Maan‑kʋʋre 6 - SEBR SÕNGO

Maan-kʋʋr tʋʋmd noya

¹ Wẽnnaam yeela a Moyiiz

² t'a togs a Aarõ ne a kamba woto: Ad yũ-noog maoong sẽn sẽed to-to. B sẽn boond maoong ning tɩ yũ-noog maoongã, yaa maoong sẽn ningd bugmẽ yʋngo, maan-kugra zugu la b modgdame tɩ raada ra tẽes ye.

³ Maan-kʋʋda tãooda kur-koɛɛga la a yeelgda fu pɛɛlga. A vaagda bug-rɩɩna sẽn be maan-kugra zugu n ning maan-kugra sɛɛgẽ.

⁴ Dẽ poor marsã a yeesda a futã n le ning a taaba la a tʋkda tompɛglma n yi we-kɛɛnga, zĩig ning b sẽn yãk toore.

⁵ Bugum ninga sẽn wit maan-kugra zugã ka tog n ki ye. Yibeoog fãa maan-kʋʋda wata ne raado. Raada zugu a rogenda nemdã bɩ kaama sẽn na n dɩ bugma,

⁶ Bugum sẽn ka kiid abada n wit maan-kugra zugu.

Kũuni

⁷ Ad kũuna sẽn kõt to-to: a Aarõ kamb n talld-a n wa maan-kugra zugu, Soaala-Wẽnd taoore.

⁸ B yãkda zoma ne nugu n paas kaama bilfu, la tɩdara zãnga, n yõog bugum t'a yũuga noog Soaala-Wẽnd sũuri la a yɩ tẽegre.

⁹ A Aarõ ne a kamba yaondame marsã n dɩ sẽn ketã la b gũusdame tɩ ra-bɩll da pẽneg be ye. B baooda zĩig sẽn ya zĩ-sõng, zaka pʋga, sɛka doog noor, n zĩnd n dɩ b rɩɩbã.

¹⁰ Ka lobd ra-bɩll n wẽ zoma n yaool n kɩɩm ye. B sẽn kõ Soaala-Wẽnd kũun ninga la m yãkd n kõ a Aarõ kamba. Yaa rɩ-sõngo, wala b sẽn keesd yãmb rɩɩb ningã, y sã n kʋʋd yũ-noog bɩ yell manegr maoongo.

¹¹ Sẽn ya-a rao fãa, a Aarõ kamba sʋka, n tõe n dɩɩ rɩ-kãngã. Yaa bãmb pʋɩɩr sẽn ka na tedg zamaan woo zamaana, pʋɩɩr sẽn yãk Soaala rẽnnẽ. Woto wã fo sã n ka kĩ ne a Aarõ n kɩɩs n dɩ, f na bool yel-beed n kõ-f menga.

¹² Wẽnnaam yeela a Moyiiz t'a gom woto:

¹³ Ad kũun ninga a Aarõ ne a kamba sẽn na n kõ Soaala-Wẽnde, b kaama taagr daare: zom wamde, wamda pʋɩ-sʋk yibeoogo, a pʋɩ-sʋk zaabre, zamaan woo zamaana.

¹⁴ Zoma nagda ne kaam n dõos kud-pakleg zugu la b kõt-a-la Soaala-Wẽnd wala yũ-noog sẽn noogd sũuri.

¹⁵ A Aarõ biig ning sẽn na n deeg a ba wã maan-kʋʋra naam, yẽ me na n maana boto tɩ yaa noor sẽn ka tõe n teem ye. Kũuna na n dɩɩ bugmẽ zãnga, Soaala-Wẽnd yĩnga.

¹⁶ Kũun ninga fãa sẽn ya maan-kʋʋd n wa ne, na n yɩɩ bũmb sẽn yõogd zãnga, b ka na n dɩ-a ye.

Sugr kosg maoongo

¹⁷ Wẽnnaam yeela a Moyiiz

¹⁸ t'a taas a Aarõ ne a kambã woto: Ad yel-wẽnd sugr kosg maoongo sẽn kʋʋd to-to. Rũnga kʋʋda Soaala-Wẽnd taoore, zĩig ning b sẽn kʋʋd yũ-noog maoongã. Yaa bũmb sẽn ya sõng zãnga.

¹⁹ Maan-kʋʋd ninga sẽn kʋ-a maoongã n tõe n wãb-a la yaa zĩ-sõngẽ la a na n wãb-a: sɛka zakẽ.

²⁰ Bũmb ning fãa sẽn sɩɩs nemdã na n lebga bõn-sõngo. Rũnga zɩɩm sã n madg fuugu, b baooda zĩ-sõng n pek zɩɩma sẽn madg zĩig ningã.

²¹ Rʋk ninga sẽn dʋga nemdã na n wãame, a sã n ya tãnd rʋko. Sã n ya kut rʋko, b ruud-a lame la b pekd-a lame n yɩlem.

²² Sẽn ya-a rao fãa, n be maan-kʋʋdba sʋka, tõe n dɩ maoongã. Yaa bũmb sẽn ya bõn-sõng zãnga.

²³ B ra saag n wãb rũng sẽn kõ Wẽnnaam yel-wẽnd dolb yĩnga, tɩ b rɩk a zɩɩma n kẽ sɛka roogẽ n mes-a la yaa sugra kosg n wa ne rẽnna ye, yõogd-a-la bugum.