Maan‑kʋʋre 7 - SEBR SÕNGO

Yell manegr maoongo

¹ Yaa woto la yell manegr maoonga kʋʋda: yaa bũmb sẽn ya bõn-sõngo.

² B kʋʋda rũnga zĩig ning b sẽn kʋʋd yũ-noog maoongã tɩ maan-kʋʋda raag zɩɩma n gilg maan-kugrã.

³ A na n dɩka kaama fãa n kõ Soaala-Wẽnde: zʋʋrã, kaama sẽn mobg yãadã,

⁴ yɩɩm a yiibã ne b kaama, zʋ-kɛɛga kaam, kaam ninga sẽn pɛ lʋgã. Naagda sãoora vã-minim la yɩɩma.

⁵ Maan-kʋʋda na n yõog-b lame tɩ b rɩ bugum zãnga Soaala-Wẽnd yĩnga, yaa yell manegr maoongo.

⁶ Sẽn ya-a rao fãa, n ya maan-kʋʋda tõe n dɩ-a lame. B rɩt-a-la zĩ-sõngẽ tɩ yaa bũmb sẽn ya sõmb wʋsgo.

⁷ Yel-wẽnd dolb maoongo ne yell manegr maoong tũuda sor a ye, b manesma yaa bõn-yɛnga. Kũun ning maan-kʋʋda sẽn dɩk n kos sugrã lebgda maan-kʋʋda pʋɩɩre.

⁸ Maan-kʋʋda sẽn deeg rũng ning fãa n kõ Soaala-Wẽnde, yẽ n so a gãongã, maoonga sã n ya yũ-noog maoongo.

⁹ Kũun ninga fãa sẽn kɩɩme, sẽn wʋme, sẽn dõos laagẽ bɩ sẽn dɩgl kud paklga zug, yaa maan-kʋʋd ninga sẽn dɩk-a n kõ Soaala-Wẽnda soolem.

¹⁰ Kũun fãa sẽn nag ne kaam bɩ sẽn ka ning kaam, n yaool n ka rʋge yaa a Aarõ kamba n so la pʋɩta taab tɩ zemse.

Lagem-n-dɩ maoongo

¹¹ Ad lagem-n-dɩ maoong sẽn na n maan to-to:

¹² B sã n naag-a ne maoong a to, wala pẽgr maoongo, maoonga paasda ne zom sẽn nag ne kaam n yaool n pa ning bɩll ye, bɩ bur sẽn sõog kaam n yaool n pa ning bɩll ye, bɩ miisdu.

¹³ B Naagdame n wa ne bur sõngo pẽgr maoonga yĩnga.

¹⁴ B yãkda dɩɩba buud toɛ-toɛ wã n tees Soaala-Wẽnde, wala bãmb pʋɩɩre. Sẽn maan-a maoongã la a rɩk zɩɩma n mesã n so rẽ.

¹⁵ Nemda dɩta maoonga raar bala, ka keesd bũmb beoog yĩng ye.

Yamleoog maoongo

¹⁶ Sã n ya pʋleng pidsgu maoong bɩ yamleoog maoong la b kʋ yã, nemda dɩta maoonga raare la sã n keese, a rɩɩb pa tõt vẽkẽmbeoog ye.

¹⁷ Nemda sã n maan da-yɩten-daare, b yõogd-a-la bugum zãnga.

Nemd sẽn tõe n wãbe

¹⁸ Maoonga sã n kʋ tɩ ra-bitẽ, tɩ fo ket n wãbd a nemd dũnna, fo rẽgemda f menga, fo sãamda f maoonga yel-sõmde, la fo sẽn wãb nemd sẽn sãama, fo tʋka yell f zugu.

¹⁹ Neong fãa sẽn sɩɩs-a bõn-dẽgdo ka tõe n le wãb ye, b lobd-a-la bugmẽ. Yell sẽn ka be ned ninga zug bal n tõe n wãb maoong nemdo.

