Sɩngrẽ 32 - SEBR SÕNGO

¹ Sã n yaa a Labã, a sãda beoog n mobg a kom-dibli la a kom-pugli, n ning-b barka la a leba a tẽngẽ.

A Zakoob ne a Ezayu segda taaba

² A Zakoob ra kẽndame la Soaala-Wẽnd tʋma neb tɩ b wa seg-a.

³ A Zakoob yãend-b lame n yeele: «Wẽnd ti-la b yir ka.» Dẽ la a pʋd zĩiga tɩ Maanayim.

⁴ A Zakoob tʋma neba a kẽem, a Ezayu, nengẽ, Seyir tẽnga. Pẽe ne Edom tẽn-peelem.

⁵ A kõ-b-la no-kãnga: «Gom-y woto ne m kẽem a Ezayu: ‹F yao a Zakoob koɛɛg la woto: m kẽnga a Labã nengẽ n tɩ pa be n ta rũnna.

⁶ M tɩ paama niisi, bõeense, piisi, bʋʋse, yem-daad la yem-pogse tɩ m yet tɩ nin-bãmba reng taoore n wilg kibarã m zu-soaba, a Ezayu, la b kos tɩ y maan-d yardo.› »

⁷ Sẽn tʋm b rãmba lɛɛg n waa a Zakoob nengẽ n yeele: «Tõnd tɩ yãee f kẽem a Ezayu la yẽ meng wata f segbo ne neb kobs-naase.»

⁸ Dabeem la sũ-sãang kãseng yõka a Zakoob t'a welg sags a yiibu a neba, a rũmsã, bɛd la bõonese, la a yʋgma.

⁹ A ra yeta a sũurẽ: «Woto a Ezayu sã n seg bogr a ye n maan zabre, bogr a to wã na zoe n põse.»

¹⁰ A Zakoob goma ne Wẽnde: «M yaab a Abraam Wẽnnaam, m ba a Izaak Wẽnnaam, Naaba-Wẽnde, yãmb n yeel maam: ‹Leb f tẽngẽ, leb f ba wã zakẽ tɩ m ningd-f-la barka.›

¹¹ Yãmb sẽn maan bũmb ning fãa mam yĩnga, yãmb sẽn pʋg maam ne nonglem ningã, m da ka tog ne rẽ fãa ye. M sẽn waa n dabda, m dʋʋga Zʋrdẽ kʋɩlga ne m dasaar bala la ad-m sẽn wa ne neb la rũmsi sẽn sek sags a yiib welgre.

¹² Bɩ y sõng-ma tɩ m põs a Ezayu nugu. Rabeem tar-m lame, m zoeta a na n wa kʋ maam, n kʋ m pagb la m kamba.

¹³ M ket n tẽra yãmb sẽn yeele: ‹M na n zam-f-la kũuni, m na n kɩtame tɩ f buuda yɩ wa mogr bĩisri sẽn ka tõe n sõd ye t'a ka be tẽk ye!› »

¹⁴ A Zakoob gãanda zĩ-kãnga. A yãka a sẽn da tar fãa n na n segl kũun n bĩng a Ezayu.

¹⁵ Yɩɩ bʋ-yãans kobs-yi la boees pisi, pe-yãans kobs-yi, pe-raad pisi.

¹⁶ Yʋgem yãans pis-tã, sẽn tar kamb la bĩisim, nag-yãans pis-naase, lols piiga, bõn-yãans pisi, bõan-daad piiga.

¹⁷ A welga rũmsa sak-saka; sak fãa ne a rũm-kɩɩma la ad-a sẽn yeele: «Lʋɩ-y mam taoore la vɩʋʋg zĩnd rũmsa ne taab sʋka.»

¹⁸ A Zakoob yeela sõgen ning sẽn na n lʋɩ a taoorã: «M kẽem a Ezayu sã n seg foo n sok fo: ‹F zu-soab la ãnda, a rabda yɛ, ãnna n so rũmsã sẽn kẽnd f taoorã?›

¹⁹ Bɩ f leoke: ‹Yaa a Zakoob n tʋm maam ne a kũuni tɩ m wa kõ m zu-soab a Ezayu la a meng bee poorẽ.› »

²⁰ Sak a yiib soaba, wala a tãab soaba, la neb niyns fãa sẽn da pʋgd rũmsã, a kõ-b-la noor kãnga: «Ad-y sẽn na n gom to-to ne a Ezayu, y sã n wa seg-a.

²¹ Y na yeel-a: ‹F yao a Zakoob bee poorẽ watẽ.› » A Zakoob da tagsa a sũurẽ: Kũun sã n deng taoore n tak zood tɩ mam meng yaool n pʋgda, daare a na maan sugri.

²² Kũuna lʋɩɩ taoore; a meng kell n paa sikẽ wã n gãand.

A Zakoob maoore

²³ A Zakoob yika ne yʋngo n yi ne a pagb a yiibã la roog-kamb a yiibã, a kamb piig la a ye wã, n dʋʋg Yabok kʋɩlgã, a ko-kɩdgẽ.

²⁴ Yẽ meng n gãd-ba n dʋʋg kʋɩlgã, ned kam fãa ne a teedo.

²⁵ B fãa loogame n bas a Zakoob a yembre. La ned n waa n sog a maoore la b maoome tɩ beoog vẽeg.

²⁶ Neda sẽn mik t'a pa na n lub a Zakoobã, a sɩɩsa a kɩʋʋlgo t'a gĩina maage.

²⁷ Maod-n-taaga waa n yeelame: «Bas-m marsã tɩ zĩig yẽegame.» T'a Zakoob yeel-a: «M kõn bas-f tɩ f ka reng n ning m bark ye.»

²⁸ T'a soke: «F yʋʋr la a bõe?» T'a Zakoob leoke: «A Zakoob.»

²⁹ T'a yeele: «Ade, b ka na n le bool foo tɩ Zakoob ye, b na n bool-f lame tɩ Israyɛl tɩ f maoo ne Wẽnd la ninsaalba la fo n tõoge.»

³⁰ A Zakoob paasame: «M kot-y lame tɩ y togs y yʋʋre.» T'a soke: «Yaa bõe tɩ f baood m yʋʋre?» La a wẽneg n ninga a Zakoob barka.

³¹ A Zakoob pʋda zĩ-kãng tɩ Penuwɛl, n yetẽ: «M yãee Wẽnnaam nenga n yaool n pa ki ye.»

³² Sõor sẽn waa n pukdẽ, a yii Penuwɛl la ra kẽnda kɩʋʋlgo.

³³ Yaa rẽ yĩng la ba ne rũnna, Israyɛl kamb pa wãbd kɩʋʋlg gĩindi, a Zakoob kɩʋʋlga sẽn da pogla tẽegr yĩnga.