Maan‑kʋʋre 27 - SEBR SÕNGO

Yɛl kẽer tẽegre

¹ Soaala-Wẽnd yeela a Moyiiz

² t'a togs Israyɛl kamba woto: «Ned sã n pʋlem Naaba-Wẽnd t'a na n kõ-b-la ninsaala, a tõe n pidsa a pʋlemdã ne ligdi yaoobo.

³ Ligda yaooda woto: Sã n ya rao yʋʋm sẽn ta pisi n digd pisoobe, yaa wanzurf wakɩ koeems pis-nu. Wanzurf wakɩr wa b sẽn dɩt a soab Soaala-Wẽnd waoogr do-sõngẽ wã.

⁴ Sã n ya paga, yaa wanzurf wakɩ koeems pis-tã.

⁵ Sã n ya bi-ribl sẽn ta yʋʋm a nu n digd pisi, yaa wanzurf wakɩ koeems pisi, sã n ya bi-pugla yaa wanzurf wakɩ koeems piiga.

⁶ Sã n ya bi-ribl sẽn ta kiuug n digd yʋʋm a nu, yaa wanzurf wakɩ koeems a nu. Sã n ya bi-pugla yaa wanzurf wakɩ koeems a tãabo.

⁷ Rao sã n ta yʋʋm pisoobe bɩ yɩɩd rẽnna, a yaood yaa wanzurf wakɩ koeems piig la a nu. Sã n ya paga, yaa wakɩ koeems piiga.

⁸ Ned sã n pʋlem ninsaal Soaala-Wẽnde n yaool n ya naong soaba n ka tar a sẽn tog n kɩsã, b tallda nedã n wa maan-kʋʋda nengẽ t'a ges a sẽn na n yaoolg-a to-to; maan-kʋʋda geta a naongã n geelg n zemse.

Rũng pʋlemde

⁹ Sã n ya rũng b sẽn tõe n dɩk n kõ Soaala-Wẽnde, b sã n pʋlem n sɛ, lebga bũmb sẽn ya sõngo,

¹⁰ ka tõe n tedg rũng a to, ka tõe n tedg buud a to tɩ bõn-sõng ledg bõn-yoog zĩigẽ, bɩ bõn-wẽng ledg bõn-sõng zĩig ye. B sã n dɩk rũng n tedg ne rũng a to, b yiiba fãa lebga Soaala-Wẽnd pʋɩɩre.

¹¹ Sã n ya rũng sẽn ka tõe n dɩk n kõ Soaala-Wẽnd la b pʋlem yã, b sẽn pʋlma yĩnga, b talld-a lame n wa maan-kʋʋda taoore.

¹² Yẽ n na n ges rũngã n bãng a sõng la a goalenga n saag a ligdi la yẽ sẽn wilgã n yɛse.

¹³ B sã n dat n yao n deeg-a bɩ b paas a ligda bilfu.

Yir pʋlemde

¹⁴ Ned sã n pʋlem a yir Soaala-Wẽnde, maan-kʋʋdã n get n bãng a sã n bee yõod wʋsgo bɩ a sã n ka be yõodo, la yẽ sẽn yeel n be.

¹⁵ Raoã sã n dat n yao n deeg a yiri bɩ a paas ligd bilfu n yao n deege.

Pʋt pʋlemde

¹⁶ Ned sã n pʋlem a pʋʋg Soaala-Wẽnde, b geta ka buud pet a wãn la b toe n bʋd a pʋgẽ. Alkam pugsgu pet piig fãa yaa wanzurf wakɩ koeems pis-nu la f kɩta.

¹⁷ Sã n ya yʋʋm sõnga pʋgẽ la a pʋlem yã, ka geend n paas bɩ n woog bũmb ye.

¹⁸ Sã n ya yʋʋm sõng poore, b sõta yʋʋma sẽn ket tɩ yʋʋmd sõnga ta wã. Yʋʋmda sã n ket n zãra, gɛɛlga woogda bilfu.

