Malasi 3 - SEBR SÕNGO

¹ Yaa woto la dũni fãa Soaala leokda: «Ade, m tʋmda neda, t'a tuk sore m taoore. Soaala y sẽn baood a soaba, na n waa vugr bala n kẽe a roogẽ. Tʋʋm-tʋmd ning y sẽn gũud a soaba watame n na n moon tɩ m na n yõga zood ne yãmba. Ad a sẽn wate!»

² B waoonga raare ãnda n na n pa vɩɩga, ãnda n na n tõog n yalse? B na n yɩɩ wa bugum sẽn yɩlgd kutu, wala safãnd sẽn pekde.

³ B na n zĩndame n menes sẽn ya rẽgd buud fãa. Wala b sẽn yɩlgd sãnem la wanzurf, b na n peka a Levi yagensã tɩ b tõog marsã n wat ne b kũuni wala sẽn toge.

⁴ Woto, Zɩɩda la Zerizalɛɛm kũuna na ta Wẽnd yam wa pĩnda. Wala yʋʋm niyns sẽn loogã.

⁵ Dũni fãa Soaala gomda woto: «M na n wa zĩnda y sʋka n kao-y bʋʋdo. M sẽn na n bool bʋʋda pipi, yaa sẽn tʋmd-b bag-tʋʋma, sẽn yoaad-ba, sẽn ka pidsd b pʋlengo, sẽn ka yaood b tʋʋm-tʋmdba, sẽn namsd b pʋg-kõap la kɩɩb-bi la sãamba, neb niyns fãa sẽn vɩ wa b toog ka be ne maama.»

Lɛɛg-y n wa kẽ Soaala

⁶ Maam, Naaba-Wẽnd, n gomde, m pa teemd ye tɩ yãmb yaool n wilgd beoog sẽn vẽege tɩ y yaa a Zakoob yagen-wẽnse.

⁷ Yãmb me maana wala y yaab rãmbã, y ka tũud sor ning m sẽn wilga ye, y ka reegd m noya ye. Lɛɛg-y n wa kẽ maam tɩ mam me kõn bas-y ye, maam n yet rẽnda, maam, dũni fãa Soaala. La m wʋmda y sẽn gomde: «D maanda a wãn n le kẽ Soaala?»

⁸ M leokd-y lame: «Y sẽn getã, segdame tɩ b tudg Wẽnde? La yãmba, yãmb yẽ tudgda maam. Y tudgd-m-la ne bõe? Yaa ne y kood lemse, la ne y kũuna.

⁹ Ad-y kãab wẽng n na n dɩ yã tɩ yaa tẽnga gilli, tɩ yaa yãmb zãng fãa n zãmbd maam.»

¹⁰ Dũni fãa Soaala gomda woto: «Bɩ y tall n wa teeda bĩngr doogẽ y sẽn tog n kɩsa fãa, tɩ m zaka pid ne rɩɩbo. Maan-y boto n fɛɛs-ma la y na yãend tɩ m pak y yĩnga yĩngr sa-kooma la bark buud fãa na rʋʋg y zugu zembala.

¹¹ Y yĩnga m na tãs sʋya tɩ b ra sãam y kooda ye, tɩ b ra sãam y bugsuntunda womb ye, maam n kãabd-y rẽnna.

¹² Bu-zẽmba fãa na bool yãmb tɩ zu-noog rãmba, tɩ vɩɩm noog na n saka y tẽngẽ wã. Dẽ yaa maam, dũni fãa Soaala n gomde.»

Soaala raare

¹³ Naaba-Wẽnd yeelame: «Y gomda goam põaas m poorẽ. La yamb sokdame: ‹D yeelame tɩ bõe n beeg yãmba?›

¹⁴ Ad-y y sẽn yete: ‹Wẽnd tũudem yaa zaalem. Tõnd deega b noya, d saka no-loeer la sũ-sãang n datẽ tɩ dũni fãa Soaala tẽeg d yelle, la d ka paam fɩ.

¹⁵ D neeme marsã tɩ sẽn zĩ-b ne sũ-noogo, yaa neb niyns toog sẽn ka be ne Wẽnde; sẽn ka bʋʋd-b beoog fare, yaa sẽn tʋmd-b wẽnga. Bãmb pursda raood ne Wẽnde, la bũmb ka maand-b bada.› »

¹⁶ Sẽn zoet-b Wẽndã me zĩnda ne taaba. Soaala-Wẽnd yoka b tʋbre, la b wʋmame. Bãmb taoore b gʋlsa tẽegr sebr pʋgẽ neb niyns sẽn zoet-b Wẽnnaama la sẽn teeg-b bãmba yʋy.

¹⁷ Dũni fãa Soaala yaoolame marsã n yeele: «M sẽn na n wilg m pãnga raare, m na n gesa nin-bãmba wala m neba. Bãmb n na n yɩ m buudu. M na n yɩ nin-bʋgsg ne bãmba, wala ba sẽn yaa a soab ne a biig sẽn sakd-a.

¹⁸ Wakat kãng y na bãng bũmb ning sẽn bak zemsg soab ne nin-wẽnga, n bakd sẽn pʋgd-b Wẽnde la sẽn bas-b Wẽnde.»

¹⁹ Maam n yete, maam dũni fãa Soaala, tɩ raar n wate la m sũura na n widga bug-kãsenga. Baraare gom-beeda rãmba la yel-wẽn-maandba na n dɩɩ bugum wa moodo. Bũmb kõn dɩ n kees ye, baa fɩ.

²⁰ Neb niyns fãa sẽn sulg-b meng mam taoorã, ad m sẽn kãabd-b: «M sẽn na n wa ne pãng ning n fãag m neba raarã na n puka wa wĩndg sẽn wat ne fãagre. Y na n paama y meng la y na n yɩga sũ-noogo wa nag-bi sẽn yit-b loɛɛgẽ.

²¹ Daar ninga m sẽn na wilg m pãngã, y na n fẽda nin-wẽnsã wala sor zug begdo. Maam m yete, maam dũni fãa Soaala.»

A Eli waoongo

²² Tẽeg-y yã a Moyiiz, m sõgna, sẽn zãms yãmb bũmb ningã. Reeg-y la y tũ m sẽn wilg noy-niyns Orɛb tãnga zugu m buud a Israyɛl yĩnga.

²³ Dũni fãa Soaala paasa woto: «Ade, m na n tʋma bãngda a Eli tɩ Wẽnd daarã sẽn ya ra-kãsenga, la a kẽesd rabeem nan ka ta ye.

²⁴ A na n wẽnega ba rãmba sũya n tees b kamba, la kamb sũya n tees b ba rãmba, woto kõn yɩ modgre tɩ m wa sãam tẽnga ye.»