Sɩngrẽ 27 - SEBR SÕNGO

A Zakoob paamda bark a Ezayu zĩigẽ

¹ A Izaak waa n kʋʋlame, a nina waa n pa le ne bũmb ye; a boola a bi-kẽeng a Ezayu: «M biiga!» T'a leok: «Naaba!»

² A Izaak paasame: «Fo ne-la, m kʋʋlame, m ka mi m loogr daar ye.

³ Rẽ yĩnga, rɩk f teedo, f lok ne f tãpo, kẽ weoogã n wa ne rũnga;

⁴ segl-a wala mam sẽn datã n tall n wa tɩ m dɩ la m paam n ning f bark tɩ m nan ket ne yõore.»

⁵ Mik a Izaak sẽn waa n gomdã t'a Rebeka zĩi n kelgdame. A Ezayu yik n kẽe weoogo n na n bao rũng n wa kõ a ba.

⁶ A Rebeka soos n yeela a biiga Zakoob: «Mars-marsa bala, m wʋma f ba sẽn yeel a Ezayu:

⁷ ‹Wa ne weoog rũnga, segl dɩ-noog n kõ-ma, tɩ m dɩ la m ning-f barka, Soaala-Wẽnd maasmẽ, n yaool n ki.›

⁸ Sẽn ya woto wã, m biiga, kelg la f maan m sẽn na n yeel-f fãa.

⁹ Babs rũmsã, tɩ wa ne bʋ-poal a yiibu tɩ m na segl dɩɩbo wala f ba sẽn datã.

¹⁰ Fo na yaool marsã n tɩ kɩs f ba t'a rɩ la a ning f barka la a looge.»

¹¹ Dẽ la a Zakoob yeel a ma: «Gese, a Ezayu yaa yĩn-kõabneng soaba la mam yĩnga yaa saalle.

¹² M zoeta m ba na n wa babl n bãng tɩ m tudg-a lame t'a bas kãab noogo n kãab-m wẽnga.»

¹³ T'a Rebeka leoke: «Bas tɩ kãab wẽnga lʋɩta mam zugu, fo wee n kelg-m bala la f tɩ wa ne bʋʋsã.»

¹⁴ A Zakoob tɩ waa ne bʋ-poal a yiibu t'a ma reeg n segl dɩɩbo wala a Izaak sẽn da rata.

¹⁵ A Rebeka tũusa a bi-kẽenga, a Ezayu, fu neeba sẽn dag n be a roogẽ, n yeelg a Zakoob.

¹⁶ A rɩka bʋʋsa gãnd n lud a kamse la a yubla sẽn da ya saalgã.

¹⁷ A rɩka rɩɩbã sẽn seglã n kɩs-a.

¹⁸ A Zakoob sẽn ta a ba taoore, a yeelame: «M ba!» T'a leoke: «M sakame! La foo la m biig a bõe?»

¹⁹ Tao-tao t'a Zakoob yeelame: «Mam yaa yãmb bi-kẽenga, a Ezayu, m maana wala y sẽn yeelã, yik-y n zĩnd-y n dɩ tãoosga rɩɩbo, la y sik y bark m zugu.»

²⁰ T'a Izaak na n yeel a Zakoob: «Ad-f maana tao-tao wɛ, m biiga!» T'a leoke: «Yaa Soaala-Wẽnd n sõng-ma.»

²¹ A Izaak kos-a lame: «Kolg tɩ babl-fo. Fo sɩd yaa m biig a Ezayu bɩ ned a to?»

²² A Zakoob kolgame la a ba, a Izayi, sẽn babl-a a yeelame: «Koɛɛga yaa a Zakoob koɛɛga la kamsa yaa a Ezayu kamse!»

²³ Woto wã a pa tõog n bãng vẽenega, t'a Zakoob kamsa da yaa kõbdo wala a biig a Ezayu dẽnna, la a ning-a-la barka.

²⁴ A baas n le sok-a lame: «Fo sɩd ya m biiga Ezayu?» Tɩ yẽ yeele: «N-yẽe!»

²⁵ A Izaak yeelame: «Bɩ f wa ne f tãoosga rɩɩbo, m bi-sõngo, tɩ m dɩ la m kãab-f noogo.» A kõ-la a ba wã rɩɩbã t'a rɩ n le paas rãam t'a yũ.

²⁶ A Izaak yeel-a lame: «Kolg wɛ, m biiga, n mobg ma.»