²⁰ Yell sã n be ned zug t'a wãb maoong neongo, lagem-n-dɩ maoongo, b yiisda a soab buudẽ.

²¹ Ned sã n sɩɩs bõn-dẽgdo, rẽgda yaa ninsaal rẽgd bɩ rũnga, bɩ bũmb a to, n yaool n wãb lagem-n-dɩ maoong nemdo, b yiisda yẽ soab me buudẽ.

Wẽnd sẽn date

²² Soaala-Wẽnd yeela a Moyiiz

²³ t'a wilg Israyɛl kamba woto: Da rɩ-y naafo, pesgo bɩ bʋʋg kaam ye.

²⁴ Rũng sã n ki a toore bɩ yaa we-rũng n yõk-a, rũng kãng kaam tõeeme n dɩk n tʋm tʋʋmde la ka tõe n dɩ-a ye.

²⁵ Rũng ka kʋʋd yũ-noog maoongo tɩ b le tõog n dɩ a kaama ye. B yiisda sẽn kɩɩs-a n dɩ fãa buudẽ.

²⁶ Y sẽn be zĩig ning fãa, y ka tõe n dɩ zɩɩm ye. Yaa rũng rẽnna, yaa luiil rẽnna, y ka tõe n dɩ zɩɩm ye.

²⁷ Ned ninga fãa sẽn dɩ-a zɩɩm, b yiisd-a-la Israyɛl buudẽ.

Maan-kʋʋdba pʋɩɩre

²⁸ Soaala-Wẽnd yeela a Moyiiz

²⁹ t'a wilg Israyɛl kamba woto: Ned ninga fãa sẽn na n kʋ-a lagem-n-dɩ maoong bɩ a wa ne Soaala-Wẽnd pʋɩɩre.

³⁰ Yaa yẽ meng a toore n na n wa ne kũun niyns sẽn na n kõ Soaala-Wẽnde: nem-kaama. A naagda ne yãoogã, tɩ yãooga la b reegd n tees Soaala-Wẽnde, maan-kugra zug, Soaala-Wẽnd taoore.

³¹ Maan-kʋʋda yãkda kaama n yõog maan-kugra zugu la yãooga menga, a Aarõ ne a kamba n so rẽ.

³² Y na n paasa maan-kʋʋda rũnga rɩtg gere, wa pʋɩɩr sẽn yãk Soaala-Wẽnd dẽnnẽ.

³³ Sẽn ya-a rɩtg ger kãng soaala, yaa maan-kʋʋd ning sẽn dɩka zɩɩma la kaama n kõ Soaala-Wẽndã.

³⁴ Israyɛl kamba sã n kʋ rũng lagem-n-dɩ yĩnga, mam a Naaba-Wẽnd n so yãoogã ne gerã la mam dɩkd-b lame n kõt a Aarõ ne a kamba, la rẽ yaa noor a Israyɛl sẽn na n deeg zamaan woo zamaana.

³⁵ Woto n yɩt pʋɩɩr ning a Aarõ ne a kamba sẽn na n deeg Soaala-Wẽnd pʋɩɩrẽ, b sã n paam maan-kʋʋra tõog fãa.

³⁶ Yaa woto la Soaala-Wẽnd modgd Israyɛl kamba tɩ b kõ b maan-kʋʋdba b sẽn taag-b kaam daare tɩ b reeg maan-kʋʋr naam la rẽ yaa noor a Israyɛl kamb sẽn na n gãd zamaan woo zamaana.

³⁷ Yaa woto me la b kõt kũuni la b kʋʋd yũ-noog maoongo, yel-wẽnd dolb maoongo, yell manegr maoongo, naam deegr maoongo la laafi kosgo bɩ lagem-n-dɩ maoongo.

³⁸ Yaa woto la Soaala-Wẽnd wilg a Moyiiz Sinayi tãnga zugu b sẽn waa n yeel Israyɛl kamba we-raoogẽ tɩ b wa ne kũuni n kõ bãmba.