Sɩngrẽ 38 - SEBR SÕNGO

A Zɩɩda ne a Tamar kibare

¹ Ade, a Zɩɩda waa n basa a ba-biisã n kẽng Adulam nin-yend nengẽ la nin-kãng yʋʋr la a Ira.

² A waa n yãenda Kanaã bi-pugl sẽn boond tɩ Suwa la a rɩk-a lame n maan a paga.

³ Paga waa n dɩka pʋga n dog a biiga n bool tɩ Er.

⁴ A sẽn le rog biig a to, a pʋd-a lame tɩ Ona.

⁵ A le roga biig a to, n pʋd yẽ soab t'a Sela. Yɩɩ Kezib tẽng la a kũm yẽ rogem.

⁶ A Zɩɩda bao pag n kõ a bi-kẽeng a Er, paga da boondame tɩ Tamar.

⁷ La a Zɩɩda bi-kẽeng a Ɛr maana sẽn ka ta Soaala-Wẽnd yam tɩ b yãk a yõore.

⁸ Dẽ la a Zɩɩda yeel a Ona: «Maan sẽn tog ne f kẽema paga n dog biig n kõ-a.»

⁹ A Ona da mime tɩ biiga na n yɩ-la a kẽema biig n yaool ka yẽ biig ye. A sã n da kẽ ne pagã a da raagda zɩɩma tẽnga n mi tɩ woto a kõn dog biig n kõ a kẽem ye.

¹⁰ Dẽ me pa ta Soaala-Wẽnd yam ye tɩ b sɩbg-a ne kũum.

¹¹ A Zɩɩda kong n yeela a bi-pag a Tamar: «Leb f ba-yiri wa pʋg-kõore t'a Sela paam n bɩ.» A sẽn gom woto wã yaa a sẽn da rat tɩ bi-kãng põse, n da ki wala a kẽem dãmba; a Tamar sakame n leb a ba-yiri.

¹² Sẽn waa n kaoos bilfu, a Zɩɩda pag a Suwa kiime. A Zɩɩda sẽn yãb a pag n sɛ, a kẽnga Timna n na n tɩ wõrs a piisi, yẽ ne a zoa, a Ira, Adulam neda.

¹³ B yeela a Tamar: «Ad-a Ɛr ba wã wata Timna n na n wõrs a piisi.»

¹⁴ A Tamar yeesa fut niyns sẽn da wilgd t'a yaa pʋg-kõorã n bao peend n murs-mursi, n zĩ Enayim tẽnga kʋɩleng sɛɛga; Enayim da bee Timna sor zugu. A Tamar neeme t'a Sela lebga raoa tɩ b pa rɩk-a n kõ-a ye.

¹⁵ A Zɩɩda yãenda a Tamar la a mams-a-la ne pʋg-yoodre; a nenga ra ludame.

¹⁶ A bʋʋg-a lame n yeel-a: «Bas tɩ m kẽ ne fo!» A ra ka mi tɩ yaa a bi-pag ye. Dẽ la a Tamar sok-a: «Bõe la f na n kõ-m tɩ m sak-fo?»

¹⁷ T'a leoke: «M na tool-f bulla, m sã n ta yiri.» La paga yeelame: «M na sake, f sã n dɩk f bũmb n bas m nugẽ, tɩ bulla sã n wa bɩ f le reege.»

¹⁸ Dẽ la a Zɩɩda sok yã: «F ratame tɩ m bas bõe?» T'a yeele: «Fo sẽn tar bũmb ning n kõt kaset tɩ sẽn gʋlsa yaa foom n gʋlse, bõn-kãng ne a boabdga, n paas f rasaarã.» A sak n kɩs-a-la rẽ fãa; b bãnga taaba. A Tamar tol n wa mikame t'a tedgame.

¹⁹ Paga sẽn kul a yiri, a yãka peenna n lebs a pʋg-kõt fut n yeelge.

²⁰ A Zɩɩda tʋma a zoa, Adulam daoa, t'a tɩ kɩs bullã la a reeg a teed n wa. A sẽn kẽnge, a pa yãend paga ye.

²¹ A soka tẽnga rãmba: «Pʋg-yoodrã sẽn da be Enayim sora noorã bee ye?» Tɩ b leok-a: «Pʋg-yoodr zɩ n zĩnd ka ye.»

²² A lɛɛg n waa a Zɩɩda nengẽ n yeel t'a pa yãend-a ye, tɩ la tẽnga rãmb me kõo kaseto tɩ b zɩ n yãe pʋg-yoodr be ye.

²³ A Zɩɩda leokame: «A tall gilli; pa tog tɩ b wa laad tõnd ye; m tʋma foo ne bullã la f pa tɩ yãend-a ye.»

²⁴ Sẽn maan kiis a tã, b togsa a Zɩɩda: «Ad-f bi-paga Tamar maana yoob n tol n dɩk pʋga.» A Zɩɩda kõo noor tɩ b yiis-a tẽnga pʋga n yõog-a bugum.

²⁵ B sẽn waa n tar-a n yita, a tʋmame tɩ b tɩ yeel a Zɩɩda: «Yaa sẽn so a woto wã fãa soab biig la m tʋta. Ges-y neere n bãng ãnnã n so gʋlsg kaset kãngã, ne a boabdgã la dasaarã?»

²⁶ A Zɩɩda gesa neere la a yeelame: «Paga bʋʋm yɩɩda maam sɩda, tɩ m da pa sak n dɩk-a n kõ m biig a Sela ye.» Dẽ tɛka b ka le bãng taab ye.

²⁷ A Tamar sẽn waa n kũmd dogem, a mikame tɩ yaa kinkirsi.

²⁸ Dogma wakato biig a yembr tuda a nug yɩnga tɩ pʋg-roagsa gãd-a n loe gĩs-miuugu n yeele: «Yãoo la pipi.»

²⁹ Yẽ soaba le kẽesa a nug la yaa yao wã n yi, tɩ pʋg-roagsa yeele: «Yaa bõe n na n maan-f tɩ f fãod n yita?» Tɩ b bool-a t'a Perɛk, a Fãooda.

³⁰ A ye wã yaool n yiime tɩ gĩs miuuga loe a nugu, tɩ b bool-a tɩ Zera, a Yõadi.