Sɩngrẽ 33 - SEBR SÕNGO

A Ezayu segbo

¹ A Zakoob dooga a neng la a yãe-la a Ezayu, t'a wat ne neb kobs-naase. A weela a kambã n kõ a Lea, a Rasɛl la a roog-kamba.

² A lʋɩɩsa a Bila la a Zilpa ne b kamba taoore, t'a Lea pʋgd ne a kamba, t'a Rasɛl ne a Zozɛf pa poorẽ.

³ Yẽ meng waa n lʋɩɩ taoore, n wõgemd tẽng naoor a yopoe n yaool n ta a kẽema.

⁴ A Ezayu wudgame n seg-a n mobg-a, n mok-a-la b sɩnga yãbre.

⁵ A Ezayu sẽn yãe pagbã la kambã a sokame: «Yaa yɛ rãmb n be ne foo ka?» T'a leoke: «Yaa kamb niyns Wẽnd sẽn kõ maama.»

⁶ Doog-kamba me kolga ne b rẽnna la b me wõgemda tẽnga.

⁷ A Lea kolga ne a kamba n wõgemd tẽnga, t'a Rasɛl ne a Zozɛf me ta, b me wõgend tẽnga.

⁸ A Ezayu sokame: «Yaa bõe la f rat n maan ne rũmsa m sẽn segã?» T'a leoke: «Yaa sẽn na yɩlẽ n paam yãmb nimbãan-zoeere.»

⁹ T'a Ezayu yeele: «Mam sẽn tara zoe n labsa, m yao sõngo, tall f rẽnna.»

¹⁰ Dẽ la a Zakoob yeel yã: «Ka na n yɩ boto ye, y sã n kõ-m-la sugri, bɩ y nug reeg m kũuna. Sɩda mam sẽn saag n seg yãmbã, yaa wa ninsaal sẽn seg Naaba-Wẽnde, la yãmb reeg-m-la neere.

¹¹ Bɩ y reeg m kũuna tɩ Wẽnd maan-m-la neere tɩ bũmb fãa be m nugẽ.» A Zakoob dɩdgra yĩnga, a Ezayu sakame n deege.

¹² A Ezayu yeelame: «D sɩng kẽnde la maam n na n lʋɩ taoore!»

¹³ T'a Zakoob yeele: «M zu-soaba miime tɩ kamba ka tar pãnga, la m tog n maana gũusgu ne pe-yãansã sẽn tar kom-peendo. Kẽna sã n yɩ wʋsgo, b fãa na n kiime.

¹⁴ Sẽn ya woto wã bɩ yãmb deng taoore. Mam na n kẽna bãanem-bãanem, n tũ rũmsã la m tũ kambã n ta Seyir, m zu-soaba zakẽ.»

¹⁵ A Ezayu yeelame: «Sã n ya woto, m na n yãka m neba kẽer n bas ne foom.» T'a Zakoob leok: «Rẽ võor la bõe, m sẽn dat bũmb ningã, yaa yãmb maan yard ne m bala.»

¹⁶ A Ezayu rɩka Seyir sore badaare,

¹⁷ t'a Zakoob wẽnemd n tees Sukot; a mee zak a meng yĩnga la a tii sõg-zags a rũmsa yĩnga; yaa rẽ yĩng la a pʋd zĩ-kãnga tɩ Sukot, sõg-zakẽ.

A Zakoob tata Sikɛm

¹⁸ A Zakoob taa ne laafi Sikɛm, Kanaã tẽnga, a sẽn yi Padã-Aram n leeg n watẽ, a siga tẽnga noore.

¹⁹ A kosa a Amor, a Sikɛm ba, t'a kõ a zĩig ning a sẽn sigã la a reeg wanzurf koeems koabga.

²⁰ A mee maan-kugr zĩ-kãnga, n pʋd a yʋʋra ƐL, a Israyɛl Wẽnnaam.