Sɩngrẽ 22 - SEBR SÕNGO

A Abraam bi-yend maoongo

¹ Dẽ loogr poore, Wẽnnaam fɛɛsa a Abraam n na n bãng a pʋga. B bool-a lame: «Abraam!» T'a sake: «Naaba!»

² Tɩ b yeel-a: «Dɩk f bi-yendã, a Izaak, fo sẽn nong a soab wʋsgã, n kẽng Moriya tẽnga, tãnga a ye zugu, m sẽn na n wilg-fu n tɩ kʋ-a maoong n yõog bugum.»

³ A Abraam yika tõd-beoogo n loe a bõang gaare, n nek a rakõap a yiibu ne a biiga Izaak. A wɩɩsa raada sẽn na n tall n yõog maoongã la a rɩka sor ning Wẽnnaam sẽn wilg-a.

⁴ Da-tãten-daarã, a Abraam zẽka a neng n yãe zĩigã al yɩɩg-yɩɩga.

⁵ A yeela a rakõapã: «Yas-y ka ne bõangã tɩ maam ne m biiga ta taoor n pʋʋs la d lɛɛg n wa paam-y ka.»

⁶ A Abraam rɩka maoonga raado n tʋk a Izaak, yẽ meng ra zãada bugum la sʋʋga tɩ b tũud taab n dabda.

⁷ A Izaak waa n yeela a ba: «M ba!» T'a leoke: «Yaa wãna, m biiga?» Tɩ biiga yeele: «M nee bugum ne raado la maoonga pe-bila bɛɛ?»

⁸ T'a Abraam na n yeel-a: «Sã n ya maoonga pe-bilã, Wẽnd n na n ges rẽnna.» La b kell n talla kẽnde.

⁹ B sẽn ta Wẽnd sẽn wilg zĩig ningã, a Abraam sama kuga, a mee maan-kugri, a sigla raadã a zugu la a sẽba a biig a Izaak n gãnege.

¹⁰ A Abraam tẽega a nug n na n dɩk sʋʋgã n kodg a biiga.

¹¹ Soaala malɛka bool-a lame: «Abraam, Abraam!» T'a sak: «Naaba!»

¹² La koɛɛg n yeel-a: «Sõng tɩ f nug ra sɩɩs biiga ye la ra maan-a bũmb ye. Marsã m miime tɩ fo zoeta Wẽnde, fo ka mong-ma f bi-yenda ye.»

¹³ A Abraam zẽka a nenga, a yãee pe-raoogo; kãgr n da gãd a yɩɩlã la a Abraam yõk-a lame n kʋ a biiga zĩigẽ:

¹⁴ A Abraam pʋda zĩ-kãng tɩ Wẽnd-na-ges ne b maoonga rũnga: tãn-kãng ket n boondame tɩ Wẽnd-na-ges tãnga.

¹⁵ Koɛɛg n le bool a Abraam la a yeel-a lame:

¹⁶ «M wẽend ne m menga, fo sẽn maan woto wã yĩnga, fo sẽn pa mong maam f bi-yendã,

¹⁷ m na sudg f barka, m na kɩt tɩ f buud lebg wʋsgo, b sõor na ta ãds sẽn be yĩngri la bĩisr sẽn dɩg mogr noore, fo yagensã n na n soog b bɛɛba na-tẽnga.

¹⁸ La buud a taaba na n tũ fo maasem n paam barka, fo sẽn deeg m noora yĩnga.»

¹⁹ A Abraam sigame n babs a rakõapã tɩ b leb Beerseba n tɩ zĩnd be.

A ABRAAM VƖƖMA RABDA A BAASGẼ A Rebeka rogem

²⁰ A Abraam zĩnda be n wʋm t'a yao a Nawor pag, a Milka, me roga kamba, bãmb la woto:

²¹ a pipi biiga, a Uk; sẽn pʋgde, a Buz, a Kemuwɛl, a Aram ba,

²² sẽn pʋgd yɛsa, a Kesɛd, a Azo, a Pildas, a Yildaf, a Betuwɛl.

²³ A Betuwɛl n dog a Rebeka; yɩɩ kamb a nii la a Milka kõ a Nawor, a Abraam yao.

²⁴ A Nawor pag a to me sẽn boond tɩ Rewuma n dog kom-bãmbã: a Teba, a Gaam, a Taas la a Maaka.