¹⁹ Sẽn pʋlm-a a pʋʋga sã n dat n le soog a pʋʋgo, a paasda ligda sẽn da geelgã pʋɩɩr a nu soaba.

²⁰ A sã n yak n koos pʋʋgã ne ned a to n yaool n ka reng n yao tɩ pʋʋga sẽn zoe n ya Wẽnd soolma le lebg a rẽnna, yaoolem daadã n so puugã marsã; fo ka tõe n le yao n deeg-a dẽ poor ye.

²¹ Woto, yʋʋmd sõnga sã n vẽke, sẽn daa-a wã me ka le so-a ye, a lʋɩta Soaala-Wẽnd soolmẽ; ned a to ka le tõe n dɩ a yõodo, a lebgda maan-kʋʋda soolem bala.

²² Fo sã n pʋlem pʋʋg f sẽn da, ka f ba rẽnd ye,

²³ maan-kʋʋda geta yʋʋma sẽn kete tɩ yʋʋm sõnga ta, n tõog n geelg pʋʋga ligdi la ligda sẽn geelgã, b yaood-a-la baraar bala tɩ yaa Soaala-Wẽnd bõn-sõngo.

²⁴ Yʋʋm sõnga sã n ta, pʋʋga lebda a pipi soaal nugẽ tɩ yaa a saam-dãmb bũmbu.

²⁵ Geelsã geenda wa b sẽn geend Soaala-Wẽnd waoogra do-sõngẽ. Koeeng a ye wãada bõones pisi.

Kũun sẽn kisi

²⁶ Ned ka tõe n dɩk a rũng bi-rẽeng, rũm-bedr bɩ rũm-bila: nag-bila, bulla, pe-bila, n pʋlem Soaala-Wẽnd ye, a zoe n yaa bãmb soolem.

²⁷ Sã n ya rũng sẽn ka tõe n dɩk n kõ Soaala-Wẽnde, la a ka rat n tek ne rũng a to, b tõe n geelga a ligdã n paas pʋɩɩr a nu soaba t'a yao n deege. B sã n ka yao n deeg-a, b koosda rũnga wala a sẽn tõe n da tɛka.

²⁸ Ned sã dɩk bũmb n kõ Soaala-Wẽnd zãnga, bõn-kãng yii koosgo la raab pʋgẽ. Tõe n yɩɩ ned bɩ rũng la b pʋlem Soaala-Wẽnd zãnga. Bũmb sẽn kõ Soaala-Wẽnd zãng lebga bũmb sẽn ya sõng zãnga, lebga Soaala-Wẽnd b ye soolem.

²⁹ Ninsaal b sẽn pʋlem Soaala-Wẽnd zãnga ka tõe n le yao n deeg ye, dẽnd b kʋ-a bala.

Pʋɩɩr a ye piig zugu

³⁰ Tẽnga biisi, tɩɩsa biisi, na dʋʋga dʋr piig-piiga, n yãk dʋr a ye, pʋɩɩr a ye, n kõ Soaala-Wẽnde, rẽ yaa Soaala-Wẽnd pʋɩɩre.

³¹ Fo sã n yãk Soaala-Wẽnd pʋɩɩrã n kõ-ba, n yaool n dat n yao n deege, dẽnd f paas bũmb bilfu: Sã n saag a nu fo paasda a ye tɩ lebg a yoobe la f kɩta.

³² Rũmsã, bɛd la bõonego me pʋɩta piig piiga n yãk pʋɩɩr a ye n kõ Soaala-Wẽnde. Wẽnd so-la a ye tɩ fo so a wɛ.

³³ B ra kẽ n welg sẽn ya sõmb la sẽn ka sõmb ye; b ra tedg ye, b sã n tedge, rũng a to wã me naag n lebga Soaala-Wẽnd pʋɩɩre; ka tõe n yao n le reeg ye.»

³⁴ Yaa woto la Wẽnnaam noya. B togs-b-la a Moyiiz Sinayi tãng zugu, Israyɛl kamb yĩnga.