Sɩngrẽ 46 - SEBR SÕNGO

A Zakoob rabda Ezipt

¹ A Israyɛl yii ne a sẽn tar fãa. A taa Beerseba n kʋ maand n waoog a ba, a Izaak, Wẽnnaam.

² Wẽnnaam lik-a-la yʋngo n yeel-a: «Zakoob, Zakoob!» T'a leoke: «M bee ka!»

³ Tɩ Wẽnd yeele: «Maam la Wẽnnaam, mam la f ba, a Izaak Wẽnnaam da maan dabeem ne Ezipt kẽnd ye, yaa be la m na n kɩt tɩ f buud lebg bu-kãsenga.

⁴ Maam n na n yãag foom Ezipt tẽnga, maam n na n leb n tɩ yiis-f be la a Zozɛf n na n mum f nini.»

⁵ A Zakoob yii Beerseba; a kamba kɩtame tɩ b ba, b kom-bõonego la b pagb kẽ bilim-bilm dĩma sẽn da tool so-toaka yĩnga.

⁶ B zɩ-la b rũmsi la b sẽn da tar fãa Kanaã tẽnga n tɩ kẽ Ezipt.

⁷ A Zakoob ne a kamba, a yagense, a kom-pugli, a kom-dibli, b buuda fãa tɩ kẽe Ezipt tẽnga.

A Zakoob buudu

⁸ Ad-a Israyɛl (a Zakoob) kamb sẽn tũ-a n wa Ezipt tẽnga: a Rubẽ, yẽ la kãsma;

⁹ Ad-a Rubẽ kamba: a Enok, a Palu, a Ekrõ, a Karmi.

¹⁰ A Simeõ kamba: a Yemuwɛl, a Yamin, a Oad, a Yakẽ, a Sowar la a Sol (yẽ ma yɩɩ Kanaã biiga)

¹¹ A Levi kamba: a Zersõ, a Keyat, a Merari.

¹² A Zɩɩda kamba: a Ɛr, a Ona, a Sela, a Perɛk, a Zera. A Ɛr ne a Ona da maana yõor Kanaã tẽnga la a Perɛk kamba yɩ-la a Esrõ la a Amul.

¹³ A Isakar kamba: a Tola, a Ypva, a Yasub la a Simrõ.

¹⁴ A Zabulõ kamba: a Serɛd, a Elon, a Yaleyɛl.

¹⁵ A Zakoob doga bãmb fãa Padã-Aram, b ma yɩ-la a Lea. Sẽn paase, yaa a Dina; b zãng fãa, yaa pis-tã la a tã.

¹⁶ A Gad kamba: a Sefõ, a Agi, a Suni, a Esbõ, a Eri, a Arodi, a Areli.

¹⁷ A Asɛr kamba: a Yimnã, a Yiswa, a Yiswi, a Beria ne b tão a Sera. A Beria kamba: a Ebɛr la a Malkiyɛl.

¹⁸ Bãmb fãa ma yɩ-la a Zilpa, pag ninga a Labã sẽn kõ a Lea t'a Lea rɩk n kõ a Zakoob. B fãa sõor yaa piig la a yoobe.

¹⁹ A Zakoob pag, a Rasɛl kamba: a Zozɛf ne a Bẽnzame.

²⁰ Ezipt tẽnga, a Zozɛf roga a Manase la a Efrayim; bãmb ma la a Asnat, On maan-kʋʋd, a Potifera, biiga.

²¹ A Bẽnzame kamba: a Bela, a Bekɛr, a Azbɛl, a Gera, a Naama, a Eyi, a Ros, a Mupin, a Upim la Ard.

²² Bãmb ba la a Zakoob la a Rasɛl yagense. B yaa piig la a naase.

²³ A Dã biiga: a Usim.

²⁴ A Neftali kamba: a Yasiyɛl, a Guni, a Yesɛr, a Silem.

²⁵ Bãmb fãa ma la a Bila, pag ning a Labã sẽn dɩk n kõ a Rasɛl, t'a Rasɛl dɩk n kõ a Zakoob. B sõor yaa a yopoe.

²⁶ Neb niyns fãa sẽn yaa a Zakoob kamb bɩ a yagense n tũ n wa Ezipt tẽng yaa pisoob la a yoobe; la a kamba pagb ka naag n sõd ye.

²⁷ Yaa kamb a yiib bala la a Zozɛf dog Ezipt tẽnga. A Zakoob kamb fãa sẽn wa Ezipt tẽng yaa pisopoe.

A Zozɛf reegda a buudu

²⁸ A Israyɛl tʋma a Zɩɩda taoore t'a tɩ yeel a Zozɛf tɩ b seg taab Gosen; sɩda yaa Gosen la b ta yã.

²⁹ A Zozɛf kɩtame tɩ b sog a bilim-bilma wiidi t'a zomb n tɩ seg a ba Gosen; b sẽn yãe taaba, b mogba taaba, n tar yãbre.

³⁰ T'a Israyɛl wa yeel a Zozɛf: «Marsã m tõe n loogame tɩ f keta ne yõore la m le paam n yãenda f nenga.»

³¹ A Zozɛf yeela a buuda zãnga: «M na n lʋɩɩ taoore n tɩ togs dĩma woto: ‹Ade, m kẽem-dãmb la m buudã sẽn da be Kanaã tẽng n wa m nengẽ.

³² M na wilg-a tɩ b yaa rũm-kɩɩmba, b talla fãa n wa ka, b rũmsi, bɛd la bõonego, la b sẽn so fãa.›

³³ Dĩma sã n wa bool yãmb n sok yãmba: ‹Yãmb tʋʋmd la bʋgo?›

³⁴ Bɩ y yeele: ‹Y yemsa gũu rũmsi b yãadmẽ n tãag dũnna. B ba rãmb me kɩɩma rũmsi.› Bãng-y tɩ sã n ya woto, y na tõog n pa Gosen.» Bãng-y tɩ Ezipt tẽng rãmb pa nong rũm-kɩɩm ba sẽn paoode.