Sɩngrẽ 39 - SEBR SÕNGO

A Zozɛf taa Ezipt tẽnga

¹ Yaa Ezipt tẽng la b taas a Zozɛf. A Potifar da raa-a-la Ismayɛl yagensa nengẽ. Ezipt dĩma yam da kẽ-la a Potifar la yẽ la dĩma gũudba tãnsoaba.

² Soaala-Wẽnd zĩnda ne a Zozɛf, bũmb fãa sak-a lame, a pa-la a Potifar zakẽ.

³ Nin-kãnga yãendame t'a Zozɛf yĩnga, Soaala-Wẽnd da bee ne-a tɩ bũmba fãa sakd-a,

⁴ a ra nong-a lame, a rɩka a zak naam la a sẽn tar fãa n bas ne-a.

⁵ Ezipt raoã sẽn dɩk a zak naam la a sẽn tar fãa n bas ne a Zozɛf tɛka, Soaala-Wẽnd ninga a zak barka. Barka siga a sẽn da tar fãa, a zak wala a pʋto.

⁶ A sẽn dɩk fãa n bas ne a Zozɛf, a ka le bʋ bũmb ba a ye poorẽ ye, tʋʋmd ning a sẽn da kell a meng yĩnga, da yaa a menga rɩlgre bala. A Zozɛf ra yaa rao sẽn pidi la a neng ra sakda gesgo.

A Potifar pʋg-yaalga

⁷ Sẽn waa n beẽ, a Zozɛf zu-soaba pag yam waa n sog-a lame. Paga yeelame: «Zefo, kẽ ne maam!»

⁸ A Zozɛf zãgsame la a yeel-a lame: «M zu-soaba maana yard ne maam, n pa le bʋʋd bũmb ba a ye, n dɩk fãa n gũnug-ma.

⁹ A zaka pʋga a ka tar waoor n yɩɩd maam ye, a ka yet tɩ m maan a ni ne bũmb ba a ye sã n ka ne foo, a paga. Sẽn ya woto wã, m na n yɩɩ wãn n tũ fo raab wẽnga la m beeg Wẽnde?»

¹⁰ Beoog sẽn vẽeg fãa, paga ra ket n gomda ne a Zozɛf la a kell n zãgsame, a pa sak n gãand ne-a ye.

¹¹ Daar a ye, a Zozɛf kẽe a Potifar zakẽ n tʋmd a tʋʋma. Dakõor ba a ye da ka pa zaka pʋg ye.

¹² Paga gãda a fuug n yeel-a: «Gãand ne maam!» La a Zozɛf basa fuugã a nugẽ n zoe n yi.

¹³ A sẽn mik t'a Zozɛf basa a fuug a nugẽ n zoe n yi,

¹⁴ a boola a sõgen-kamba n yeel-ba: «Ges-y, m sɩda waa ne Ebre kãnga, t'a rat n yog ne maam; a tol n kolgame t'a na n yõg-ma la mam kelmame tɩ sãde.

¹⁵ A sẽn mik tɩ m zẽka m koɛɛg n boondẽ, a bas a fuug m nugẽ la a zoeeme n yi.»

¹⁶ Paga rɩka fuugã n dɩgl a sɛɛgẽ n gũud a zu-soaba waoongo.

¹⁷ La a sɩda sẽn wa, a goma woto: «Fo sẽn tall Ebre ning n wa ka wã kolgame n na yog ne maam.

¹⁸ M zẽka m koɛɛg n boole t'a bas a fuug m nugẽ n zoe n yi.»

¹⁹ A Potifar sẽn wʋm pagã sẽn yeelã: «Ges f yem-daoogã sẽn tʋlg bũmb ning ne maam,» a sũur yikame.

²⁰ A kɩtame tɩ b yõk a Zozɛf n kẽes roogo.

²¹ Soaala-Wẽnd sõnga a Zozɛf, b nonglma paa ne-a, ro-gũuda ka yɩ toaag ne-a ye.

²² Gũudba naab tol n yeela a Zozɛf t'a ges bi-bees a taaba yelle la bũmb sɩd da ka maand t'a ka bãng tiir ye.

²³ Tʋʋmd buud da ka le ket gũdba naab sẽn na n tʋm ye, tɩ Wẽnd da sõngda a Zozɛf t'a sẽn maand fãa baasd neere.