Maan‑kʋʋre 8 - SEBR SÕNGO

Maan-kʋʋr naam deegre

¹ Soaala-Wẽnd yeela a Moyiiz:

² «Bool a Aarõ ne a kamba sɛka roog noore. Kɩt tɩ b wa ne fu-sõma wã, ne kaam-sõngã, ne loalg ning sẽn na n kʋ yel-wẽnd sugr paoong yɩngã, ne pe-raad a yi la bura sẽn ka ning bɩlle n tẽg ne peoogã.

³ Tigim a Israyɛl kamba fãa sɛka roog noore.»

⁴ A Moyiiz deega Soaala-Wẽnd noore, la neba tigma taab sɛka roog noor.

⁵ A Moyiiz yeel-b lame t'a na n maana Soaala-Wẽnd sẽn yet t'a maan bũmb ninga.

⁶ A kɩtame t'a Aarõ ne a kamba kolg t'a so-b koom.

⁷ A Moyiiz yeelga a Aarõ fu-wokã, n sẽbg a sɛɛga, n yeelg-a fu-mismiuugã ne fu-bãg-vɩɩdã la a loe-la a poorẽ wã sãnem-pɛ-m-poorã.

⁸ A rɩka sãnem-pɛ-m-yãooga me n sog-a la a suii b sẽn tar n bʋgd b mens Soaala-Wẽnd taoorã, n mi Soaala leokr yaa n-yẽe bɩ ayoo.

⁹ A vila a zuga peende n mobg-a ne sãnem paklgã. Yẽ la pugl sõng buud Soaala-Wẽnd sẽn da wilg a Moyiiz.

¹⁰ A Moyiiz rɩka ka-sõng n taag roogã la bũmb ninga fãa sẽn da be a pʋgẽ.

¹¹ A mesa maan-kugra naoor a yopoe n yaool n taag-a kaam ne a teeda fãa tɩ b na n lebg bõn-sõma, n paas ko-sĩnga ne a roaglga.

¹² A kɩrga kaam a Aarõ zugu n dɩk-a n kõ Soaala-Wẽnde.

¹³ A Moyiiz yaool n kɩtame t'a Aarõ kamba kolge t'a yeelg-b futu, n sẽbg-b seese, n ning-b pugli, wala Soaala-Wẽnd sẽn da wilg-a.

¹⁴ A kɩtame tɩ b wa ne lʋllã, yel-wẽn sugr kosg maoonga rũngã. A Aarõ ne a kamba tika a zug ne b nusi,

¹⁵ t'a Moyiiz kodg-a. A tẽka a nug-bil zɩɩmẽ wã n taag maan-kugra yɩdba, sẽn na n yɩlẽ n pek a rẽgd buud fãa la a raaga zɩɩma maan-kugra sɛɛga. Yɩɩ woto la maan-kugra welg toore n lebg bõn-sõngo tɩ b na n wat n kʋʋd a zugu sugr kosg maandã.

¹⁶ A Moyiiz yãka kaama fãa sẽn gãneg yãada zugẽ, n yãk sãoora, yɩɩm a yiibã ne b kaama la a yõog-b-la bugum maan-kugra zugu.

¹⁷ Lʋlla menga, a gãongo, a nemdã, a bĩndã, b zãaga sikã n yõog-ba, wala Soaala-Wẽnd sẽn da wilg a Moyiiz.

¹⁸ A Moyiiz kɩtame tɩ b kolg ne yũ-noog maoonga pe-raoogo. A Aarõ ne a kamba tika pesga zug ne b nusi

¹⁹ t'a Moyiiz kodg-a. A raaga a zɩɩma n gilg maan-kugrã.

²⁰ A sɩɩga rũngã n bees-a n kɩt tɩ b yõog zugã, wilsã la kaama.

²¹ A peka koomẽ yãadã, karsã, la a yõoga pesgã tõre maan-kugra zugu. Bugum n na n dɩ maoong kãnga zãnga t'a yũuga noog Soaala-Wẽnd sũuri.

²² A kɩtame tɩ b wa ne pesg a to wã, naam deegr maoonga pesgo. A Aarõ ne a kamba rɩka b nus n tik a zugu,

²³ a Moyiiz kʋ-a lame n yãk a zɩɩma bilfu n taag a Aarõ rɩtg tʋbre, n taag a rɩtg nug-raoogo, a rɩtg nao-raoogo.

²⁴ A kɩtame marsã t'a Aarõ kamba kolge t'a yãk zɩɩma n taag b rɩtg tʋba, b rɩtg nug-raado, b rɩtg nao-raado. Dẽ poore a Moyiiz daaga zɩɩma n gilg maan-kugrã.

²⁵ A rɩka kaama, zʋʋrã, kaama sẽn gãneg yãada zugã, sãoorã, yɩɩm a yiibã ne b kaama la rɩtg gerã.

²⁶ Peoog ning sẽn dɩg Soaala-Wẽnd taoora pʋga a yãka bur sẽn ka ning bɩlle, n paas samsa, miisdu, la a rogl-b-la kaama la rɩtg gera zugu.

²⁷ N dɩk rẽ fãa n ning a Aarõ ne a kamba nusẽ tɩ b naag taaba n tees Soaala-Wẽnde.

²⁸ A Moyiiz le reeg-b lame n yõog bugum. Dẽ yɩɩ naam deegr maoong, yũ-noog maoongo, Soaala-Wẽnd yĩnga.

²⁹ A Moyiiz dɩka yãoogã n tees Soaala-Wẽnde la rẽ yɩɩ yẽ pʋɩɩre, wala Soaala-Wẽnd sẽn da wilg-a.

³⁰ A Moyiiz yaool n dɩka kaama la zɩɩma sẽn da be maan-kugra zugu n mes a Aarõ ne a kambã, a fut la a kamba futu. Woto a rɩka a Aarõ ne a futã n kõ Soaala-Wẽnde. N dɩk a kamba ne b futã n kõ Soaala-Wẽnde.

³¹ A Moyiiz yeela a Aarõ ne a kamba: «Rʋgl-y nemdã sɛka roog noore. Yaa beenẽ la y na n wãb nemdã n naag ne burã sẽn be peooga pʋga, tɩ yaa woto la m da yeel yã: ‹A Aarõ ne a kamba n na n dɩ ba.›

³² Sẽn kellã, nemdã la burã, los-y-b bugmẽ.

³³ Dasem a yopoe tõre y ka na n zãag ne sɛka dignoor ye tɩ y naam deegr kibsa wa baase, la a kaoosda dasem a yopoe.

³⁴ Soaala-Wẽnd n yeele tɩ m maan wa m sẽn maan dũnna wã n kos sugr y yĩnga,

³⁵ la dasem a yopoe pʋgẽ, wĩndig la yʋngo, y na n paa sɛka rignoorẽ. Dẽ poor marsã la y na tõog n sɩng y maan-kʋʋra tʋʋmde la y kõn ki ye. Yaa woto la b wilg-ma.»

³⁶ A Aarõ ne a kamba maana Wẽnnaam sẽn togs-b bũmb ning fãa ne a Moyiiz noore.