Sɩngrẽ 20 - SEBR SÕNGO

A ABRAAM KẼEDA TẼNGA NUG RƖTGO A Abraam ne a Abimelɛk

¹ A Abraam yii Mambre n tees Negɛb sẽnẽ; a ti-la a yir Sur la Kadɛs sʋka, n wa yi be n tɩ kẽ Gerar.

² A Abraam yeela a paga poorẽ: «A Sara yaa mam tão.» Wa n segame tɩ Gerar dĩma, a Abimelɛk, tʋmame tɩ b wa peeg a Sara.

³ Woto wã Soaala-Wẽnd lika a Abimelɛk yʋngo, a gõeemẽ, n yeel-a: «Fo sẽn dɩk pʋg-kãnga wã, ad-f na n kiime, a tara sɩda.»

⁴ A Abimelɛk da nan pa sɩɩs paga ye, dẽ la a yeel yã: «Soaala, m sok n gese yãmb na kʋ maam ne b m soolem dãmba tɩ d ka mi d beegr tiiri?

⁵ Yaa a Abraam meng n yeele: ‹Yaa mam tão la a Sara.› A Sara me yeelame: ‹Yaa mam kẽema.› M sẽn maan bũmb ninga ne-a, m maan-a-la ne sũur sẽn ka rat wẽnga, ne pʋ-peelem zãnga.»

⁶ Dẽ la Soaala-Wẽnd yeel-a, a zãmsdẽ: «Ya m sẽn mi tɩ f yaa pʋ-peen-neda la m pa sak tɩ f tʋm wẽng ne-a, tɩ f pa sɩɩs-a ye.

⁷ Marsã, lebs pagã a sɩda; ad yaa mam neda, a na n pʋʋs n kõ-f lame la f na n vɩɩndame. F sã n zãgs a lebsgo, mars-marsã bala f na n kiime la f sẽn so fãa na n wãame.»

⁸ Tao-tao bala, a Abimelɛk yika ne yʋngo n bool a rakõapa fãa n togs a sẽn wʋma, tɩ rabeem kãseng yõk-ba.

⁹ A kɩtame tɩ b bool a Abraam la a yeel-a lame: «Bõe la f maan tõndo, ãnna n beeg foo tõnd sʋka, tɩ f rat n wã-d zãng-zãnga? Ad yaa sẽn ka tog la f sẽn maan tõndã.

¹⁰ Yaa bõe yĩng la fo maan woto?»

¹¹ T'a Abraam yeele: «M tagsa m sũurẽ, daare ned ka be ka n zoet Wẽnd ye, la b na n kʋ maam n soog m paga.

¹² Baad-y tɩ m sẽn yeela ka zirẽ zãng ye, a yaa m tão, a yaa m ba-biiga, la ka m ma-biig ye, pagẽ wã yẽ, a yaa mam paga.

¹³ Wẽnd sẽn waa n yiis maam m ba zakẽ, m kos-a-la m toore t'a zoe m nimbãanega la a yeele, d sẽn ta zĩig ning fãa, t'a yaa m tão.»

¹⁴ A Abimelɛk bao piisi, niisi, yem-daad la yem-pogse n kõ a Abraam; a lebs-a-la a paga Sara.

¹⁵ A yeel-a lame: «Ad tẽnga sẽn yɛdg n dɩg f taoore, ti f zak f sẽn dat zĩig ninga.»

¹⁶ A Abimelɛk yaool n yeela a Sara: «Deeg wakɩ koeems tusri n kɩs f kẽema, dẽ na n yɩɩ kaseto tɩ f tara sɩda la f zãag d fãa ne pĩnd tudgrã.»

¹⁷ A Abraam sẽn pʋʋse, Soaala-Wẽnd kõ-la a Abimelɛk laafi; a paga la a yem-pogsã fãa paama laafi n tõog n le rogd kamba.

¹⁸ Bãng-y t'a Abimelɛk sẽn bao a Abraam paga Sara tɛka, Soaala da gɩdga a pagba rogem.