²⁷ T'a sɩd kolg n mobg a ba. A ba wã wʋma a futa yũugu; a ninga a biiga bark woto: «M biiga yũugu yaa wa pʋʋg yũugu, pʋʋg sẽn womd wʋsgo, sẽn paam Soaal barka.

²⁸ Wẽnd na kõ foo yĩngr meenem n kõ-f pʋt sẽn sakd koodo, n kõ-f kood la rãam.

²⁹ Wẽnd na kɩt tɩ buud ka tɛka wa wõgemd f taoore. Lebg f ba-biisa zu-soaba, la f ma kamb wõgemd f taoore. Sẽn na n kãab-a foom wẽnga, bɩ wẽnga pa ne yẽ soaba; sẽn na n kãab foom kãab noogo, bɩ nooga pa ne yẽ soaba.»

³⁰ A Izaak sẽn ning a Zakoob bark n sɛ, t'a me nan yit a ba roogẽ, la a kẽema Ezayu sẽn yi weoogẽ n wa.

³¹ Yẽ me segla rɩɩbo n tɩ kɩs a ba n yeel a ba: «M gõo weoogo n wa ne rɩɩbo, yik n dɩ m tãoosga rɩɩbo la f ning m barka.»

³² T'a Izaak na n soke: «Foom la ãnna?» T'a yeele: «M yaa m ba bi-kẽenga, a Ezayu.»

³³ A Izaak yɛɛsa wʋsgo la a yeelame: «Dɩlla m ba bõe n wa ne weoog rɩɩb ka tɩ m dɩ wã? Mam dɩɩme tɩ fo nan pa wa ye la m zoe n ninga barka la barka na n kell n paa yẽ soaba zugu.»

³⁴ A Ezayu sẽn wʋm a ba leokre, a kelma ne sũ-sãanga la a kot a ba: «M ba, ning-y maam me barka!»

³⁵ T'a leoke: «Ad-f yao wã soos n waame n deeg f barka.»

³⁶ A Ezayu yeelame: «B ka be bʋʋm n boond-a t'a Yõk-n-dɛɛs sɩda? Pĩnda yɩ m kãsengo la a reeg yã la rũnna ya m barka; la m ba sõngo, yãmb pa kees bark bilf mam yĩng laa?»

³⁷ T'a Izaak leoke: «M yeel-a lame t'a yɩ f zu-soaba, t'a saam-biisa fãa lebg a sõgen-kamba; mam kãab-a-la kood la rãam, bõe la m tõe n le maan f yĩng marsã, m biiga?»

³⁸ A Ezayu yeela a ba: «Woto la fo kãabga tɛka, m ba? Bao kãab nood a taab n kãab maam me!» A Izaak ka tõog n leok tɩ bũmb ye, t'a Ezayu na n sɩng yãbre.

³⁹ A ba wã kong n yeel-a lame: «F yira na zãag ne pʋt sẽn sakd koodo, n zãag ne yĩngr sa-koom.

⁴⁰ Fo na n dɩ-la f pãngẽ, f na n yɩɩ f yao wã sõgne n tãag wakat ninga f sẽn na n zãens n yi a soolmẽ.»

⁴¹ A Zakoob sẽn deeg a Ezayu barka tẽka, b lebga beem ne taaba; a Ezayu yeela a sũurẽ: «Kõn leb n zãag tɩ m maan m ba kʋʋr ye, la yaa wakat kãng la m na n kʋ a Zakoob.»

⁴² B rɩka a Ezayu goama n taas a Rebeka, dẽ la a bool a Zakoob n yeel-a: «F kẽema Ezayu dat n kʋ-f lame n dok a sũuri.

⁴³ Dɩlla, m biiga, reeg m noore, yik n zoe n bʋʋg m kẽema, a Labã, Aram tẽnga.

⁴⁴ Be la f na n tɩ zĩnd bilfu t'a Ezayu sũur maage,

⁴⁵ t'a yĩm fo sẽn maan-a bũmb ning la a bas taale; wakat kãnga m na tʋm tɩ b tɩ bool fo; ka rẽnna yaa yãmb y yiib kʋʋre la b na n naag n yãb daar a yembre.»

⁴⁶ A Rebeka le yeela a Izaak: «A Ɛt kom-pugli wã kɩtame tɩ m yam yi ne vɩɩm. M biiga Zakoob sã n bao tẽn-kãnga biig n maan a paga, pag sẽn yit a Ɛt buudẽ, ad-y m vɩɩma ka le be yamleoog ye. M kõn le tõog n vɩɩnd tẽng zug ye.»