Sɩngrẽ 40 - SEBR SÕNGO

¹ Sẽn yɩ bilfu, neb a yiib n beeg dĩma beegr kãsenga; yaa sẽn geta rãama yelle la sẽn geta rɩɩba yelle.

² Dĩma sũur puuga ne bãmb b yiibã al wʋsgo.

³ A sui-b-la roogo; ro-kãng pʋg me la b ra kẽes a Zozɛf. Gũudba kãsem n da so ro-kãng gesgo.

⁴ Gũudba naab kosa a Zozɛf t'a ges neb a yiiba me yelle. B kaoosa roogẽ wã bilfu,

A Zozɛf wilgda zãmsd võore

⁵ Yʋng a ye, sẽn wata ne dĩma rãama la sẽn wata ne dĩma rɩɩbã b sẽn yõk n sui roogã paama zãmsdo. Zãmsda da wilgda ned kam yell sẽn na n yɩ a soaba.

⁶ A Zozɛf taa b nengẽ yibeoogo la a mik-b-la ne sũ-sãanga.

⁷ T'a sok-ba: «Yaa bõe tɩ y nens gãnem dũnna?»

⁸ Tɩ b yeele: «Tõnd zãmsame la d ka tar ned sẽn na n togs tõnd d zãmsda võor ye.» A Zozɛf yeel-b lame: «Bãng-y tɩ sɩda, yaa Wẽnd n tar bũmb fãa võore, la yãmb ye n togs maam y zãmsdã.»

⁹ Rãama kɩtã n sɩnge, a yeelame: «Mam zãmsame tɩ tɩɩg sẽn womd biisi tɩ b tõsd n maand dãam n yɛs mam taoore.

¹⁰ Will a tã n tão tɩɩga sɛɛga, n tob vãado, n ning puudu, n ning sib gĩin la gĩna wẽneg n moogame.

¹¹ M da zãada Ezipt dĩma rãam wamd m nugẽ, m fãsga tɩɩga biis n wẽk wamdẽ wã n dɩk wamna n sagl dĩma nugẽ.»

¹² A Zozɛf yeel-a lame: «Ad-f zãmsda võore: will a tã makda dasem a tã.

¹³ Keta rasem a tã tɩ dĩma yiis foom roogo tɩ f le rɩk f pĩnd tʋʋmde; foom n na n dɩk rãama wamd n le sagl dĩma nugẽ wala f sẽn da maande.

¹⁴ La f zug sã n yɩ noogo, bɩ f ra yĩm m yell ye, tẽeg n gom m yelle ne f zu-soabã t'a yiis m doogo.

¹⁵ Mam yita Ebre rãmb tẽnga la m sẽn wa ka wã, m ka maan bũmb sẽn sek roog ye.»

¹⁶ Rɩɩba kɩta sẽn mik t'a Zozɛf leokra wẽnda gom noogo, yẽ me waa ne a sẽn zãmse. A yeelame: «Mam me zãmsa woto: M da tʋka rɩɩb pet a tã.

¹⁷ Peoog ninga sẽn da roga zugẽ wã da pida ne dĩma rɩɩb buud fãa la luiili waa n dɩt-b-la m zugẽ.»

¹⁸ A Zozɛf yeel-a lame: «Fo zãmsda võor la woto: pet a tãaba makda dasem a tã.

¹⁹ Dɩlla keta rasem a tã tɩ dĩma zẽk foo n zʋʋg f sẽn date. A na n yiisa foo n tɩ luul tɩ luiili tõs f nemdo.»

²⁰ Sɩda, dasem sẽn maan a tã, dĩma moona kibsa a rogem tẽegr yĩnga, a segla rɩɩbo n bool nin-bɛda fãa, n bool rãama kɩta la rɩɩba me kɩta.

²¹ A lebsa rãama naab a pĩnd zĩigẽ la yɩɩ yẽnda n pʋdg rãama n kõ-a.

²² A kɩtame tɩ b yõk rɩɩba kɩta n luuli, wala a Zozɛf sẽn da togsã.

²³ Bãng-y tɩ rãama kɩta ka maan tẽegr ye, a yĩma a Zozɛf yell fasi.