²⁴ A tũu sor ning Wẽnd sẽn date la a waa menema dũniya la yɩɩ Wẽnd n loog ne-a.

²⁵ A Metusela yʋʋm sẽn waa n ta koabg la pis-nii la a yopoe, a doga a Lemɛk.

²⁶ A Lemɛk rogem poore, a Metusela paama yʋʋm kobs-yopoe la pis-nii la a yiibu la a roga kom-dibli la kom-pugli.

²⁷ A Metusela yʋʋma fãa zãng yɩɩ kobs-wɛ la pisoob la a wɛ t'a yaool n ki.

²⁸ A Lemɛk yʋʋm sẽn waa n ta koabg la pis-nii la a yiibu, a doga biiga.

²⁹ A pʋda a yʋʋr tɩ Nowe n yet a sũuri: «Bi-kãnga n na n yols-do, d naong la d tʋʋm tood pʋgẽ, tẽng sẽn ka le be bark pʋgẽ.»

³⁰ A Nowe dogem poore, a Lemɛk paama yʋʋm kobs-nu la pis-wɛ la a nu la a roga kom-dibli la kom-pugli.

³¹ A Lemɛk yʋʋma zãng yɩɩ kobs-yopoe la pisopoe la a yopoe t'a yaool n ki.

³² A Nowe yʋʋm sẽn waa n ta kobs-nu, a doga a Sɛm, a Kam la a Zafɛt.