Sɩngrẽ 16 - SEBR SÕNGO

A Ismayɛl dogem

¹ A Abram paga, a Sarayi, da nan pa rog biig ye, a ra tara roog-biiga sẽn yit Ezipt tẽnga la sẽn boond tɩ Agar.

² Dẽ la a Sarayi yeel a Abram: «F ne-la, Soaala-Wẽnd ka kõ-m dogem ye; m kot-f-la bũmbu: kẽ ne mam doog-biigã tɩ daare m na paam kamba.» A Abram kelga a Sarayi koɛɛga.

³ Woto a Abram sẽn waa n paam yʋʋm piig Kanaã tẽnga, a Sarayi rɩka a roog-biig, a Agar, Ezipt bi-pugla, n kõ a Abram t'a maan a paga.

⁴ A Abram kẽesa a Agar; a Agar rɩka pʋga la a sẽn bãng t'a rɩka pʋga, a pa le ges a roog-ma wa ned ye.

⁵ A Sarayi waa n kong n yeela a Abram: «Paoogr ning a Agar sẽn paoogd maama leb foo. Mam dɩka m doog-biig n kõ foo, la a sẽn bãng t'a rɩka pʋg tɛka, a pa le nand maam ye, bɩ Wẽnnaam bʋ d bʋʋdo.»

⁶ Dẽ la a Abram leok a Sarayi: «Yaa foo ne f roog-biiga, maan ne-a wa f sẽn date.» A Sarayi namsa a roog-biigã al t'a wa kong n zoe.

⁷ Ned la Soaala tʋm yã la a sega a Agar bãk a ye noor, Sur sorẽ bãkã,

⁸ n yeel a Agar: «Sarayi doog-biiga, f yita yɛ la f dabda yɛ?» T'a leoke: «M yi-la a Sarayi nengẽ n zoetẽ.»

⁹ Soaala sẽn tʋm a soaba yeelame: «Leb f zu-soaba nengẽ; tɩ sulg f meng a taoore.

¹⁰ Soaala na n kõ-f-la kamb wʋsg-wʋsgo; b kõn waa n tõog n sõd n sɛ ye.

¹¹ Gese, fo tʋtame, f na n doga bi-ribla; f na n pʋda a yʋʋr a Ismayɛl, tɩ f pɛta pʋgẽ, Soaala wʋma f kɛlenga.

¹² F biiga na n yɩɩ wa burgumdi, a na yika zabr ne neb fãa, tɩ neb fãa me yik zabr ne-a, la a na n welga ne a saam-biisi n ti a zaka.»

¹³ A Agar da sokda a meng woto: «M sɩd yãenda sẽn ne-a maama bɩ?» La yʋ-kãnga la a pʋd Soaala sẽn gom ne-a wã: Ɛl-Royi, Wẽnd sẽn ne-ma.

¹⁴ Yaa rẽ yĩng me la a bool bãka sẽn da pẽ be wã t'a Layi-Royi, sẽn vɩ la sẽn ne-a Soaba bãka, la a bee Kadɛs la Berɛd sʋka.

¹⁵ A Agar doga bi-ribla la a Abram boola biiga t'a Ismayɛl.

¹⁶ A Agar sẽn waa n na n dog a Ismayɛl t'a Abram tara yʋʋm pis-nii la a yoobe.