Sɩngrẽ 4 - SEBR SÕNGO

A Kayẽ ne a Abɛl kibare

¹ A Adem bãnga a paga, a Awa, t'a Awa rɩk pʋga, n dog biiga, t'a yet tɩ Naaba-Wẽnd maasem yĩnga, a paam n doga ninsaala, n pʋd a yʋʋr a Kayẽ.

² A roga a Kayẽ yẽer, a Abɛl. A Abɛl da kɩɩmda rũm-bõonese. A Kayẽ da koodame.

³ Sẽn wa n beẽ, a Kayẽ yãka a kood n kõ Soaala-Wẽnd.

⁴ La a Abɛl me baoo rũmsa kom-dẽems n kõ Soaalã. A naaga rũmsa kaam n kõ-ba. A Abɛl ne a kũuna n ta bãmb yam.

⁵ A Kayẽ ne a kũuna pa ta b yam ye. A Kayẽ sũur puuga wʋsgo, t'a neng gãnem.

⁶ Dẽ la Soaala-Wẽnd sok a Kayẽ: «Bõe tɩ f sũur puug tɩ f neng gãneme?

⁷ Tuubg sã n kẽ f sũurẽ, f neng kõn doog sɩda? La tuubg sã n ka f sũurẽ, ka wẽng n yɛs f rignoorẽ wa bõn-ninda n gũud foo, tɩ na n lebg pakr ne foo tɩ f wɩsg f meng n tõog-a bɩ?»

⁸ A Kayẽ baas n yeela a yao, a Abɛl: «Wa tɩ d yi kɛɛnga.» B sẽn paam n zãage, a Kayẽ wudg n kẽe a Abɛl n kʋ-a.

⁹ Soaala-Wẽnd soka a Kayẽ: «F yao, a Abɛl, bɛɛ?» T'a na n leoke: «M mi-la, m ya-la m yao wã gũud la?»

¹⁰ Tɩ Soaala-Wẽnd yeele: «Yaa bõe la f maan yã? M wʋmda f yao wã zɩɩma koɛɛga; koɛɛga kelemd-m-la tẽngẽ tɩ sãt yɩnga.

¹¹ Woto wã m yãkda f barka la m yiisd-f-la tẽng ning sẽn sakd koodã, t'a yaaga a noor n yũ f yao wã zɩɩma f meng nug sẽn daage.

¹² F ko tẽnga me, a kõn wom f yĩng ye; fo na n saadame n gõod n pɩkd moogo.»

¹³ T'a Kayẽ na n leoke: «M sɩbgra zɩsame n yɩɩd m pãnga.

¹⁴ Ade! Y sã n dig-m rũnna n zãag ne tẽn-kãnga, d neng kõn le tees taab ye. M na n lebga sãan n saad n pɩkd moogo la sẽn sega maam fãa na n kʋ-m lame!»

¹⁵ Dẽ la Soaala-Wẽnd yeel-a: «Bãng tɩ sẽn na n kʋ a Kayẽ, na n deega sɩbgr naoor a yopoe.» La Soaala-Wẽnd maka a Kayẽ ne makre sẽn na yɩlẽ tɩ sẽn na n seg-a fãa da lebg a kʋʋd ye.

¹⁶ A Kayẽ yii Soaala-Wẽnd taoore, n sɩng n gilgd yaare, Eden yaanga, Nod tẽnga.

A Kayẽ roogo

¹⁷ Sẽn waa n beẽ, a Kayẽ bãnga a paga t'a rɩk pʋg n dog a Enok. A Kayẽ lebga tẽn-meta la a sẽn me tẽng ningã, a pʋd-a-la Enok, wala a biigã.

¹⁸ A Enok doga a Irad, t'a Irad dog a Mewuyaɛl, t'a Mewuyaɛl dog a Lemɛk.

¹⁹ A Lemɛk pagb yɩ-la b yiibu: pipi paga la Ada, a yiib soab la Sila.

²⁰ A Ada biig la a Yabal, yẽ la sẽn be-b wetẽ n kɩɩmd dũmsa yaaba.

²¹ A yao la a Yubal; yẽ la sẽn wẽed-b pɛndga la sẽn peebd-b mɛɛnem yaaba.

²² A Sila me biig la a Tubal-Kayẽ; a Tubal-Kayẽ la sẽeb sẽn tʋmd-b kut bɩ yõgs sẽn tʋmd-b zũud yaaba. A Tubal-Kayẽ tão yɩ-la a Naama.

²³ A Lemɛk yeela a pagb a yiibã: «Kelg-y m koɛɛga, Ada la Sila, Lemɛk pagba, kelg-y m koɛɛga: m sẽn paam sãmpogr ned a ye nengẽ, m kʋ-a lame la bi-bilfr sẽn kãdg-ma, m yãka a yõore.

²⁴ Bãng-y t'a Kayẽ kʋʋd sã n sɩbgd naoor a yopoe, a Lemɛk kʋʋd yaa pisopoe la a yopoe.»

A Sɛt ne a kamba

²⁵ A Adem sẽn bãng a paga, a doga biig a to n pʋd a yʋʋr a Sɛt t'a goma ne a meng woto: «Wẽnd kõ-m-la biiga n ledg a Abɛl.» A Abɛl la rao ning a Kayẽ sẽn dag n kʋ wã.

²⁶ A Sɛt me waa n doga biiga n pʋd-a t'a Enos. Wakat kãng la b sɩng n na n waoog Soaala-Wẽnde.