Maan‑kʋʋre 3 - SEBR SÕNGO

-3- Lagem-n-dɩ maoongo

¹ Ned sã n dat n kʋ Lagem-n-dɩ maoongo, la rũnga yaa bedre, raoog bɩ yãanga, a bãng tɩ yaa rũng sẽn ka tar bãnde la a na n tall n wa Soaala taoore.

² B tikda nug rũnga zug la b kodgd-a-la sɛka roog noore. Maan-kʋʋdba, a Aarõ kamba, yãkda a zɩɩma n mes maan-kugrã n gilgi.

³ B yãkda maoonga bũmb n yõog bugum tɩ rɩ zãng Soaala-Wẽnd yĩnga. B sẽn na n yãkã, yaa kaama sẽn mobg yãada zãnga, bɩ sẽn be zĩig a to;

⁴ n paas yɩɩma a yiibã ne b kaama. Sã n ya sãoorã, b naagdame n yãk-a ne yɩɩma yiibã.

⁵ A Aarõ kamba yõogda rẽ fãa maan-kugra zugu, wa yibeoog fãa maoongã. Bugum n na n dɩ-b zãnga tɩ b yũ-nooga noog Soaala-Wẽnd sũuri.

⁶ Lagem-n-dɩ maoonga sã yaa rũm-bil la b kʋʋda, rũnga tõe n yii raoog bɩ yãanga, a ye n ka tar bãnde.

⁷ Sã n ya pe-bila b talld-a lame n wa maanda kʋʋb zĩigẽ.

⁸ B tikda nug rũnga zugu la b kʋʋd-a-la sɛka roog noore; t'a Aarõ kamba mes a zɩɩma n gilg maan-kugrã.

⁹ Bũmb la b na n yãk n yõog tɩ rɩ zãnga t'a yũ-nooga kẽ Soaala-Wẽnde: yaa zʋʋra tõre, ne zʋ-kɛɛgã, kaama sẽn mobg yãada zãnga,

¹⁰ yɩɩm a yiibã ne b kaama. Sã n ya sãoorã, naagd n yãk-a la ne yɩɩma.

¹¹ Maan-kʋʋda, na n basame tɩ bugma rɩ-b zãng maan-kugra zugu, Soaala-Wẽnd yĩnga.

¹² Sã n ya bʋʋg la b na n kʋ n kõ Soaala-Wẽnde,

¹³ b rɩkda nug n tik a zugu, n kodg-a sɛka roog noore t'a Aarõ kamba mes a zɩɩma n gilg maan-kugrã.

¹⁴ Ad-b sẽn na n yãk bũmb ning n yõog bugum Soaala-Wẽnd yĩnga: kaama sẽn mobg yãada zãnga, zĩis a taaba kaama,

¹⁵ yɩɩm a yiiba ne b kaama, zʋ-kɛɛgã kaam. Sã n ya sãoorã, naagd-a lame n yãk ne yɩɩm a yiibã.

¹⁶ Maan-kʋʋda yõogd-b-la bugum tɩ b rɩ maan-kugra zugu wala yũ-noog sẽn noogd Soaala-Wẽnd sũuri. Soaala-Wẽnd n so kaama fãa.

¹⁷ La rẽ yaa noore mam sẽn kõt yãmb yagense la b sẽn na n deege, b sẽn be zĩig ning fãa; noora la woto: da rɩ-y kaam la zɩɩm ye.