Maan‑kʋʋre 9 - SEBR SÕNGO

Maan-kʋʋdba sɩngda b tʋʋmde

¹ A nii daarã, a Moyiiz boola a Aarõ, a kambã la kãsem-dãmbã.

² A yeela a Aarõ: «Yõk nag-bil n kʋ maoong yel-wẽnd sugr kosg yĩnga la f yõk pe-raoogo n kʋ yũ-noog maoongo. Nag-bilã wala pesgã tog n yɩɩ sõmb zãnga, tɩ f tall-ba n wa Soaala-Wẽnd taoore.

³ Dẽ poore yeel Israyɛl kamba: ‹Wa-y ne boɛɛg n kʋ yel-wẽnd sugr kosg maoongo; wa-y ne nag-bila la pe-bila sẽn zems yʋʋmd a ye la sẽn ya sõng zãnga n kʋ yũ-noog maoongo;

⁴ wa-y ne loalga la pe-raoogo n kʋ Soaala-Wẽnd taoore, tɩ y wa lagem-n-dɩ. Wa-y ne kũuni, zom sẽn nag ne kaam. Rũnna, Soaala-Wẽnd na n lika b menga.› »

⁵ B talla a Moyiiz sẽn yeela fãa n wa sɛka roog noor tɩ Israyɛl kamba fãa kolg Soaala-Wẽnd taoore.

⁶ T'a Moyiiz yeel-ba: «Ad Soaala-Wẽnd sẽn yet tɩ y maan bũmb ninga n paam n yãend b ziirã.»

⁷ A yeela a Aarõ: «Kolg maan-kugrã, kʋ maandã f sẽn tog n kʋ f meng yĩngã, sugr kosgo la yũ-noog maoongã. Maan Soaala taoore sugr kosga sẽn dat bũmb ning fãa. Yaool marsã n kʋ buuda maoong la f kos sugr a yĩnga la maan fãa tɩ tũ wala m sẽn wilg fooma.»

⁸ A Aarõ kolga maan-kugrã n kʋ nag-bila a meng yel-wẽna sugr kosg yĩnga.

⁹ A kamba kolga ne zɩɩma t'a tẽk a nug-bil n taag maan-kugra yɩdba n yaool n daag sẽn ketã maan-kugra sɛɛgẽ.

¹⁰ Rũng ninga sẽn kʋ yel-wẽnd dolb yĩnga, yẽ kaama, a yɩɩma ne b kaama la sãoorã, a Aarõ yõog-b-la bugum maan-kugra zugu, wala Soaala-Wẽnd sẽn da wilg a Moyiiz.

¹¹ Nemda la gãongã, a yõog-b-la we-kɛɛnga.

¹² A kʋʋ yũ-noog maoongã t'a Aarõ kamba wa ne zɩɩma t'a raag-a n gilg maan-kugrã.

¹³ B kɩs-a-la rũnga nemd b sẽn beesã n paas zugã t'a yõog-b maan-kugra zugu.

¹⁴ B peka yãada la karsã n yõog bãmb me maan-kugra zugu.

¹⁵ B waa ne zãma wã kũuni. A reega boɛɛga n kʋ-a yel-wẽnd sugr kosg yĩnga wala a sẽn zoe n maane.

¹⁶ A kɩtame tɩ b kolg ne yũ-noog maoongã la a maana wa sẽn segde.

¹⁷ B waa ne zoma t'a yõng ne a nug n lob bugmẽ, maan-kugra zugu, t'a rɩ bugum wala yibeoog maoongo.

¹⁸ A kʋʋ loalga la pe-raoogã, yɩɩ maan-dɩtga zãma wã yĩnga. A Aarõ kamba kɩs-a-la zɩɩma t'a raag-a n gilg maan-kugrã.

¹⁹ Loalga la pe-raooga kaama, a zʋʋrã ne a kaama, yɩɩma, sãoorã,

²⁰ b yõog-b-la maan-kugra zugu.

²¹ A Aarõ rɩka rɩtg gerã la rũms a yiiba yãoog n tees Soaala-Wẽnde, wala sugr kosga sẽn dat t'a maan la wala b sẽn da wilg a Moyiiz.

²² A Aarõ yaool n zẽka a nug marsa n ning neba barka. A sẽn kʋ maandã n sɛ, yel-wẽnd sugr kosg maoongo, yũ-noog maoongo, laafi kosg maoongo, a sigame.

²³ A Moyiiz ne a Aarõ kẽe sɛka roogẽ n lɛɛg n yi n ning zãma wã barka. Soaala-Wẽnd puka b ziir neba fãa gill nifẽ.

²⁴ Bugum n yi Soaala-Wẽnd taoore n dɩ maoongã la kaama sẽn dɩgl maan-kugra zugã. Zãma wã kelma sũ-noogo la a wõgemda tẽnga.