Malasi 2 - SEBR SÕNGO

Maan-kʋʋdba gũusi

¹ La marsã, ad Naaba-Wẽnde, dũni fãa Soaala sẽn yet maan-kʋʋdba tɩ b gũus ne bũmb ninga:

² «Kelg-y-ma la modg-y tɩ m paam waoogr ning sẽn tog ne-ma. Ka rẽ mam na n teka y zu-noogã m sẽn kãabã t'a lebg zu-beedo. M na n maana boto tɩ yãmb n yet tɩ y pa ne m sẽn yet tɩ y gũus ne bũmb ningã sẽn sɩd sek gũusg ye.

³ M zoe n zẽkda m koɛɛg ne yãmb yagensã. Sã n ya yãmb menga yaa rũmsa bĩndu la m na n lob y nenga, rũms niyns y sẽn kʋʋd y kibs rãmba wakato. Y fãa na n naagame n tɩ yõog bugum.

⁴ Y na bãng tɩ yaa maam, Naaba-Wẽnde, dũni fãa Soaala n kõ no-kãnga, tɩ m datame tɩ m zooda ne a Levi la a Levi yagensa ra sãam ye.

⁵ D zooda yĩnga m kõ-b-la vɩɩm la arzɛka, m zãms-b-la m waoogre, b reega m noore la b riga rabeem m taoore.

⁶ Sɩd zãmsg ra be-la b noorẽ, la zãmb da ka be b sũuri ye; b ra kẽnda ne maam, pʋ-peelem la zemsgo pʋgẽ; b ra yiisda neb wʋsg wẽng pʋgẽ.

⁷ Maan-kʋʋd tʋʋmd yaa a zãmbs neba tɩ b bãng Soaalã. Yaa yẽ la b na n wa sok n bãng yaa so-bʋgo la noora rat tɩ b tũ tɩ yẽ la dũni fãa Soaala no-rɛɛsa.

⁸ La yãmba, maan-kʋʋdba, yãmb bʋdga sore. Y zãmsga kɩtame tɩ neb wʋsg kẽ moogo. Y sãama d zoodã, maam n yete, maam, dũni fãa Soaalã.

⁹ La mam na n tusa neba tɩ b sãbs yã la b paoog yã tɩ y ka maand m daab ye la y ka yals y sɩd zĩigẽ daar fãa ye.»

Y ka rɩk so-sõng ye

¹⁰ D fãa ka tar ba a ye laa? Ka Wẽnd a ye n naan-do? Yaa bõe marsã tɩ d zãmbd taaba n sãamd zood ninga Wẽnd sẽn yõg ne d yaab rãmbã?

¹¹ Zɩɩda rooga neb tʋma ne zãmbo. Yel-wẽnd kãseng la a maan Zerizalɛɛm la Israyɛl tẽn-peelmẽ. Zɩɩda neba pa waoog wẽnd dooga, b zĩ-nongrã, wa b sẽn da tog n waoog-a ye. Woto b kẽe ne pagba sẽn pʋgd wẽn-naandse la wẽn-sãamse.

¹² Ned ninga fãa sẽn maand woto, bɩ Wẽnd yiis a roagdb la a kamba a Zakoob buudẽ, ba a sã n yaa maan-kʋʋda.

¹³ Ad bũmb a to me y sẽn maande: y pʋkda Wẽnd maan-kugrã ne nintãm, y tara kelemse la yãbre, tɩ Soaala ka le gete la b ka le reegd y kũuna ye.

¹⁴ La y sokdame tɩ yaa bõe yĩng la b pa le rat y kũuni. Ade, yaa y sẽn da kãab bãmb taoore tɩ y kõn bas y bi-bɩɩlmẽ pag ye. Pʋg kãng n yɩ y pak-n-taaga, yãmb n da bao-a, yãmb n le bas-a.

¹⁵ Soaala kɩtame tɩ foo ne f paga lebg bũmb a ye y yĩngẽ la y yamẽ. La y sẽn lebg nin-yendã, bõe la y raabo sã n ka Wẽnd kõ-y kamba? Woto wã, gũus-y la y ra bas y sẽn kẽ kãadem ne pag ning y bi-bɩɩlma wakat ye.

¹⁶ M kisa pag yiisgu, m kisa pãn-tõogo. Yaa maam n yet rẽnna, maam, a Israyɛl Wẽnde la dũni fãa Soaala. Bɩ ned kam fãa maan gũusgu la a pids a sẽn kãabe.

Wẽnd daare

¹⁷ Y namsda Soaala-Wẽnd ne y goama; la y ka mi ye, n tol n zĩ n sokdẽ: «D namsd-b-la wãn-wãna?» Ade, yaa y sẽn yete: «Soaala nif nee sẽn maand-a wẽnga la b sĩnda.» Ka rẽ bɩ y zĩ n sokdẽ: «Wẽnd ning sẽn nonga zemsga bee yɛɛnẽ?»