Sɩngrẽ 14 - SEBR SÕNGO

Sidim zabre

¹ Sinear dĩm, a Amrafɛl, zamaanẽ, Elasar dĩm, a Ariok, Elam dĩm, a Kedor-Laomɛr, n paas Goyim dĩm, a Tideal,

² waa n yika zabre ne Sodom dĩm, a Bera, ne Gomor dĩm, a Birsa ne Adma dĩm, a Sineab, ne Segoyim dĩm, a Semebɛr, n paas Bela tẽng dĩma. Tẽn-kãng boondame yɛs tɩ Soar.

³ Dĩm bãmb ra tog n sega taaba Sidim, yamsem mogra bãg-faagẽ.

⁴ A Kedor-Laomɛr dɩ naam b zug yʋʋm piig la a yiibu. Piig la a tãaba yʋʋmde, b zãensame n yi a soolmẽ.

⁵ Dẽ me yĩnga, la piig la a naas yʋʋmde, a Kedor-Laomɛr wa ne dĩm niyns sẽn da ket n deegd a noorã. B naaga taab n tõog Refayitsã Astarot-Karnayim, n tõog Zuzitsa Am tẽnga, n tõog Emitsa Kiriyatayim tẽn-nabrẽ,

⁶ n tõog Oritsa b tãmsa zut, al Seyir n ta Ɛl Parã sẽn pẽ ne we-raoogo.

⁷ B yii be marsã n lɛɛg n wa Mispat bãka, n lɛɛg n wa Kadɛs. B tõoga Amalesitse la Amoritse sẽn da be Asasõ-Tamar.

⁸ Dẽ me la Sodom, Gomor, Adma, Seboyim, la Bela dĩm dãmb yik n sũ tãpo n na tak zabre, Sidim bãg-faagẽ,

⁹ ne Elam dĩm, a Kedor-Laomɛr, ne Goyim dĩm, a Tideal, ne Sinear dĩm, a Amrafɛl la Elasar dĩm, a Aryok. Dɩlla yɩɩ dĩm dãmb a naas n yik zabr ne dĩm dãmb a nu.

¹⁰ Sidim noorẽ, b ra tuu tãn-sũud buls wʋsgo la Sodom ne Gomor dĩma sẽn da tard tula lʋɩ b pʋsẽ; sẽn paam-b n põsa zoe n dʋʋ tãnga.

¹¹ Tɩ b na n wʋk Sodom la Gomor dãmb paoong la b koodo n looge.

¹² B looga ne a Abram yao biiga, a Lot, ne a teeda fãa; a Lot ra tɩ kẽeda Sodom.

¹³ Ned a ye n zoe n põse, n wa togs a Abram, Ebrayitgã; wakat kãng t'a Abram da ti a yir a Mambre kʋgsẽ; a Mambre da yaa Amoritga, t'a Eskol la a Anɛr yaa a yaop; bãmb ne a Abram da yaa zoodo.

¹⁴ A Abram sẽn wʋm tɩ b looga ne a saam-biig, a Lot, a tigma a rakõap kobs-tã la piig la a nii sẽn dog yẽ zakẽ la sẽn tar sũ-keelem. B boba b zab-teedo n pʋg bɛɛbã n ta Dã tẽnga.

¹⁵ B maana yam n na n ling-b ne yʋngo, n tõog-ba, n dig-ba n ta Oba, al Damas nug goabga.

¹⁶ A Abram lɛɛg n waa ne a saam-biig a Lot, ne pagbã la rakõapã la laoga fãa.

A Mɛlkisedɛk segbo

¹⁷ A Abram sẽn tõog a Kedor-Laomɛr ne dĩm dãmb a taabã n lɛɛg n watẽ, Sodom dĩma yii n seg-a-la Save bãoogẽ; b ra boonda zĩ-kãng me tɩ dĩm bãoogo.

¹⁸ Salem dĩm, a Mɛlkisedɛk talla buri la rãam n wa; yẽnda n da ya Yĩngr Soaala maan-kʋʋda.

¹⁹ A ninga a Abram bark woto: «Yĩngr Soaala-Wẽnde sẽn naana yĩngr la tẽngã, ning a Abram barka.

²⁰ Yĩngr Soaala paam barka, tɩ bãmb n sagl f nugẽ, f bɛɛba gilli!» A Abram weela a paoongã fãa piig-piiga n dok a ye piig fãa zug n kõ a Mɛlkisedɛk.

²¹ Sodom dĩma yeela a Abram: «Kõ maam m nebã la f wʋk sẽn ketã n looge.»

²² T'a Abram leok Sodom dĩma: «M zẽkda m nugu la m wẽenda ne Soaala-Wẽnde, sẽn naana yĩngr la tẽngã, m wẽendame tɩ f sẽn so bũmb ning fãa mam kõn yãk fɩ, a pʋgẽ ye,

²³ ba gaarga, ba neoodr gĩsga; woto f kõn tõog yeel bada tɩ foo n kɩt t'a Abram lebg arzɛk soab ye.

²⁴ Mam kõn deeg fɩ, sã n ka m rakõapa rɩɩbo. M zo-rãmba sẽn yãag-b maama na reeg b pʋɩɩre; a Anɛr, a Eskol, a Mambre, bãmb na yãk b keoore.»