Sɩngrẽ 44 - SEBR SÕNGO

B rõta a Bẽnzame wagdem

¹ A Zozɛf kõ a sõgen-kãsenga noore: «Pids-b yonda ne koodo wala b sẽn tõe n zɩ tɛka, la lebs ned kam fãa ligd n sui pʋgẽ.»

² A rɩka wanzurf wũmbla n naag ne a Bẽnzame ligdã n sui yolgẽ. Sõgna maana wala a Zozɛf sẽn yeelã.

³ Beoog sẽn vẽege, b bas-b lame tɩ b looge ne b bõeense.

⁴ B ka paam n zãag ye, t'a Zozɛf yeela a sõgna: «Yik n zoe n pʋg-ba la f gom ne b woto: bõe tɩ b maan yãmb neere tɩ yãmb lebsd wẽnga?

⁵ Bõe tɩ yãmb dɩk m zu-soaba sẽn tar wũmbl ning n yũud a rãama la a lɩkd be n bʋgd a bagrã? Y sẽn maana sɩd yaa wẽnga.»

⁶ Sõgna wudg n paam-b lame la a taas-b-la a zu-soaba koɛɛga.

⁷ Dẽ la b leok yã: «Yaa bõe la d zu-soaba gomd woto? F yemsã yɩta a wãn n maan yell a woto fãa?

⁸ Ade, ligda meng tõnd sẽn tees n yãend d yonnẽ, tõnd tall-a lame n wa, d na n yɩɩ wãn n wa zuud f soaala sãnem bɩ a wanzurfu?

⁹ B sẽn na n yãend b bũmba ned ninga yolgẽ bɩ b kʋ yẽ soaba la b kẽes tõnd fãa yembdo.»

¹⁰ Sõgna leok-b lame: «Bɩ y maan wala yãmb sẽn yeelã, d sẽn na n yãend bũmbã ned ninga yolgẽ, yẽ soab na lebg mam yamba la sẽn ket-ba na loog ne laafi.»

¹¹ Tao-tao bal tɩ ned kam fãa sika a yolgo n lok-a.

¹² Sõgna sɩnga kẽem dãmba vɛɛsgo n wat yao-zʋʋgã la a yãenda bũmbã a Bẽnzame yolgẽ.

¹³ B kẽesa b futu la b zɩlga b bõeense n le rɩk na-tẽnga sore.

¹⁴ A Zɩɩda ne a ba-biisã kẽe a Zozɛf zakẽ; a Zozɛf da ket n bee be la b wõgemda a taoore.

¹⁵ T'a Zozɛf sok-ba: «Yaa bõe la y sẽn maana? Yãmb ka mi tɩ ned wa maama bagr neeme la?»

¹⁶ A Zɩɩda leokame: «Tõnd na n yeela d zu-soaba tɩ bõe? Gomd bʋg la d na n togs n paam bʋʋm, ad-y yaa Wẽnd meng b toor n luk y yemsã bãongo; woto wã d fãa na n lebga yãmb yem-daado, tõnd ne sẽn maana yellã.»

¹⁷ A Zozɛf leok-b lame: «M ka tõe n maan boto ye, sẽn ket-ba na n leba b ba nengẽ ne laafi.»

A Zɩɩda koɛɛga

¹⁸ Dẽ la a Zɩɩda yik n kolg a Zozɛf n yeel-a: «M naaba, y kabre! Kelg-y mam koɛɛg, kelg-y ne sũ-maasem, yãmb sẽn tar Ezipt dĩma meng naama.

¹⁹ Yaa woto la m naaba ra sok tõndo: ‹Yãmb ba ketame? Yãmb tara yao?›

²⁰ Tɩ tõnd yeel d zu-soaba: ‹D tara ba sẽn kʋʋle la yao-zʋʋga, a kʋʋlem biiga; a kẽem n ka be, t'a lebg a ma-bi-yende la a ba wã nong-a-la wʋsgo!›

²¹ Yãmb yeela y yemsã: ‹Tall-y yẽnda n wa tɩ m yãee ne m nifu.›

²² Wakat kãnga tõnd leok-y lame: ‹Yao wã ka tõe n loog n bas nin-kẽema ye, a sã n zãag ne-a, ba wã na n kiime.›

²³ La yãmb leoka tõndo: ‹Y yao-zʋʋga sã n ka tũ n wa, m ka rat n le yãend-y m taoor ye.›

²⁴ Yaa woto la tõnd kul n tɩ togs d ba, yãmb yamba.

²⁵ Yaa woto me la a waa n baas n yeel tõndo: ‹Tɩ ra-y kood n wa,›

²⁶ tõnd leokame: ‹Tõnd ka tõe n leb be ye, d sã n lebe, dẽnd d yao-zʋʋga tũ, tɩ tõnd kõn tõog n ta neda taoore, yao-zʋʋga sã n ka tũ ye.›

²⁷ Tõnd ba wã, yãmb yamba, paasame: ‹Yãmb miime tɩ b yɩ-la b yiib bala b ma pʋgẽ,

²⁸ a ye menemame la m tẽedame tɩ bõn-nind n sɩɩg-a wa rũnga, la sẽn ta marsã, m nif ka le teeg-a ye.

²⁹ Yãmb sã n loog ne ada tɩ yell pak-a, y na kɩt tɩ kʋʋlem la sũ-sãang kãseng kʋ-ma, la rẽ me yɩta y yelle.›

³⁰ Dɩlla mam sã n leb m ba wã nengẽ tɩ biig ninga a sẽn nong wʋsgã yaool n pa ka,

³¹ ad-a sã n bao-a n konge, yaa yãmb yemsã b toore n na n kɩt tɩ d ba wã zug sẽn pelgã sig bʋg-tẽnga ne sũ-sãang kãsenga.

³² Yaa rẽ la m yeel yã: ‹Yao wã yell doga m zugu, m sã n ka lɛɛg n wa ne-a, bɩ m dɩ rẽ taale, m vɩɩma fãa pʋgẽ.›

³³ Sẽn ket marsã, yaa mam pa ka bala, n lebg yamba tɩ yao wã loog ne a kẽem dãmba.

³⁴ M yɩta a wãn n leb m ba nengẽ, biiga sã n ka tũ? M pa rat tɩ m nif yãend yell ning sẽn na n pak m ba wã ye.»