Sɩngrẽ 1 - SEBR SÕNGO

Dũni naanego

¹ Dũni wã sɩngrẽ Wẽnd naana yĩngr la tẽnga.

² Tẽnga da yaa vɩʋʋgo, bũmb da ka a pʋgẽ ye, lik n da yãmb zĩig zãnga. Wẽnd pãng la b maasem n da buiid kooma.

³ Wẽnnaam yeelame tɩ vẽenem zĩndi. La vẽenem zĩndame.

⁴ Wẽnnaam yãeeme tɩ vẽenem yaa sõmbo, tɩ b na n welg vẽenem la lika.

⁵ B pʋda vẽenema tɩ wĩndga, n pʋd lika tɩ yʋngo. Zĩig sobgame n le yẽege: dẽ la pipi daare.

⁶ Wẽnnaam yeelame tɩ gãong yɛdg kooma sʋka n welg kooma sags a yiibu. La yɩɩ boto.

⁷ Wẽnnaam naana saaga n welg kooma sẽn be yĩngrã ne koom ninga sẽn bɛ-a tẽngre,

⁸ Wẽnnaam pʋda yĩngra tɩ saaga. Zĩig sobgame n le yẽege: daar a yiib soaba.

⁹ Wẽnnaam yeelame tɩ kooma sẽn be saaga tẽngr tigim zĩig a ye, tɩ zĩ-koɛɛng puki. La yɩɩ boto.

¹⁰ Wẽnnaam pʋda Zĩ-koɛɛnga tɩ tẽnga, n bool kooma sẽn tigim zĩig ninga tɩ mogre. Wẽnnaam yãeeme tɩ rẽ yaa sõmbo.

¹¹ Wẽnnaam yeelame tɩ tẽnga sob ne vãado, ne mood buud toɛ-toɛ sẽn womd biisi, ne tɩɩs buud toɛ-toɛ sẽn womd b biisi. La yɩɩ boto.

¹² Tẽnga sɩd soba ne vãado; ne mood toɛ-toɛ yã ne b biisi, ne tɩɩs toɛ-toɛ ne b biisi, la Wẽnnaam yãeeme tɩ rẽ yaa sõmbo.

¹³ Zĩig sobgame n le yẽege: daar a tãab soaba.

¹⁴ Wẽnnaam yeelame tɩ bũmb sẽn kõt vẽenem zĩnd saaga zugu n welg yʋng ne beoogo, n yals kibs rãmba, n yals daare la yʋʋmde;

¹⁵ b na n zĩnda yĩngri n yɩ vẽenem n vẽnegd tẽnga. La yɩɩ boto.

¹⁶ Wẽnnaam naana bug-bɛd a yiibu, a yembr yaa bed-kẽenga, yẽ n so beoogo; a yembr sẽn ka ta pipi soabã, yẽ n so yʋngo. B naana ãds me.

¹⁷ Wẽnnaam ning-b-la yĩngr tɩ b vẽneg dũniyã,

¹⁸ tɩ b soog beoog la yʋngo, vẽenem la lika la Wẽnnaam yãeeme tɩ rẽ yaa sõmbo.

¹⁹ Zĩig sobgame n le yẽege: daar a naas soaba.

²⁰ Wẽnnaam yeelame tɩ kooma pid ne bõn-vɩɩli sẽn dugd la sẽn nugd a pʋgẽ. Tẽnga me pid ne luiili sẽn yɩgd sa-gãonga tẽngre. La yɩɩ boto.

²¹ Wẽnnaam naana mogr pʋgẽ dũm-bɛda ne bõn-vɩɩli sẽn dugd la sẽn nugd koomẽ, ned kam fãa ne-a buudu, n le paas bõn-yɩgdi, ned kam ne-a buudu. La Wẽnnaam yãeeme tɩ yaa sõmbo.

²² B ning-b-la bark woto: Bɩ y rog la y wek n pid mogra koom zãnga, bɩ luiili wã me wek n pid tẽnga.

²³ Zĩig sobgame n le yẽege: daar a nu soaba.

²⁴ Wẽnnaam le yeelame tɩ tẽnga rog bõn-vɩɩli, ned kam fãa ne a buudu: dũm-bɛda, dũm-bõonego, weoog rũmsi, ned kam fãa ne a buudu. La yɩɩ boto.

²⁵ Wẽnnaam naana rũmsi, ned kam fãa ne a buudu: rũm-bɛda, rũm-bõonego, ned kam fãa ne a buudu, rũm-kɩdse sẽn be tomẽ, ned kam fãa ne-a buudu. La b yãeeme tɩ rẽ yaa sõmbo.

²⁶ Wẽnnaam yeelame: D naan ninsaala n mamsa wa tõndo, wa tõnd wẽnego, t'a soog mogra zĩma, yĩngr luiili, yir dũmsi, weoog rũmsi la bõn-vuudr fãa.

²⁷ Wẽnnaam naana ninsaala n mams b menga, b mams-a-la b meng wẽnego; yɩɩ pag la raoa la b naan yã.

²⁸ Wẽnnaam ning-b-la barka, n yeel-ba: Rog-y la y wek n pid dũniya la y soog-a. Soog-y mogr zĩma, yĩngr luiili la bõn-vuudr fãa.

²⁹ Wẽnnaam yeelame: M kõt-y-la mooda buud toɛ-toɛ sẽn yit tẽng zugu, n paas tɩɩs sẽn womd biisi la sẽn tar bula.

³⁰ Sã n ya we-rũmsã, luiili sẽn yɩgd yĩngri, bõn-vuudr fãa sẽn vɩ tẽng zugu, mo-maasa la m kõt bãmba t'a yɩ b rɩɩbo. La sɩd yɩɩ boto.

³¹ Naaba-Wẽnd gesa b sẽn naana fãa: fãa ra yaa sõmbo. Zĩig sobgame n le yẽege: daar a yoob soaba.