Sɩngrẽ 47 - SEBR SÕNGO

Gosen kosgo

¹ A Zozɛf tɩ yeela Ezipt dĩma woto: «M ba la m kẽem dãmb yii Kanaã tẽng n wa. B waa ne b rũmsi, bɛd la bõonego, b waa ne b sẽn tar fãa la b siga Gosen.»

² A kẽem dãmb a nu n yãag-a dĩma nengẽ.

³ Dĩma soka a kẽem dãmbã: «Bõe n ya yãmb tʋʋmde?» Tɩ b leoke: «Yãmb yemsã gũuda rũmsi. D tʋmda d ba rãmb tʋʋmde.»

⁴ B yeela dĩma yɛsa: «Tõnd waa n kẽe tẽngã tɩ yamd ka le ket Kanaã tẽnga y yemsa sẽn na n paam n kõ b piis ye; koma zabda wʋsg ne Kanaã rãmba; d kotame tɩ y kẽes-d Gosen.»

⁵ Dĩma yeela a Zozɛf: «F ba ne f kẽem dãmba wa-la f nengẽ.

⁶ Ad Ezipt tẽn-peelem sẽn dɩg f taoore. Kẽes f ba la f kẽem dãmba zĩig ning sẽn tar bʋgsem n yɩɩda. B tɩ kẽ Gosen. Fo sã n mi tɩ neb bee bãmb sʋka n tar yam n yɩɩda, yãk bãmb dãmb tɩ b gũ mam meng rũmsi.»

⁷ A Zozɛf talla a ba, a Zakoob, n wa dĩma taoore. A Zakoob ninga dĩma barka,

⁸ tɩ dĩma yeel-a: «Y yʋʋm taa wãna?»

⁹ A Zakoob leokame: «M yʋʋm tẽng zug ka, yaa koabg la pis-tã, m ka paam vɩɩm noog la yõ-wok waa m saam-dãmb sẽn paam a soabã ye.»

¹⁰ A Zakoob pʋʋsa dĩma la a paama sor n looge.

¹¹ A Zozɛf bao tẽng n kẽes a ba la a kẽem dãmba; a kẽes-b la zĩig ning sẽn da ya sõng n yɩɩda, wala dĩma sẽn da wilgã: yɩɩ Ramsɛs.

¹² A Zozɛf baoo rɩɩb n kõ a ba la a kẽem dãmba, a buuda gilli; a kõo sẽn sek zak fãa ne a neba.

A Zozɛf sɩlem baafo

¹³ Rɩɩb waa n sɛɛ zãng Ezipt tẽnga; koma da bee wʋsgo n namsd Ezipt ne Kanaã rãmba.

¹⁴ Ezipt la Kanaã rãmb sẽn tar pʋlb n tar pʋlbo, b ligda fãa waa n yii bãmb nugẽ n tɩ tigs a Zozɛf nengẽ. A Zozɛf rɩka ligd kãng n kɩs dĩma t'a bĩng a zakẽ.

¹⁵ Ligd sẽn waa n yi Ezipt la Kanaã zãnga, b bʋʋga a Zozɛf n yeel-a: «D data rɩɩbo, yãmb na sake n bas tɩ kom kʋʋd tõnd tɩ y getẽ? Tõnd ka le tar ligd ye.»

¹⁶ T'a Zozɛf yeele: «Ligd sã n ka be bɩ y wa ne y rũmsi tɩ m na kõ y koodo.»

¹⁷ Tɩ b tall b rũms n wa, b wiidi, b bʋʋse, b piisi, b bõeense. T'a Zozɛf kõ-b koodo. Dɩlla yʋʋmd kãnga, yaa b rũmsa la a reeg yã la a kõ-b koodo.

¹⁸ Yʋʋmda sẽn vẽke, b le lɛɛg n waa a Zozɛf nengẽ, n yeel-a: «D ka na n solg-y ye, ligda da zoe n sɛɛme la rũmsa me sɛɛme, sẽn ket marsã, yaa d mens la d pʋto.

¹⁹ La d yɩta a wãn n sak n bas d mens la pʋto tɩ kom kʋ tõnd yãmb nifẽ? Deeg-y d mense la d pʋto la y kõ-d dɩɩbo, woto tõnd na lebg y dĩma yem-daado. Kõ-d bõn-buud tɩ d bʋde n tõog n vɩɩnde la d da ki ye, tɩ tẽnga ra le sãam n paas ye.»

²⁰ Yaa woto la Ezipt tẽng pʋtã lʋɩ dĩma soolmẽ: ned kam fãa da rɩka a pʋʋg n koos n na n põs kom la yaa woto la dĩma waa n soog-b zãnga.

²¹ Ezipt tẽng tõr neba lebga yem-daado.

²² Yaa maan-kʋʋdba pʋt bala n ka kẽ dĩma soolmẽ; dĩma da kõt-b-la ligdi tɩ b tar n dɩlgd b mense; bãmb sẽn tar n dɩtẽ wã yĩnga, b pa koos b pʋt ye.

²³ A Zozɛf yeela neba marsã: «Yãmb ne y pʋtã lebga dĩma soolem, woto wã deeg-y ka-buud n tɩ bʋd y pʋtã.

²⁴ Y sã n wa tigs y koodã, y na welg-a pʋɩɩr a nu n yãk a ye n kõ dĩma, n tall a naase; ka-buud na n yii be, yãmb dɩɩb na n yii be, yãmb sẽn get b rãmb fãa yell dɩɩb na n yii be.»

²⁵ B leokame: «Yãmb fãaga tõndo la Wẽnd na kɩt tɩ y kell n pʋg-d ne y sõngre tɩ d yɩ dĩma tʋʋm-tʋmdba.»

²⁶ A Zozɛf yalsa noor b sẽn ket n deegd Ezipt tẽng rũnna: pʋɩɩr a nu soaba yaa a dĩma n so. Maan-kʋʋdba pʋt bal la dĩma ka sooge.

A Zakoob yaoolem koeese

²⁷ A Israyɛl kamba paa Ezipt, Gosen tẽnga, beenẽ b paama pʋto, b roga kamb wʋsgo tɩ b buuda piuugi.

²⁸ A Zakoob paama yʋʋm piig la a yopoe Ezipt tẽnga, a yʋʋma sõor yɩɩ koabg la pis-naase la a yopoe.

²⁹ A Israyɛl sẽn waa mik t'a pãnga sɛɛ zãnga, a boola a Zozɛf n yeel-a: «Fo sã n ket n nong maam bɩ f kell n wilg-m tɩ f rat-m-la ne neere la f rɩk f nug n sɩɩs m gerã la f wẽen tɩ f kõn mum maam Ezipt tẽng ye.

³⁰ M sã n kaẽ bɩ y tall m yĩngã n tɩ mum m ba rãmb yaoogẽ.» Dẽ la a Zozɛf leok a ba: «M na maan wala y sẽn date.»

³¹ A ba wã paasame: «Wẽene!» La a wẽename, la dẽ t'a Israyɛl sulga a neng a gãag zugu n na n pʋʋs a Zozɛf barka.