Maan‑kʋʋre 4 - SEBR SÕNGO

-4- Sugr kosg maoongo

¹ Soaala-Wẽnd goma ne a Moyiiz n yeel-a t'a wilg Israyɛl kamba woto:

² Ned sã n yĩd n maan wẽnga, n tõdg noor ning fãa Soaala-Wẽnd sẽn kõ, n maan bũmb sẽn kisi, bɩ a wa ne bũmbu tɩ b kʋ maoongo.

Maan-kʋʋd kãseng yĩnga

³ Sã n ya maan-kʋʋd kãsenga, b sẽn taag a soab ka-sõngã, sã n yaa yẽ n maan wẽnga, n kɩt tɩ buuda fãa naag n dẽgme, yaa lʋlle sẽn ya sõng zãnga la a na n kʋ, a yel-wẽna sugr paoong yĩnga.

⁴ A tallda lʋllã n wa Soaala-Wẽnd taoore, sɛka roog noore, n tik a zuga ne a nugu la a kodg-a Soaala-Wẽnd taoore.

⁵ Maan-kʋʋdã, b sẽn taag a soab ka-sõngã, yãkda naafa zɩɩm bilfu n tall n kẽ sɛka roogẽ.

⁶ A tẽkda zɩɩma ne a nug-bila n mes Soaala-Wẽnd waoogr rooga peen-lillã, Soaala-Wẽnd taoore, naoor a yopoe.

⁷ A yaond n yãka zɩɩma bilfu n taag tɩdara maan-kugra yɩdbã, Soaala-Wẽnd taoore, sɛka roogẽ. Dẽ poore a raagda zɩɩma fãa n gilg maan-kugrã sẽn dɩg sɛka rooga noorã.

⁸ La naafa sẽn kʋ yel-wẽnd sugr kosg yĩnga, a yãkda a kaama fãa. Yaa kaam ning sẽn mobg yãadã, sẽn gãneg yãada zugã,

⁹ yɩɩm a yiibã ne b kaama, zʋ-kɛɛga kaam. Sã n ya sãoorã, a naagdame n yãk-a ne yɩɩma.

¹⁰ Yãkda wala b sẽn yãkd lagem-n-dɩ maoongã la maan-kʋʋda yõogd-b-la bugum, yũ-noog maanda maan-kugr zugu, sɛka roog noore.

¹¹ Naafa gãongo, a nemdã, a zugã, a karsã, a yãadã, a bĩndã,

¹² naafa tõre, b na n talla rẽ fãa n zãag ne sikã, zĩig sẽn welg toore tɩ b lobd tompɛglma. B Na tugla bugum n yõog-b be. Yaa tãmpʋʋra zug la b na n dɩ bugum zãnga.

Israyɛl kamb yĩnga

¹³ Sã n ya Israyɛl kamba zãng n yĩdi n maan wẽnga, n maan Soaala-Wẽnd noor sẽn digdi, b rogenda yell b zugu, ba b sã n ka mi.

¹⁴ Yell a woto buud sã n maane, b na bao lʋlle n tall n wa sɛka roog noore.

¹⁵ Soaala-Wẽnd taoore kãsem-dãmba tikda naafa zugu ne b nusi la Soaala-Wẽnd taoore, b kʋʋd-a lame.

¹⁶ Maan-kʋʋdã, b sẽn taag a soab ne ka-sõngã, tallda naafa zɩɩm n kẽ sɛka roogẽ.

¹⁷ A na n tẽka zɩɩma ne a nug-bil n mes peen-lillã, Soaala-Wẽnd taoore, naoor a yopoe.

¹⁸ A na n taaga maan-kugra yɩdba, maan-kugr ning sẽn vigl Soaala-Wẽnd taoorã, la a raagda zɩɩma yũ-noog maan-kugra sɛɛgẽ, sɛka rooga noorẽ.

¹⁹ A na n yãka loalga kaam zãng n yõog bugum maan-kugra zugu.

²⁰ B na n maana ne nag kãng wala b sẽn maand ne naaf ning b sẽn kʋ yel-wẽn sugr kosg yĩngã. Maan-kʋʋda sã n maan b sẽn yet t'a maan bũmb ning n paam Soaala-Wẽnd sugrã, zãma wã sɩd paamda sugri.

²¹ A na n kɩtame tɩ b tall nemda zãng n zãag ne sikã n tɩ yõoge. Yaa woto la b maanda, a Israyɛl kamba yel-wẽna dolb yĩnga.

Buud kãsem-dãmba yĩnga

²² Sã n ya buud kãsma n yĩdi n maan wẽnga, n maan bũmb ning Soaala-Wẽnd noor sẽn gɩdge, tɩ samd be a zugu,

²³ a wata ne boɛɛg sẽn ya sõmbo.

²⁴ A rɩkda a nug n tik boɛɛga zugu la b kʋʋd-a-la Soaala-Wẽnd taoore, zĩig ning b sẽn kʋʋd yũ-noog maoongã, tɩ yaa yel-wẽnd dolb maoongo.

²⁵ Maan-kʋʋda tẽkda zɩɩma ne a nug-bila n taag maan-kugra yɩdbã, n yaool n dɩk zɩɩma sẽn kellã n daag maan-kugra sɛɛga.

²⁶ B yõogda kaama fãa wala lagem-n-dɩ maoongo. Maan-kʋʋda sã n maan a sẽn tog n maana fãa, buuda kãsem paamda sugri.

Nin-zaalg yĩnga

²⁷ Sã n ya nin-zaalg n yĩdi n kɩɩs Soaalã, n tʋk yell a zugu,

²⁸ b sã n wa wilg-a a sẽn tudg zĩig ninga, a tallda bʋ-yãanga sẽn ya sõmb n wa, a yel-wẽnda sugr kosg yĩnga.

²⁹ A rɩkda a nug n tik rũnga zugu tɩ b kʋ-a b sẽn kʋʋd yũ-noog maanda zĩigẽ.

³⁰ Maan-kʋʋda tẽkda zɩɩma ne a nug-bila n taag yũ-noog maan-kugrã yɩdbã. A rɩkda zɩɩma sẽn kellã n daag maan-kugra sɛɛga.

³¹ A yãkda kaama zãng wala b sẽn maand ne lagem-n-dɩ maoongo. Maan-kʋʋda yõogda rẽ fãa bugum, Soaala-Wẽnd sũur maagr yĩnga. La a sã n maan a sẽn tog n maana fãa tɩ sẽn beega soaba paam sugri, a sɩd rokda a beegr taale.

³² Neda sã n wat ne rũnga n na n kʋ maoongo, yell a woto yĩnga, bɩ a wa ne pe-yãanga sẽn ya sõmb zãnga.

³³ A rɩkda a nug n tik rũnga zugu tɩ b kʋ-a, a yel-wẽna sugr kosg yĩnga, zĩig ning b sẽn kʋʋd yũ-noog maandã.

³⁴ Maan-kʋʋda tẽkda zɩɩma ne a nug-bila n taag yũ-noog maan-kugra yɩdbã. A rɩkda zɩɩma sẽn kellã n daag maan-kugra tẽngre.

³⁵ A yãkda a kaama zãng wala b sẽn yãkd pesg sẽn kʋ laafi kosg yĩnga. Maan-kʋʋda yõogd-a-la bugum maan-kugra zugu Soaala-Wẽnd yĩnga. Maan-kʋʋda sã n maan a sẽn tog n maan bũmb ninga fãa, beegda paamda sugri.