Sɩngrẽ 12 - SEBR SÕNGO

A ABRAAM KIBARE Wẽnd boolgo

¹ Soaala-Wẽnd yeela a Abram: «Bas f tẽnga la f buudu la f zaka, n kẽng tẽng ning m sẽn na n wilg foom.

² M na n kɩtame tɩ f buud lebg kãsenga, m na n ning-f-la barka, m na n zẽka f yʋʋre, m na n kɩtame t'a lebg bark yʋʋre.

³ Sẽn kãabda foom noogo, m na ning a soab barka, sẽn kãabda foom beedo, m na kãab a soab me beedo; dũni ninsaalba fãa na n tũu fo maasem n paam barka.»

⁴ A Abram yiime wala Soaala-Wẽnd sẽn da kõ a noore. A Lot tũ-a lame. A Abram sẽn waa n na yi Arã tẽng t'a yʋʋm da zoe n taa pisopoe la a nu.

⁵ A Abram peega a pag a Sarayi ne a yao biiga, a Lot; b wʋka b sẽn da tar laog ning fãa Arã tẽnga la b rɩka Kanaã sor ne b yemse la b rakõapa. B waa n taa Kanaã tẽnga.

⁶ A Abram sãagame n ta zĩ-sõng ning sẽn boond tɩ Sikɛm; b siga More tɩɩg tẽngre, tɩ-bedr wa kʋka. Wakat kãng tɩ Kanaã rãmb n da kẽed tẽng-kãnga.

⁷ Soaala-Wẽnd lika a Abram n yeel-a: «M na n dɩka tẽn-kãngã n kõ foo ne f buudu.» Dẽ la a Abram me maan-kugr zĩ-kãnga, tɩ Soaala lik-a-la be.

⁸ A sẽn yi be, a dʋʋ tãng zugu, Betɛl tẽng yaanga; a tilga a roog be n get Betɛl nin-taoore, n get Ayi yaanga; a le mee maan-kugr a to Soaala waoogr yĩnga, b sɛɛg yõkr yĩnga.

⁹ A Abram le sɩnga kẽnde. Yaa ta ka, n ka n vʋʋse, n le yik n tar kẽnde, n teesd Negɛb weoogo.

A Abram tata Ezipt

¹⁰ Kom waa n lʋɩɩ tẽngã t'a Abram kong n ta Ezipt; koma sɩd yɩɩ kãsenga.

¹¹ B sẽn waa n kolg Ezipt tẽnga, a Abram yeela a paga, a Sarayi: «Gese, mam miime tɩ fo yaa pʋg-neere.

¹² Bãng tɩ Ezipt rãmba sã n wa yãe foom ne maam, b na n yeelame: ‹Paga yaa rao kãnga paga.› La b na n kʋʋ maam n paam n soog foom.

¹³ Dɩlla m kot-f lame tɩ f yeele: ‹Ya m tão.› Woto b na maan m neere fo yĩnga la fo maasem yĩnga, b na bas-m ne yõore.»

¹⁴ A Abram sẽn sɩd ta Ezipt tẽnga, Ezipt rãmb yãeeme t'a paga ra sɩd yaa neere al wʋsgo.

¹⁵ Ezipt naaba neba pẽga a Sarayi neerem la b tall-a lame n kẽng na-yiri.

¹⁶ Naaba talla a Abram neere, paga yĩnga la a kõ-a-la piisi, niisi, bõn-daado, bõn-yãanse, yʋgma, yem-daado la yem-pogse.

¹⁷ La a Sarayi yĩnga, Soaala-Wẽnd sɩbga Ezipt dĩma la a zak rãmb ne sɩbgr sẽn yɩ toogo.

¹⁸ Dẽ la dĩma bool a Abram n yeel-a: «Yaa bõe la fo sẽn maana? Bõe yĩng la fo pa togs tɩ paga yaa fo paga?

¹⁹ Bõe yĩng tɩ fo yeel tɩ ya f tão tɩ mam deeg a n na n maan m paga. Deeg f pagã n yik n menem!»

²⁰ Dĩma bas-a-la a neba nusẽ la b tall-a lame n tɩ bas Ezipt tẽn-toaagẽ, yẽ ne a paga la a sẽn so fãa.